ورقہ 129

2381
برفی دانے خوب مکھانے بادشہانے کھانے
تریہہ پیاسے جاندی پاسے ویکھ پتاسے دانے
2382
ہمرسے تمرسی والے ریوڑیاں خجورے
وڑے کرارے بھٹھے پکوڑے پاپڑ اتے پنجورے
2383
لڈو چاکی قُرص گُلی سی مٹھیائیں ہرجنسی
تھوڑا کھانا بہت سنانا کون نکما گِنسی
2384
امن امان دُکان بھرسے سن نان وایاں حلوائیاں
آدم کول نہ دسداربا کس تلیاں تلوائیاں
2385
گوشت حلوے پھلکے چاول ہور اچار مربے
دالیں ساگ بُھنے تے تڑکے جو چاہئے سولبھے
2386
گری بادام چھوہارے کھوپے ساؤگیاں سن نغزاں
بھرے بزار انار منقے خستہ پستہ مغزاں
2387
ستر رنگ طعام پکے سن پئے ہوئے وچ ہٹاں
بہت نہ ٹھنڈے بہت نہ تتے نرم آہے جیوں پٹاں
2388
کھانے تک جیؤ کرے دھگانے کھالیے من بھانے
مغز چڑھے خوشبو اوہناں دی قوت پئے پرانے
2389
شیشی نال پرُتّی شیشی بھریاں عطر گلابوں
کئیں طرح دے شربت مٹھے ناہیں کمی شرابوں
2390
نرم لطیف گوارے تازے کوئی نہ دسدا بہیا
لگا پیا بزار شزادہ ویکھ تعجب رہیا
2391
آدم زاد نہ کیڑا مکھی کاں نہیں کوئی کتا
خبر نہیں ایہ کیسی حکمت ہووے نہیں کوئی بُتا
2392
کھاناہک نہ دسدا بیہا سبھو تازے تازے
بھرے رکاب کباب نروئے بہتے بے اندازے
2393
کھان پکاون والے ایتھوں کدھر مارے سارے
مت کوئی کھیل جنّاں دی ہووے شاہ دلیل گزارے
2394
کتنی مدت بُھکھیاں گزری ان نہ اکھیں ڈٹھا
اج اس جائی نظری آیا کھانا ہر اک مٹھا
2395
مت کوئی غیبی عالم ہووے مینوں نظر نہ آوے
کھانے نُوں ہتھ پاواں اینویں جانوں مارگواوے
2396
یار نہیں میں اکھیں ڈٹھا رکھاں آس ملن دی
جنگل تے کوہ قاف لتاڑے وانگن کوہ شکن دی
2397
باجھ ملے مرجاواں ایتھے رہگ افسوس گھنیرا
یار سجن نوں خبر نہ ہووے کس کم آون میرا
2398
پھیر کہے دل تکڑا کرکے کے کرے گا کوئی
جے کجھ بھاء میرے وچ لکھی اوڑک ہوسی سوئی
2399
چٹا ٹکا ٹکا ہٹی تے ہک رکاب اٹھایا
طلب موافق پلے پایا ودھدا موڑ ٹکایا

لفظالی:
تریہہ پیاسے= پیاسے دی تریہہ، خجورا= ولاں والی مٹھیائی ۔ اُصل وٹ، ہمرسے = گڑدے اندر سے ، چھوٹے لڈو وانگوں گول، تم ّرسی والے = لذت دی انتہا والے ، لڈو چاکی= پہیے وانگوں گول لڈو، وڑے= بڑے ۔ بھلےّ ، بھٹھے پکوڑے= بینگن دے پکوڑے ، پنجورا= پنجیری والا لڈو، قرص گُلی= گلاب دے پھُل ورگی کھوئے کھنڈ دی ٹکی ، پٹاں = ریشماں، جیوکرے دھگانے = دل زبردستی کھاون تے مجبور کرے ، پرانے = پراناں وچ ۔ جندجان روح وچ ، گوارا = ہضم کرن والی۔ بھکھ لاون والی شے، بُتا= دھوکھا، دلیل = دل وچ آیا خیال، عالم= حالت ۔ دنیا، رہگ= رہے گا، چٹا ٹکا= چاندی دا روپیہ ، گھنیرا = چوکھا، بھاء = بھاگ ، اوڑک = آخر کار،شیشی نال پِرُتی شیشی=عطر دی اِک چھوٹی بوتل دوجی بوتل وے نال ای ڈُھکی کھلوتی اے،