ورقہ 17

286
قصے تے اخبار حکایت جیہڑے بادشہانے
کردا سیر کتاباں اندر سُندا سخن یگانے
287
مجمع الحکایا آہی ہک کتاب وڈیری
ہک دن سیر اوسے دا کر دے رغبت نال گھنیری
288
پڑھدے پڑھدے گئے اگیرے ُسندی کول کچہری
ہے ہک باغ ارم دا کدھرے شارستان سُنہری
289
روئے زمیں تے دیس عجائب ہور نہیں اس جیہا
پریاں دا اوہ ملک قدیمی آدم کدی نہ رہیا
290
شاہ شاہپال اوتھے کوئی ہویا افسر بادشہاں دا
نبی سلیماں جیو دی جائے رہیا راج کماندا
291
اس گھر اندر بیٹی ہوئی جوبن دے رنگ رنگی
جے لکھ صفت زبانی کہیے پھر بھی اس تھیں چنگی
292
یوسف ثانی روئے زمیں تے اس بِن کوئی نہ ہویا
صورت ویکھ نہ چلدا پانی رہندا وہن کھلویا
293
روپ اوہدے پر عاشق ہویا ہک سلطان مصر دا
راج حکومت چھوڑ ملک دی چایوُس پندھ سفر دا
294
رنج مصیبت دُکھ قضیے جھاگ بلا قہاری
اوڑک ونج سجن نوں ملیا ہوئی دوہاں دی یاری
295
سیف ملوک اوہدا سی نانواں شاہ عاصم دا جایا
لے کے نال پری نوں آیا تاں مڑ راج کمایا
296
جاں محمود سنی گل اتنی شوق اندر وچ دھانا
کیویں سبھ حقیقت سُنیئے جیوں جیوں حال وہانا
297
ایسا شوق پیا دل شاہے بھل گیاں سبھ کاراں
اٹھے پہر ایہو دل خواہش ذکر ایہو وچ یاراں
298
میر وزیر امراء بُلائے شاعر عالم فاضل
سبھناں نوں فرمایا شاہے سنیو ہر ہر عاقل
299
یارو سیف ملوک جنے دا قصّہ عجب نیارا
اوّل تھیں لے آخر توڑی آکھ سناؤ سارا
300
جاں جاں ایہہ کہانی مینوں ساری نظر نہ آوے
دِقّ طبع دل تنگ رہے گا جان ارام نہ پاوے
301
جو کجھ اوس جنے پر گزری راحت رنج مصیبت
جمن مرن اوہدے تک ساری دسو کھول حقیقت
302
ہچھی طرح اندیشہ پائیوس میر وزیر دیواناں
جے ایہہ بات سناؤ ناہیں ہوساں مست دیوانہ
303
ایس کہانی دا دل اندر لگا عشق اساں نوں
جلدی پیدا کرو کداہوں کیتا حکم تساں نوں
304
دِق ہوئے سبھ عالم فاضل شاعر بند زبانوں
لگی چُپ امیراں تائیں فکر پیا دل جانوں

لفظالی:
اخبار = تاریخ۔ روایت ۔مجمع الحکایات = وزن قائم رکھن لئی ت نہ پڑھی جاوے۔ (حکائت دی عربی جمع حِکایا) (ایس ناں دی کتاب کسے کیٹلاگ وچوںنہیں لبھی ۔ عام گویڑ اے پئی ایس توں مراد الف لیلہ اے) ۔راج کمانا = معیاری حکومت دے سارے تقاضے پورے کرنا ۔ویہن = چلدا پانی ۔ جھاگ = جھل کے جال کے ۔دھانا=دھایا ۔ چھیتی نال اندر وڑ گیا ۔،وہانا = وہایا ۔ بیتیا ۔دق طبع = طبیعت دی تنگی ۔اندیشہ پائیوس = اوہنے فکر پادتا ۔ کداہوں = کدھرے کسے تھاں توں ۔ جاں جاں = جدوں تائیں ۔چُپ لگنا = ڈوہنگھی سوچ تے حےرانی پاروں خاموش ہوجانا۔ یگانے= منفرد، افسر=تاج