ورقہ 130

2400
کر بسم اللہ چائے لقمہ جو کجھ حد ادب دی
کھالیا جو خواہش آہی حمد گزاری رب دی
2401
ہو معمور بیٹھا شاہزادہ ذرہ خوف نہ کھاندا
اس ہشدھاتی بنگلے سندا بوہا لوڑن جاندا
2402
لوڑ لدھا دروازہ اوڑک سنگل کُنڈی جڑیا
ہتھ اپڑایا اپڑے ناہیں اپراں جائے نہ چڑھیا
2403
قوت پیش نہ جاندی کوئی کرن لگاتدبیراں
جندریاں نوں مار اڈاواں جے چلاواں تیراں
2404
پھیر کہے مت ویکھے کوئی خفا ہووے نقصانوں
تولے فحش تے بولے مندا لگدا خوف جہانوں
2405
اوڑک ایہہ تدبیر بنائی کیتا راس کمانے
اگلے سرے اُتےّ چابدھے تیر دلیر جوانے
2406
اُچی کرکے جندرے تائیں تیروں کنجی پائے
جندرا لاہ لیا شاہزادے برکت اسم خدائے
2407
سنگل کنڈی لاہ شتابی کھول لیا دروازہ
اگوں دھم پئی خوشبوئی روح ہویا خوش تازہ
2408
جُھلی بوء سجن دے والی مِٹھی واء پیاری
جان جثے وچ قوت آئی لتھی سُستی ساری
2409
جیونکر واصبادی لگے دُکھیں گُھٹیاں کلیاں
دے مبارک منہ کھلائے کِھڑ کِھڑ ہسن کھلیاں
2410
تیویں سیف ملوکے تائیں واؤ چِت کھلایا
بسم اللہ کراوس مکانوں پَیر اگیرے پایا
2411
بنگلے وچ اگیرے ہویا نظر چوپھیرے مارے
آدم ذات نہ نظری آوے لُگے محل چُبارے
2412
پھر پھر تھکا آپے یکا کوئی نہ پوندا تکا
نہ گھر والا تے نہ پاہرو نہ کوئی چورا چکا
2413
بیٹھ اڈیکے مت کوئی آوے پھیر تکے ہر پاسے
کدھرے کوئی نہ نظری آوے پیندا جیو چوراسے
2414
بہت اچرج تعجب ہویا آکھے ایہ کے بھانا
ایہہ قلعہ ایہہ بنگلہ ایسا کوئی نہیںوچ تھانا
2415
ِہُنجے کُوچے جاء ٹکانے سُچے مثل کٹورے
سجرے بستر مجلس خانے دِسدے کور نکورے
2416
اوہ کوہ قاف اجاڑاں براں اوہ قلعہ اوہ جائیں
ہک ہکلا ویکھ نہ ڈردا آدم باجھ سرائیں
2417
دل وچ فکر تمیزاں کرکے لوڑے سِرّاس گل دا
ہر ماڑی ہر بنگلہ ویکھے سیر کرے ہر ول دا
2418
تیر کمان ٹکا شہزادے دھروہ پھڑیا ہتھ کھنا
بنگلے اندر بنگلہ جیہڑا اس نوں ویکھن بھنا

لفظالی:
چائے = چُکے ، معمور = مقیم آباد ، ہشدھاتی = ٹ ک 75، مندا بولنا = لعنت ملامت کرنا، سندا = دا ۔ لوڑن = لبھن ، فحش تولنا= پھکڑ تولنا۔ ننگیاں گالیاں دینا، کیتا را س کمانے = کمان نوں سدھاکیتا ، یکا= اکلاّ ، چِت = دل ، تکا= آس بھری نظر ، جیو چوراسے پینا= دل نوں چوراسی پنڈاں دے مسئلیاں دا فکر اندیشہ ہونا، بھانا = خدا نوں منظور واقعہ ، تھانا= حفاظتی چوکی ، ہُنجے = گند کوڑے توں صاف ، کُوچے = میل جنگال توں صاف، دھروہ = کھچ کے ، کھنا= کھنڈا= دوہیں پاسیں تیزدھار والی سِدّھی تلوار، باجھ سرائیں = گھروں بناں ، بھنا= بھج کے گیا، برّاں = تھل ۔ خشکی دے قطعے،لُگے=راکھیوں بِناں۔ سُنجے،