ورقہ 124

2289
عقل کہے کھا کاتی مرنا کم ہوندا شیطانی
بھار لگاتاں پنڈ اُتاری نہیں عشق دی بانی
2290
نفس کہے فرہادے لایا آپ سرے نوں تیشہ
اوہ مویا مردود نہ ہویا میں بھی اوہ اندیشہ
2291
عقل کہے فرہادے سنیا شیریں گئی جہانوں
اوس جہان گیا سی ڈھونڈن مویا نہیں اَک جانوں
2292
نفس کہے کیوں مہینوالے ماری چھال چنھاویں
مارو کانگ ڈِٹھی سی سوہنی کیوں پئی دریاویں
2293
عقل کہے توں سمجھیں ناہیں اوہ مرنا کِت پاسے
دوئے ہک دوئے ول ٹِھلے گل ملن دی آسے
2294
جے ایہ مرنا جائز ہوندا تاں مجنوں کیوں روندا
ترِیھ ورھے کیوں سڑدا رہندا مر سوکھا ہو سوندا
2295
جس دن ہیر ویاہی کھیڑے رانجھا بی مرجاندا
کاہنوں کن پڑاندا ٹِلّے گل کیوں کفنی پاندا
2296
ویکھ زلیخا کتنی واری دُکھاں پئی اکائی
موہرا کھا نہ موئی تائییں ہر عاشق دی مائی
2297
ہور ہزاراں عاشق ہوئے دکھیے تے لاچاری
یار ملے بن دردوں اَک کے پیٹ چھری کس ماری؟
2298
مرداں والا دایا کرکھاں رکھ پچھلی جو عادت
وانگ سسی جے تسا مویوں تاں بھی عین شہادت
2299
نفس عقل دی تابع ہوندا جو کہندا سو مندا
لُگے پنڈ مُقدم موچی ساڈے اتے بندا
2300
جے کر شرح کراں اس گل دی دور سخن ٹُرجاندا
کرکے صبر محمدبخشا قصہ چل سناندا
2301
نفس عقل دا جھگڑا ترُٹّا عشقے رٹ مکائی
سیف ملوکے منصف بن کے فال اُتے گل پائی
2302
کہندا ربّا جے توں مینوں دلبر نال ملاسیں
تاں اس وقت کسے دے ہتھوں پانی سرد پلاسیں
2303
جے اک گھڑی نہ پانی لدھا ظالم لُوں قہر دی
ساڑ ہلاک کرے گی مینوں چاہ رہسی دلبردی
2304
ایہو فال ربے پرسٹ کے شاہزادہ لتڑایا
جنڈ گرنڈا رکھ سرہانے پاس زمیں تے لایا
2305
اکھیں ستیاں تے دل جاگے جاگے طالع ستے
اچن چیت ہک مرد ازغیبوں آن کھلا سراُتے
2306
انگ انسانی رنگ نورانی آن نسنگ کھلوتا
بھاری سی دستار سرے تے سبز جیویں رنگ طوطا
2307
صورت سیرت وانگ خضر دے چہرہ سورج چمکے
والاں تھیں خشبوئی ہُلے آن چوطرفی رمکے

لفظالی:
کاتی = چُھری، بانی= کلام۔ مقدس فرمان ، اندیشہ = سوچ ، اک جانوں = جان توں اک کے، مارُو= مہلک ، کانگ= سیلاب = ہڑھ ، گل =گلے ، ٹِلّے= ٹلّہ جوگیاں بالناتھ کول جا کے ، اک کے = اُکتا کے، دایا= ٹیچا ۔ عزم ۔ ٹارگٹ ۔ گول (goal) ، عادت= عاشقاں دا رواج ، بندا= صادق آوندا اے۔ پھبدا اے، رٹ مکائی = جھگڑا ختم کیتا، لتڑایا= سستا یا۔لتاں سدھیاں کر کے لیٹیا، جنڈگرنڈا= کھروے بوٹے، پاس = پاسا۔ وکھی، ازغیبوں=قدرت ولوّں ، نسنگ = جھجک توں بغیر ، ہُلےّ= خوشبو۔ کھنڈے، رَمکے= ہولی ہولی ٹُرے، لُگے پنڈ = جس پنڈ وچوں مقدم نمبردار کتے چلے گئے ہوون اوتھے موچی ای پردھان ہو بہندا اے،