ورقہ 134

2476
ہر شیرے دی ڈولے بدھے کاریگر دے ڈولے
چوکی تے تعویذ جواہر ہیرے دے سن ڈھولے
2477
کناں اندر والے سُچے سُچے موتیں والے
وینی نال سنہری کنگن دُنب مرصع نالے
2478
تخت اتے کوئی ستا ہویا چادر چٹی تانی
سر پیراں تک کِتوں نہ ننگا پر دسدا کوئی ہانی
2479
عاشق دی تک ہور دلیری کردا کے جند بازی
ایسی جائے خوف نہ کھاندا کر دا دست درازی
2480
دست درازی کے میں آکھی چادر پلا چائیوس
مت کوئی غیر دلیل لیاؤ دیہی ہتھ نہ لائیوس

دیو دی قیدے پئی سراندیپ دے شاہ دی دھی ملکہ خاتون دا روپ جَس

2481
چا پلا شاہزادے ڈٹھا صورت نظری آئی
دریتیم ان بدھا موتی لعلوں جوت سوائی
2482
مست بیہوش سُتّی ہک لڑکی صورت دی شہزادی
حسن کمال جمال اوہدے دی حدوں گل زیادی
2483
سورج وانگ نورانی متھا نظر نہ کیتی جاوے
جے پتھر دل والا تکے اکھیں پانی آوے
2484
قوس قزح بھر وٹے دوئے جیوں عیدے چن چڑھدا
صبر صوفی دا روزے داراں تک روزہ بھن کھڑدا
2485
یا دو طاق بہشتی آہے کستوری رنگ پھبدے
یاخمدار کمان ابنوسی یا دو نُون عرب دے
2486
ہر ہر پمن وال اجیہا سوہنا سِرّ حقانی
ویکھن سات کلیجہ سلّے جیوں ترکش دی کانی
2487
زلفاں ناگ چنن سنگ لٹکے ول ول کنڈل مارے
یا زبخیر دلاں دے آہے یا کمند ہتیارے
2488
اکھیں تیز کٹار فولادی آہیاں وچ میاناں
سرخ میان بناتی ملیا سیون وچ نشانہ
2489
نک انگشت نبی اللہ دی تیز چُھری تلواروں
اسماناں ول کرے اشارت معجزیاں دے پاروں
2490
چن دوکھن دو نویں رخسارے بِندی نال سنگارے
بِندی بندی پھبدی آہی وانگ زحل ستارے
2491
سُوہے اوٹھ یا قوت کھرے تھیں کاریگر سنوارے
دندلباں وچ کجے آہے وچ شفق جیوں تارے
2492
ٹھوڈی سیو باغ بہشتوں سوہا رنگ عنابوں
گاٹا وانگ صراحی کچ دی جیونکر بھری شرابوں

لفظالی:
ڈولے = ڈول نے ، ڈول = ڈیزائن ۔ مڈھلی ساخت، ڈولے= بازو دا موڈھے تے کہنی دا وچلا حصہ، کاریگر دے ڈولے بنھنا= کاریگر دا بانہہ بل ختم کر کے اوہنوں عاجز کر دینا، چوکی= گل دی زنجیری وچ لمکن والا مربع شکل دا گہنا، ڈھولے= ڈولے نال بدھی و دھرتے لگیا ڈھول دی شکل دا گہنا، والے=باے ۔ گول رنگ، دنب مرصع = شیراں دی دُم اُتے ہیرے موتی جڑے ہوئے سن ، ہانی = جوڑدا۔ برابر دا ۔ہم عمر، در یتیم= نویکلا نادر موتی، جند بازی= جان تے کھیڈ جانا،غیر دلیل = کام بھریا بُرا خیال ، ان بدھا موتی= جس موتی وچ پروون لئی موری نہ کیتی گئی ہووے کنواری کنیا، جوت = لعل دا چانن ۔ لاٹ، انگشت نبی اللہ دی= انگلی جس دے اشارے نال چن دوکھن ہو گیا سی ، بندی = سجدی ، چن دوکھن= دورخسار انج نیں جویں چن دے دو ٹوٹے ، بِندی= تِل ، زُحل = یونانی زبان وچ زحل دا مطلب چمکدار درخشاں اے، بناتی میان= بنات دے کپڑے دا کمر بند، سیون = جوڑ دی سلائی۔ ہتیارے=ظالم۔ہتیا کرن والے،