ورقہ 138

2550
رب سہایا کٹھا کر کے دُکھ اسانوں جگ دا
مدت گزری سِک سِکیندیاں آدم منہ نہ لگدا
2551
آہیں ڈھاہیں رجن ناہیں باہیں دین کلاوے
رتوں نیر دوہاں مُکھ دھوتے رورو ہوئے پھاوے
2552
لڑکی آکھے گھول گھمائی جس رستے توں آیا
میں تتی دے طالع جاگے مولیٰ وِیر ملایا
2553
کتھوں میں اس دولت جوگی خبر نہیں کے ہوسی
ایس خوشی دے بدلے سانوں کیڈی اوکڑ پوسی
2554
شاہزادہ کرہائے ہائے رنا گھت کہانواں
کہندا ہک ہک وال تیرے توں میں قربانے جاواں
2555
کوہ قافاں وچ مدت گزری جنگل باریں بھالے
کئی سمندر ٹاپو گاہے ڈٹھے شہر ُاجالے
2556
باغ بہاراں پھل ہزاراں باس لئی ہر پاسے
کِتوں نہ آئی بو سجن دی عمر گزاری آسے
2557
صورت تیری وچوں آئی مینوں بو سجن دی
تیر جیہی تاثیر کلیجے تیرے راست سخن دی
2558
جھلے جند نمانی میری قہر نزول ہزاراں
بھل گئے سبھ تینوں ملیاں دم دم شکر گزاراں
2559
دتا درد اُبال دوہاں نوں پکڑے سنگھ سنگھٹاں
ہڈکورے دم تُرن نہ دیندے یادپیاں سبھ سٹاں
2560
آپو اپنے دکھاں رونون کُس کُسے بھی روندے
ربّا اسیں بے چارے کدھرے سنگ اپنے وچ ہوندے
2561
سیف ملوک اس کارن رووے شاہزادی کوئی ہوسی
سیاں دے وچ ہسدی رسدی قید ہوئی بے دوسی
2562
ایسی سندر صورت لڑکی جادو مار سوالی
اس بن ماپے بھیناں بھائیاں ہوگ پیا گھر خالی
2563
جس شاخوں ایہ پھل تُرٹا شاخ ہوسی اوہ سکی
جِس باغوں ایہ سروپٹایا رونق اس دی مکی
2564
جس لڑیوں ایہ موتیں کِریا ہوگ لڑی اوہ ترٹی
رنگ بے رنگ ہووے گا پیلا نرد جوڑی جس پُھٹی
2565
ہن اس بندوں کیونکر چُھٹے پھیرملے سنگ سنگاں
پوئے دوئے پنجے چھکے قید کیتے بد رنگاں
2566
کون لئے ہن ساراں ایتھے پیش نہیں ہتھیاراں
شہ آوے کوئی واہ نہ لبھدا داء منے پرچاراں
2567
سخت مہیم غنیم سرے تے ہک یتیم ہکلے
رب رحیم کریم چھڈائے قید قدیم اولے
2568
کر اندیشے روئی لڑکی سیف ملوکے تائیں
ایہ جوان رنگیلا ربا آندوئی وچ بلائیں

لفظالی:
سہایا = برداشت کرایا، سِک سکیندیاں= بے چینی نال اڈیکدیاں، باہیںدین کلاوے= گلو کڑی پاکے ملن ، پھاوے = تھکے ہوئے بولنوں وی رہے ہوئے ، تتی = بدنصیب ، اوکڑ =مشکل ،کہانواں گھننا= کہرام مچانا، اینا رونا کہ گھر گھر کہانیاں پے جاون ۔، قہر نزول= ربوں اتریا غضب تے قہر، سنگھٹاں دا سنگھ پکڑنا = غم دی شدت نال گل وچ کُجھ پھس جاون دا احساس ، سنگ = ساتھیاں دی صحبت، کُس کُسے= اک دوجے دے ،رنگ بے رنگ ہونا=رنگ فق ہونا، بند = قید،پیلا = فیلا۔ شطرنج دا اک مہرہ ، نرد جوڑی = پیلاتے فیل بند دی جوڑی اک دوجے لئی معاون ہوندی اے، سوالی = سُواں دِتی، پھُٹی = ٹٹ گئی ۔ وکھری ہو گئی، پوے = اک دانہ ، سار آونا= خیر خبر آونا۔۔۔۔۔۔،شہ آونا= شطرنج وچ بادشاہ دا گِھر جانا تے اگلی چال وچ اوہدے مرن دا یقین ہو جانا۔۔۔۔۔۔۔ سنگاں نوں سنگ ملنا= کسے جنس دا اپنے ہم جنس نوں مِلنا ، دامنے پرچاراں= مہرے دی چال اپنے من وچ ای چل رہیا آں۔ ،مہیم=ڈراونا ۔ خطرناک(جویں منیب توں منیم انج ای مہیب تومہیم اے،