ورقہ 121

2236
بی بی جاتا سچا پکا عاشق ہے دلبردا
جھلے غم صنم دی خاطر عیشاں چِت نہ دھردا
2237
لگی چِھک اداسی ہویا مول نہیں اس رہنا
رخصت کریئے جت ول جاندا کاہنوں مڑ مڑ کہنا
2238
خچر خوب سواری والی کر تیار منگائی
زینت زین سنہری کرکے ہچھی طرح سُہائی
2239
شیشہ اپنے ویکھن والا شاہزادے نوں دتا
کیہا جو کوئی ملسی دسیں جائیں چلا کنڈِتا
2240
گولی ہک جوان سندر تک نال شہزادے لائی
ہو اسوار خچر تے ٹُریا بی بی ٹورن آئی
2241
کہیا حد اساڈی توڑی خطرہ رکھ نہ کوئی
جس ویلے ایہ حد تسانوں تمّ تمامی ہوئی
2242
شیشہ خچر دے کے اوتھوں موڑیں گولی تائیں
رکھ توکل ہک ہکلا پھر اگوں توں جائیں
زنانے شہر دی سلطانہ دا مقولہ
2243
دے کے خرچ روانہ کیتا وس نہیں کجھ چلی
آپ نہ رہندا نال نہ کھڑدا مشکل بنی اولّی
2244
غیبوں رب ملایا بنّا خوشیاں رہیا نہ بناّ
چھڈ ٹُریا ہن رہندا ناہیں لکھ شیرینی منّاں
2245
آپے آیا گھر سُہایا مینوں رب ملایا
سٹ ٹریا ہن پھٹ اسانوں جاں گھٹ عشق سمایا
2246
نہ کوئی آس ملن دی مڑکے کون آنے اس پاسے
چھوڑ گیا نیو نہہ تروڑ پیارا کرکے کُوڑ دلاسے
2247
سوہنا مِٹھا رج نہ ڈِٹھا چِٹھا میرا گلیا
لعل پیارا اپن اپارا لا چمکارا چلیا
2248
ٹھگ گیا لاء اگ کلیجے وگ تھکی نہیں اڑیا
سُکھاں کارن لائی آہی آن دکھاں لڑ پھڑیا
2249
سیف ملوک بندوق لگاکے کوک نہیں ہن سُندا
پھٹ نہ سیندا ظالم تھیندا رت پیندا نہیں پُندا
2250
صبر کراں گی دکھ جراں گی یا مراں گی ہاوے
کجھ نہ کہنا سر پر سہنا جے کجھ رب سہاوے
2251
کرد کلیجے مرد لگائی ظالم درد جدائی
جاں شاہزادہ اوہلے ہویا روندی مڑ گھر آئی
2252
ساقی سوہنا مدھ کھری دا دے پیالا بھرکے
پیواں تے پھر کھیوا تھیواں مڑ کے جیواں مرکے
2253
ماراں دشمن دیوے تائیں قید کیتا جس سوہنا
اوہ چُھٹے تاں دلبر میلے ہور علاج نہ پوہنا

لفظالی:
صنم =محبوب بُت، چت نہ دھردا= دل وچ خیال نہیں لیاؤندا، چھِک = کھچ، سُہائی = سجائی، دسیں = دکھائیں ، کنڈِتا جانا= سب پاسیوں بے دھیانا ہو کے نک دی سیدھے جانا۔ غیر اللہ ولوّ ں کنڈ کر کے جانا، گولی = کنیز، تم تمامی ہوئی= ساری ختم ہو گئی ، وس =اختیار ۔ واہ ، بناّ = دولھا ۔ مہاراج(٢) حد دی وٹ۔ سرحد،سُہایا= سجیا، اسانوں پھٹ کے= مینوں زخمی کر کے ، گھٹ= دل، آنے = لیاوے، چٹھا= تقدیر دا لکھیا، اپن اپارا= اپرمپرا۔ جہدی پہلے کوئی روایت مثال نہ ہووے، وگ تھکی= بھج دوڑ کے تھک گئی ہاں ساری واہ لالئی اے، چمکارا= طفل تسلی۔جُھوٹھے لارے ، نہیں پُندا= رَت اَن پُنی ای پیوی جاندا اے ، ہاوے= وچھوڑے دا ہبکاّ ۔، جے کجھ رب سہاوے= جو کجھ رب جھلاوے ، نہ پوہنا= اثر نہیں کرے گا، کرد= کارد ۔ چُھری، مدھ کھری= شراب ناب، کھیوا= مخمور ۔ نشئی۔