ورقہ 128

2362
اعظم اسم مبارک پڑھیا قفل اتارے در دے
کر بسم اللہ اندر وڑیا کردا سیر اندردے
2363
ہر ہر چھپن چُھوتے تکے ہر ہر برج منارے
ہر باہی دروازے کوٹھے تھاں تکیندا سارے
2364
ڈٹھیؤس صحن قلعے دے اندر بہت عجب ہک ماڑی
نال جنت فردوس برابر خوب کریگر چاڑھی
2365
جویں اسمان کھرے تے راتیں چمکن روشن تارے
تیویں اس بنگلے دے دسدے شیشے چمکن ہارے
2366
لعل جواہر موتیں ہیرے جڑت جڑا چوپھیرے
دینہ چن وانگر دوروں لشکن روشن کرن ہنیرے
2367
شاہزادے جد ڈٹھا دوروں بنگلہ خوب سُہایا
دل نوں برقراری آئی اُٹھ اُتے ول دھایا
2368
جابنگلے دے در تے پہتا ویکھ تعجب رہیا
آکھے دوجا روئے زمین تے ڈٹھا نہیں اجیہا
2369
بہت بلند شماروں بنگلہ انبر نال منارے
خوب بلور عقیق کھرے دے اٹاں وٹے سارے
2370
گردے دا کجھ انت نہ آوے کے کجھ آکھ سناواں
ہک بنگلے وچ دنگلے خانے وانگن شہر گراواں
2371
چھجا چھت بنیرا جھالر جڑ موتیں فیروزے
چونے بدلے چاندی کندھیں درج ہوئی زر دوزے
2372
کندھے اتے طاق سنہری بہت بلند بنائے
لاجوردے وانگ اسمانی نقش نگار سہائے
2373
رنگا رنگ عجائب بوٹے رنگاں نال سجائے
پت ہرے فیروزے کولوں چاندی ڈال لگائے
2374
سرخ عقیق ہیرے دیاں کنیاں لعل زمرد گھڑ کے
رنگ برنگی پُھل بنائے شاخاں اُتے جڑکے
2375
گوہر تابش دار کھرے دے گئے چوپھیرے بندے
ہک ہک ٹکی دینہہ روشن دی ہک ہک چوہدیں چن دے
2376
واہ نقاش کریگر بھارے کیتے نقش ہزاراں
باغ بہاراں تے گلزاراں میوے رُکھ قطاراں
2377
تتر مور چکور ہزاراں بھور لٹورے طوطے
رنگا رنگ پہاڑی پنکھی ویکھ رہے روح غوطے
2378
آدم جن پری دیاں لکھیاں خوب شکل تصویراں
تختاں تے شاہزادے بیٹھے کرسی فرش امیراں
2379
بنگلے دے دروازے اگے بنے بازار چورستے
ہٹ بھرے کجھ گھٹ نہ آہا لوڑ پوے جس دستے
2380
کھانے دانے چنگ چنگیرے چیز نعامت سُچی
برفی خستہ اتے جلیبی پیڑے حلوا لُچی

لفظالی:
اسم اعظم = اللہ تعالیٰ دا اسم ذات جہدے پڑھیاں ہر مشکل حل ہو جاندی اے ، چھپن چھُو= بھول بھلیاں لکن چھپن دیاں اوہ تھانواں جتھوں واپسی تے راہ بھُل جاندا اے، باہی = طرف ، ماڑی = اتلی منزل دا ۔ چوبارہ،چاڑھی = اُساری ، کریگر= کاری گر، دھایا= نس کے گیا ، گردا= احاطہ، جڑت جڑا=ہیرے نگ جڑن دا کم ۔ پچی کاری، عقیق = Cornelian، رُوئے زمین On the surface of Land=، بلور= نظراں دُسر لنگھ جاون والا کرسٹل ، درج ہوئی زردوزے =وِرلاں درجان زردوزی نال بھریاں گیاں سن، لاجورد= اسمانی رنگ دا قیمتی پتھر، آسمانی = رنگ،(Sky Blue)کنی=چھوٹے توں چھوٹا حصہّ جہدے وچ سارے خواص برقرار رہن ، گوہر تابش دار= سیک تے چمک دین والے قیمتی موتی ، ٹِکی = گول موتی جو سورج وانگوں یا چودھویں دے چن وانگوں چمکدے سن،کندھے=باہر لی کندھ۔ فصیل،وستے=چیز تے،