ورقہ 143

2645
میں سلام نہ جھلیا اگوں رہیوس چپ چُپاتی
کہن لگا اے دلبر لڑکی توں ہیں میں پچھاتی
2646
مینوں بھی ہے تدھ پچھاتا کون کوئی میں بندہ
کیہڑے دیس ملک دا راجہ کیہڑے شہر وسندا
2647
میں اگوں پھر بولی رُکھی میں کے جاناں تینوں
نہ ڈٹھوں نہ بھاکھیوں اگے نہ ہُن بھاویں مینوں
2648
اوس جوانے ایہ گل سن کے چھوہی پھیر کہانی
کہندا مینوں نہ کر خفگی سن گل بی بی رانی
2649
نیچ جوان نہیں کوئی میں بھی قلزم دا شاہزادہ
باپ میرے دا باپ تیرے تھیں راج اقبال زیادہ
2650
نِکی سیں تدصورت تیری مینوں نظری آئی
ڈیناں وانگن ظالم نیناں سانگ کلیجے لائی
2651
بادشاہی دا ذوق نہ رہیا شوق تیرے دل پھڑیا
عیش خوشی دا رہیا نہ چیتا لوڑے تیری چڑھیا
2652
مدت ست برس میں ہوئے طلب کمال تیری وچ
رات دہاں چھوہ بہندا رہیا خواہش بھال تیری وچ
2653
کھاون لاون کجھ نہ سُجھا نہ نیندر بھر سُتّا
چھت پرت بتیرے کیتے مت کوئی چلے بُتّا
2654
کتنی وار وٹائی کایاں ظالم عشق اکایاں
زہر پیا غم صبر نہ رہیا تدھ تے چِت وکایاں
2655
تینوں پکڑ لیاون کارن کیتے جتن بتیرے
ستاں برساں وچ نہ لگادا میرا سنگ تیرے
2656
ترلے ہاڑے بہتے کیتے پیش نہ گئی آکوئی
توں معصوم نابالغ رکھیں پاکی سر منہ دھوئی
2657
میں بھی دیوتیاں وچ آہا سپہ سالار کہاندا
نال تیرے کجھ زور نہ چلیا اک گیوس غم کھاندا
2658
دیواں تائیں قوت بہتی کتنے آسن کردے
پل وچ ودھدے پل وچ گھٹدے چھپن وچ نظر دے
2659
ہوروں ہور بناون صورت بن سکدے کئی چیزاں
کدے ڈراون ویری دِسدے کدے مثال عزیزاں
2660
آدم ہے کے چیز بے چارہ نال اوہناں دے پوٹے
جھٹ اندر چا کھڑ دے ایویں اِل کھڑے جیوں بوٹے
2661
پر ہک لیکھے آدم ڈاہڈا پتہ تسانوں دیواں
ظاہر باطن پاکی ہووے پیش نہیں پِھر دیواں
2662
ظاہر پاکی جُثے جامے جے بندے نوں ہووے
ظاہر دے جن بھوت نہ پوہندے جتھے جاکھلووے
2663
باطن پاک ہووے جس نیت اندر وچ صفائی
ویری دیو ابلیس لعینے پیش نہ جاندی کائی

لفظالی:

سلام جھلنا= سلام قبول کرنا ، رُکھی = مٹھاس تے پروا دے بغیر، خفگی = گھٹن ۔ غم غُصےّ دی حالت، سانگ= وگاہتا، مارن والا نیزہJavelin،نہ بھاکھیوں اگے= میں پہلاں تیرے نال گل بات نہیں کیتی، لوڑے= تلاش وچ، لاون = لباس دی سجاوٹ ، چھت پرت کرنا= کامیابی لئی پورے جتن کرنا ۔اُتے تھلے ادل بدل کے لوڑنا ۔ جانچ پڑتال، بُتا= حیلہ ۔ فریب، کایاں= جسمانی صورت۔ جون،چِت وکایاں= دل ویچیاں ، سنگ = نال، آسن = یوگاورزش دے طریقے ، پوٹا = ہاضمے دی تھیلی، حوصلہ۔ جھلن دی طاقت، بوٹے= بوٹ نوں ، نہ پوہندے= اثرنہیں کردے، لعینے= لعین دی ،پیش نہ جانا= مقابلہ نہ کر سکنا،