ورقہ 135

2493
سینہ تختی صاف چنن دی خوب کریگر جڑ کے
اوس اُتے پستان لگائے چاندی دے پُھل گھڑکے
2494
میٹے وات ایویں سی جِیویں سرخ اناراں کلیاں
گھڑتل ڈبل روپئے والی صاف ہتھاں دیاں تلیاں
2495
تلی چٹی سی لوح رُپے دی انگلیاں سَن قلماں
شنگرف منہ بھرے نونہہ سُوہے لِکھ عشق دا کلمہ
2496
پتلا لک مُٹھی وچ آوے الاّ مکھن دیہی
گندے پانی تھیں رب سرجی صورت پاک اجیہی
2497
روپ انوپ کُڑی دا آہا وانگ بہار چمن دی
نویں جوانی حسن ارزانی نازک شاخ سمن دی
2498
قد سفیدا سرو رنگیلا یا شمشاد گلستاں
وقت بہار شگوفے وانگن منہ کڈھے سن پستاں
2499
سنبل وال زنجیری بدھے چہرہ پُھل گلابی
نرگس مست انبے دی پھاڑی اکھیں مِرگ شرابی
2500
لالی ویکھ پیشانی والی داغ لگے گُل لالے
دند چٹے سن چنبے کلیاں موتیں کھرے اجالے
2501
ٹھوڈی وانگ خُبانی سوہے بِہی رس بھری سی
پتلا اُچا قد رنگیلا نازک شاخ ہری سی
2502
جادوگر دونین کُڑی دے وچ کجلے دی دھاری
صوفی دیکھ ہوون مستانے چھڈن شب بیداری
2503
جیوں چاندی دی مچھلی ہوندی تیویں نک اُچیرا
چہرے سورج چشمے اندر ہر دم رکھے ڈیرا
2504
کالی رات ہووے رُشنائی جے اوہ جلوہ ڈالے
اکھ کالی ظلمات خضر دی آب حیات پیالے
2505
زلفاں دے خوشبوئی ہُلے تازے کرن دماغاں
آدم ویکھ مرن جیوں مردے ویکھ پتنگ چراغاں
2506
حسن اوہدے دی پُھلاں کھاری باغ ارم وچ وکدی
حور پری جو صورت سوہنی ہر کوئی اسنوں سِکدی
2507
باہاں سُچی چاندی لوہڑے اُستاکار بنایاں
باہولیاں دو باسنیاں سن دولت نال بھرایاں
2508
گل داودی مُہندے وانگر کوچاں نویں انگوری
یا اوہ آب حباب حسابی آہے عین کافوری
2509
جے باغاں وچ واؤ فجر دی لوڑ کرے سے برساں
ایسا سندر پھل نہ لبھے میں کے صفتاں کرساں
2510
نیسانی کافور دنداں ول ویکھ بہوں شرماوے
غبغب صاف سیودی پھاڑی ٹھوڈی ہیٹھ سُہاوے
2511
چاندی وانگر رنگ جثے دا اوٹھ مٹھے کھنڈ مصری
مصری سوہنی اس ول تک کے حسن مصر دا وسری

لفظالی:
چنن = صندل دی خوشبودار لکڑ، میٹے وات=لب بند کرے ، رُپاّ = چاندی ، گھڑتل = گھڑائی، سُوہے= لال سُرخ ، شتگرف= گندھک تے پارے دا مرکب، نیسانی کافور= ابر نیساں نال بنیا، سپی اندر چٹے رنگ دا گوہر، ڈبل روپیہ= دو تولے چاندی دا سکہ، الا= نرم نازک ، گلستان دا شمشاد= سارے معشوقاں وچوں لماّ تے سوہنا معشوق ، عشق دا کلمہ = عشق دا لفظ ۔ ہتھ نال عشق دا لفظ لکھن مگروں لال سُرخ نہواں دا منہ شنگرف نال بھریا گیا ۔ نہوں قدرتی طور تے سُرخ ہو گئے ۔ شنگرف سُرخ خون پیدا کرن واسطے کھادا جاندا اے، مِرگ شرابی= نشیئ ہرن، بہی = اک پھل ، خضر دی ظلمات = آب حیات دے رستے وچ کالے انھیرے ،لوہڑے = کپاہ دے ویلنے دی لکڑ دے رولر جو نرم تے گداز ہوندے نیں پر ایہہ لوہڑے سچی چاندی دے سن ، باہولیاں=چولے دیاں بانہاں ، باسنیاں= بانسلیاں اشرفیاںپاون والیاں تھلیاں جولک دوالے بنھیاں جاندیاں سن،غبغب= ٹھوڈی تھلے لمکیا ہویا ماس جوحسیناں دی نشانی اے، اوٹھ= ہوٹھ، مصری سوہنی= زلیخا، وِسری= بھُل گئی،