ورقہ 127

2346
جے سبھ خلقت روئے زمیں دی جا اوہدے وچ چھپے
جیوں آٹے وچ لون نہ دسدا تیویں ساری کھپے
2347
بار مریلی جان اکیلی یار نہیں کوئی ساتھی
غول ڈراون تے کول آون دیو وڈے جیوں ہاتھی
2348
رات ہنیری خوف چوپھیرے بولن دیو بلائیں
عاشق باجھ نہ قدر کسے دا بچے اجہییں جائیں
2349
ان نہ پانی واس مسانی رستے نہیں نشانی
جنڈ گرنڈے ظالم کنڈے پُرپُر سلے کانی
2350
نازک پیر پُھلاں تھیں آہے ریشم پُھلے لپیٹے
نت نگاہنے جنگل گاہنے پھڑے بُری السیٹے

شہزادے دا اسفند باش نامی قلعے تائیں اپڑنا تے اوہنوں فتح کرنا ملکہ خاتون نوں دیو قتل کرن مگروں رہا کرانا

2351
دھپاں پالے سر تے سہندا نیندر بُھکھ پیاساں
اگے ہی اوہ مان نہ آہا لگ پیاں ہُن آساں
2352
اعظم اسم پکاندا جاندا برکت اس دی بھاری
قوّت زور عشق دا تن وچ ہور اسم دی یاری
2353
ہک دن تردے تردے جاندے جا اُچی ہک تکی
اوسے ول اُتیرے چڑھیا رکھ دلیری پکی
2354
اُچّا تھاں وڈیرا آہا چڑھدا گیا اگیرے
اتے جا متعجب ہویا پھیری نظر چوپھیرے
2355
ہر ہر پاس نگاہ دوڑائے تکے رب دیاں کھیلاں
جیوں کرنجد اتے چڑھ مجنوں تکدا سی گھرلیلاں
2356
قلعہ بلند حسابوں باہر نظر پیا ہک پاسے
ہک ہک برج اوہدے دا ایرا سارا کم رُہتا سے
2357
باہی ایڈی اُچی آہی جے ال کرے پُہارا
پہلے چیرے پہنچے مرکے اگے ہور پسارا
2358
جے سیمرغ اڈاری مارے ساری قوت کرکے
اس نوں بھی کم مشکل آہا اُتوں لنگھن ترکے
2359
پیر زمین دے ہیٹھ ِسرے سن کنگریاں اسمانی
دسن بند ہوئے دروازے نہ کوئی راہ نشانی
2360
سیف ملوک قلعے ول ٹریا ذرہ خوف نہ کھاندا
مرجیو اوکھا سوکھا ہوکے کول قلعے دے جاندا
2361
اوہ اندر نوں وڑیا لوڑے کھول کیویں دروازہ
جثے جامے پاکی کیتی وضو کیتا مڑتازہ

لفظالی:
بار= اجاڑ۔ جنگل، غُول = چھلیڈے۔ فرضی جن بھوت جیہڑے کئی قسم دیاں شکلاں بدل کے راہیاں نوں ڈراندے رہندے نیں ، قدر= قدرت ۔ طاقت۔ حےثیت، مسانی واس= مڑھیاں وچ رہائش ،جنڈ گرنڈے= کنڈیاں والے رُکھ ، پُر پُر سلے کانی= سریر دی پور پور وچ تیر وج رہے نیں ۔ نگاہنے= پیروں ننگے ، مان نہ آہا= پہلاں ای اوہدا ولولہ چوکھا سی پر ہن تے سجن مِلن دی آس لگ گئی اے ، ورتوں انج اے ۔ اوہ سپاہی ای مان نہیں سی پر ہُن تے ٹھانیدار ہو گیا اے، اسم اعظم = اللہ دا اسم ذات ، پاس = پاسے ، نجد= نجد دا پہاڑ ، ایرا = نینہہ، رہتاس= شیر شاہ سوری دا بنوایا ہویا قلعہ جو جی ٹی روڈ تے دینے توں 7کلومیٹر دور اے، رُہتا سے = رہتاس قلعے وانگوں اے، پُہارا= یکلخت اچی اڑان ، چیرے = مکان دی منزل،السیٹے=اُلجھن،