ورقہ 136

2512
پریوں سوہنی تے من موہنی جوبن دے رنگ رتی
شکل نہایت عقل بغایت جادوگر اکھ متی
2513
دل آمیزی عشق انگیزی آن ادا بھری سی
نازک انگ تے رنگ گلابی سینہ سنگ پری سی
2514
شیریں شکر شکل شمائل لیلیٰ ہیر ملاحت
عذرا بدر منیر زلیخا ویکھ ہووے دل راحت
2515
تازہ روپ آوازہ مِٹھا نجم نساء رسیلی
سیف ملوک بدیع جمالے میلے بَن وسیلی
2516
تیز زبان یونانی شاعر صفت اوہدی دے وارے
گنگے ہوندے بول نہ سکدے خوبی بے شمارے
2517
چست طبیعت ہندوستانی فردوسی دی ثانی
ناز کرشمہ ساز جوانی لِکھن نہ آسانی
2518
مانی تے ارژنگ سیانے کسباں دی تدبیروں
اس صورت دے نقش نگاروں عاری سن تصویروں
2519
ایسی سندر صورت لڑکی حور بہشتی نالوں
تخت اتے بے ہوش ستی سی خالی سرت سنبھالوں
2520
سیف ملوکے نیڑے جاکے نال کنے منہ لاکے
بہت بلندآوازہ کیتا کسے طرح ایہہ جاگے
2521
گنبد وچ آواز اوہدے دا پیا گُنگھارا رولے
اس لڑکی نوں خبر نہ ہوئی نہ کجھ ہلے بولے
2522
ایسے ڈولے سیف ملوکے مارے ستر آلے
نہ اکھ پٹی نہ اوہ ہلی نہ کجھ سرت سنبھالے
2523
سیف ملوکے عقل دوڑایا ایڈی نیند نہ کسے
نہ ایہ زندی نہ ایہ موئی جادو ماری دسے
2524
سوہنی صورت ویکھ کسے نوں لگا عشق کُڑی دا
اس شہدے غم دھایا ہوسی قسمت سخت جُڑی دا
2525
اس عاشق دے کہے نہ لگی تاں اس جادو پائے
ایہو سِرّ عقل وچ آوے اس نوں کون جگائے
2526
شاہزادہ اٹھ لوڑن لگاتختے دے چوگردے
سجے کھبے لوڑ پواندی ہیٹھ تکے پھر سردے
2527
سر ہیٹھوں ہک تختی لدھی چاندی دی جیوں برفاں
اوس اُتے کجھ لکھیا ہویا سبز سیاہی حرفاں
2528
جے کجھ اس تے لکھیا آہا بولی سی سُریانی
خوشخط سی حرفایت ساری لکھی قلم یونانی
2529
شاہزادہ ہر علموں واقف طاق آہا ہروسبوں
منتر جادو سحر کڈھن دے تکڑاسی اس کسبوں
2530
تختی کڈھ لئی سر ہیٹھوں باہر گھروں لیایا
دُور ٹکا پھر آپوں مڑکے کول کڑی دے آیا

لفظالی:
رتی= رنگی ہوئی ، نہایت = انتہاء دی ، بغایت= شروع کرن دا پہلا سرا۔ معصومیت دا سرا، متی= مدھ بھری، شیریں = ایرانی بادشاہ خسرو پرویز دی پہلی ملکہ دا ناں ، شکر= شیریں دی سوکن اصفہانی گلوکارہ ، شمائل = جمع' شِمال دی، دل دماغ دے چنگے گُن، ملاحت= سانولے سلونے پن دا رُوپ ، وسیلی = وچولی، فردوسی= شاہنامے دا ایرانی شاعر ، سنبھالوں= آگاہی توں ، دھانا= دھائی کر کے آونا، ڈولے = ترکیب نال ، حرفایئت= لکھائی ۔ سکرپٹ، سُریانی۔۔۔۔۔۔=قدیم زبان The Syriac language ، گنگھارا= گونج ۔ شور ، مانی = ایران دا مشہور نقاش، ارژنگ= ٹ ک تفصیلاں ، عاری=نقش نگاروں بناں سادہ تے معمولی کسے فن گُن دے بغیر ، آلے = اُچی آواز دے سَد،سِر= خیال،