ورقہ 132

2438
رت بہار تیار چمن وچ یار ہوسی سنگ سیناں
میں بھی بولاں جے اج ہوواں چاننیاں وچ ریناں
2439
کونجاں بولن سد غماں دے اسیں نقابل مائیاں
بچے چھوڑ آیاں ہن ایتھے پنجر وچ پھسائیاں
2440
جے اج دیس اپنے وچ ہوئیے اُڈیئے بنھ قطاراں
باغ ارم ول پھیرا پایئے رل کے نال اڈاراں
2441
مورے نوں ہڈکورے لگے اڑاڑ کردا گلاں
باغ ارم دے بوٹے ہوسن گھنے ہوئے جیوں جھلاں
2442
پریاں خوب پشاک لگا سن جے میں اوتھے ہوندا
پائل پاندا من پرچاندا خوشیئیں ہنجوں روندا
2443
کہن لٹورے مولیٰ ٹورے بندیں اسیں بے چارے
اڈن ہارے باغ کنارے خوشیاں دے بنجارے
2444
باغ ارم وچ رونق ہوسی دھوتی دھوڑ غباری
ہر خانے وچ خوب صفائی وہڑے پھری بُہاری
2445
کوئل بول کہے اج ہوندی میں بی کول چمن دے
سبزہ ویکھ ہوندا دل تازہ بول سناندی من دے
2446
ڈاہڈے رب وچھوڑا پایا کدے اسانوں میلے
باغ بہاراں صحبت یاراں کرے نصیب ہر ویلے
2447
خوش آواز پکھیرو بہتے ہور بغیر اُنھاں دے
پنجریاں وچ ٹنگے آہے نہ پُچھ نام تِنھاں دے
2448
آپو اپنی نال ادائے سبھو کرن پکاراں
ربا قیدوں دئیں خلاصی یار ملائیں یاراں
2449
اسیں پرندے وچ ہوائیں اڈن والے ہیساں
آپو اپنیاں رنگاں والے خوب اجالے ہیساں
2450
جتھے بھاوے اوتھے جانا اُچیئےںسُچیئیں جائیں
ایتھوں اٹھنا اوتھے بہنا کرنا سیر ہوائیں
2451
پنجریاں وچ پئے تڑفدے جاء نہیں مُکلیری
پربھجے سرگنجے ہوئے ظالم قید لمیری
2452
کالے تتر کاہلے ہوئے کرن اچیاں فریاداں
سچ سبحان تیری ہے قدرت کرنا قید آزاداں
2453
قید ہویاں چاکریں خلاصی ایہ بی ہے کم تیرا
آپ وچھوڑیں آپ ملائیں تکیہ ہر دم تیرا
2454
پنکھی روح تے پنجرا جثہ بنگلہ دنیا خانہ
باغ بہشت تے روح شاہزادہ یار لقاء یگانہ
2455
پنکھی ویکھ شہزادے تائیں مٹھیاں نال زباناں
سارے بہت خوشی کر بولے پھریا نیک زمانہ
2456
گھلیا رب موکل ساڈے بند اتارن والا
اس بن بندہ ہور نہ آہا دشمن مارن والا

لفظالی:
سیناں = فوجاں ، کڑما چاری تے سوہریاں نال بنے رشتہ دار، نقابل مائیاں = نالائق ماواں ، ریناں= راتاں ، ہڈ کورے = ہٹکورے سسکیاں ، جھل=دریا کنڈھے سنگھنے رُکھاں دابیلا، پائیل = مور دا ناچ ، لٹورا= بھورا کا لا چٹا ماس کھان والا پنکھی ، ٹورے = آزاد کرے، بندیں = قیداں وچ ، بُہاری=بوہکر، اُجالے= اُجلے ۔ سوہنے ۔ نمایاں رنگاں والے ، جا= جگہ، مکلیری= کھُلی ، موکل = اوکھے تے ناممکن کم کرن دی طاقت رکھن والا جن دیو۔ فرشتہ ، تکیہ = آسرا ، لقا یگانہ= خدا دا دیدار(خدانے بہشت وچ اپنا دیدار کران دا وعدہ کیتا ہو یا اے )، بند= ہتھکڑی۔ بیڑی ۔ جکڑ بند، کاہلے = بے چین ۔ مضطرب، سر گنجے ہوئے= پنجریوں باہر نکلن دے جتن وچ سر کئی وار تیلیاں وچ پھسدا اے تے سردے وال لتھ جاندے نیں ،