ورقہ 126

2327
یا تعویذ فرشتے آندا اوپر چخا خلیلے
یا کھوہے وچ یوسف کارن کھڑیا وحی وکیلے
2328
سیف ملوکے اچن چیتی اکھیں اُگھڑ گیاں
سر، دھڑ،کن بناکے سُندا کُھل گیاں کھڑکیاّں
2329
اُبڑھ واہیا اٹھ کھلوتا بُھلّی تریہہ تمامی
اوس بزرگ ول نال ادب دے نیوں کے ہویا سلامی
2330
باتعظیم سلام ہزاراں کرکے ادب زیادہ
یاحضرت! کے نام تساڈا کردا عرض شزادہ
2331
اوس بزرگ نے کہیا اگوں میں ہاں ملک سرشتہ
میرا نام خداوند دھریا حورائیل فرشتہ
2332
لکھ لکھ ہووے مبارک تینوں سیف ملوک جوانا
تھوڑی سختی رہندی باقی پھریا نیک زمانہ
2333
مطلب تیرا حاصل ہوسی جاسن غم ہزاراں
نال بدیع جمال پری دے کرسیں چین بہاراں
2334
عقد نکاح کریں گا اس نوں راج ہووے گا تیرا
شاہ پریاں دے گھر وچ خوشئیں کاج ہوویگا تیرا
2335
چاہ مراد تیری سبھ ملسی دولت تخت شاہی دا
حیلہ کرجے ملے وسیلہ وچ وکیل چاہیدا
2336
جے سوحیلے باجھ وسیلے کریئے نال دلیلے
بھار بیڑے دا پار نہ جاندا باجھ ملاح رنگیلے
2337
نال ملاح صلاح ملائیں ٹِھلھ چلائیں بیڑا
پِیر بناں تدبیر نہ کوئی جھوٹھا ایہو جھیڑا
2338
لوڑ موکّل کریں توکّل منیں اس دا کیہا
دس پاوے تے یار ملاوے غم ہووے بھر بیہا
2339
کنڈے سخت گلاباں والے دوروں ویکھ نہ ڈریئے
چوہباں جھلیئے رت چوایئے جھول پُھلیں تدبھریئے
2340
باشک ناگاں دے سرگاہیں آون ہتھ خزانے
رت ڈولھیں پھٹ کھاویں شاہا سوکھے نہیں یرانے
2341
سیف ملوک شاہزادے تائیں حکمے نال ربانے
اعظم اسم فرشتے دسیا پڑھیا شاہ سیانے
2342
عاصے نال فرشتے سچے لیک زمیں تے پائی
کہیوس اِسے رخ تے جائیں لوڑ کریں ہرجائی
2343
آپ فرشتہ غائب ہویا چھوڑ شزادے تائیں
سیف ملوک خوشی کر ٹریا ہویاں دور بلائیں
2344
خاطر جمع تسلی ہوئی خطرہ رہیا نہ کوئے
چامل چایا تے اُٹھ دھایا شیر جنگل جیوں ہوئے
2345
جنگل برّ اجاڑ وڈیری ہور اگوں پھر آئی
انت حساب شماروں باہر چڑیائی لمیائی

لفظالی:
مصیبت تعویذ= مشکل دے حل ۔ جان دے بچا لئی اللہ ولوّں پناہ دی کوئی صورت ، حضرت ابراہیم خلیل اللہ کول حضرت جبرائیل اللہ دا پیغام لے کے آوندے سن ، کھڑیا وحی وکیلے= اللہ تعالیٰ نے حضرت یوسف واسطے جبرئیل نوں وکیل بناکے بھیجیا۔ ٹ ک احسن القصص صفحہ 552، اُبھڑواہیا= خوف نال تربھک کے ،ملک سرشتہ= فرشتیاں دی فطرت وچوں ، کاج = شادی دا مبارک کم ، جے = بھانویں ، لوڑ موکل= مؤکِل لبھ کے، موکل= اوہ غیبی طاقت جیہڑی مشکل کشائی لئی بوہڑے، بھر بیہا= مکمل طور تے بہیا ۔ غم تازہ نہ رہے۔ غم بھُل ای جاوے، جھول = جھولی ، سرگاہیں = سریاںنوں مِدھیں ، لوڑ کریں = لبھیں ، برّ = خشکی دا قطعہ، چڑیائی = چوڑائی ، لمیائی = لمبائی ، اسم اعظم = اللہ تعالیٰ دا سب توں وڈا ناں جیہڑا مشکل کشائی لئی پڑھیا جاندا اے ، ہر جائی = ہر تھاں تے ، چامل چایا= شوق امنگ نے چا چڑھایا،