ورقہ 125

2308
حسن جمال کمال اوہدے دی اوڑک حد نہ آہی
دم دم اندر پاک زبانوں کردا ذکر الہی
2309
فیروزہ رنگ عاصہ ہتھ وچ سبھ سفید پوشاکی
مظہر نور الٰہی دِسدا جُثّے جامے پاکی
2310
خسخس جتنی میل نہ کدھرے نہ پَیریں نہ جوڑے
ساوے وال سرے تے لشکن جیوں سی کلغی توڑے
2311
ہتھ دُجے اس چھنا پھڑیا ٹھنڈے پانی بھریا
حوض کوثر دے چشمے وانگر دندیاں اتوں تریا
2312
خوش آواز رسیلا کرکے مِٹھی نال زبانے
شاہزادے نوں کہیا اس نے اُٹھ عاشق مردانے
2313
اس جُوہے وچ تیرے کارن مولیٰ مینوں گھلیا
ہور نہیں کوئی مطلب میرا نہیں کِتے ول چلیا
2314
تیرے اُتّے رحمت کیتی آپ خداوند سائیں
پانی دے اُچیچا گھلیا تدھ ول میرے تائیں
2315
اُٹھ شتابی نال خوشی دے پی ایہ شربت مٹھا
تھوڑے دن ہُن مہلت رہندی کُھلسیتیرا چِٹھا
2316
اج کل وچ خداوند تینوں ایسی تھاں پُچاسی
جتھوں محرم اوس پری دا مِلسی تے دس پاسی
2317
اوہ بھی نال تیرے ٹُرجا سی توڑ پری تک سنگی
دل تھیں چِنتا چا شاہزادے نہ کر خفگی تنگی
2318
فکر فراق قضیے سختی دکھاں چھیکڑ آئی
وقت خوشی دا نیڑے آیا ہمت کرتوں بھائی
2319
اگے تھوڑی بِبتا رہندی گیا قضیہ لما
چل شاہزادے ول سجن دے بیٹھ نہ ہو نکما
2320
سیف ملوک اوہدی گل سن کے پل وچ دونا ہویا
گل نہ سی کوئی آب حیاتی مویا اٹھ کھلویا
2321
شہر سبایوں پاس سلیماں پُہتا ہد ہد مِٹھا
یا یوسفؑ پیراہن گھلیا یعقوبے نے ڈٹھا
2322
یاسسی نوں ملے ستھوئی پہلے کیچ نگر دے
یاوکیل زلیخا ڈِٹھے خاص عزیز مصر دے
2323
یاہیرے دا باہمن آیا رانجھے دے وچ خانے
یا مجنوں ول زید لیایا لیلیٰ دے پروانے
2324
یا اوہ مینہ بہاری ملیا باغ خزاں دے مارے
یا اوہ باتی بُجھدی جاندی پہتا تیل دوبارے
2325
یابلبل نوں واء فجر دی رقعے کِھڑے گُلاں دے
یا اوہ راہبر محرم ملیا اوجھڑ بُھلّے جاندے
2326
یا اوہ رات ہنیری اندر چڑھیا چن اسمانی
یا اوہ انھے مادر زادے لدھی نظر نورانی

لفظالی:
اوڑک = آخری سرا۔ انتہاء ، عاصہ= عصا۔ ڈنڈا۔ لاٹھی، فیروزہ = فیروزی رنگ Turquoise، جوڑے =جُتی تے، ساوے وال= اجہے کالے وال جیہڑے سورج دی روشنی وچ سُنہری جیہے ہوجاون، کلغی = ٹ ک 48، دندیاں اُتوں تریا= کنڈھیاں اتوں اچھلدا ہویا، چٹھا کھُلنا= سرکاری کھاتے وچ ناں لکھیا جانا کہ ایہہ شخص خزانے وچوں اینی قیمتی رقم کڈھا سکدا اے ، توڑ پری تک= پری دے آخری ٹکانے تائیں ، سنگی = مصاحب ۔ ساتھی ۔ ، خفگی=گھٹن۔ غم غصےّ دی حالت ، چھیکڑ= آخری خاتمے دی حالت ۔مکن دی واری ، ببتا= بپتا۔ مصیبت، قضیہ= جھگڑا۔ مسئلہ۔ مشکل پرابلم ، گل نہ سی۔۔۔۔۔۔ = ایس گل نے آب حیات دا اثر دکھایا ۔ ستھوئی= اوٹھاں تے سفر کرن والے مسافر ، سبایوں = سبا ولوّں ، وکیل = عزیز مصر دے گھلے ہوئے نمائندے، زید= لیلیٰ دا قاصد ، باتی = بتیّ ، اوجھڑ= ٹھیک سدھے رستے توں علاوہ مشکل دشوار گزار رستہ،میرے تائیں=مینوں،