ورقہ 144

2664
ایہناں گلاں اندر وڑیاں قصہ ہے ٹُٹ جاندا
سدھی صاف محمدبخشا چلیں بات سناندا
2665
ملکہ خاتون گل سناندی سیف ملوکے اگے
اوس دیوے پھر مینوں کیہا واہ میری کدلگے
2666
جاں جاں جثہ جامہ تیرا پاک آہا ہر میلوں
میرا زور نہ ٹریا کوئی بچیئں اوس طفیلوں
2667
جس ویلے ہن بالغ ہویئیںآئی حیض پلیتی
داء لگا تد چاء لیائیوس آس پوری رب کیتی
2668
خاطر جمع تسلی کرتوں خطرہ رکھ نہ جھورا
ماں پیو بھیناں بھائیاں والی حرص نہ رکھیں بھورا
2669
توں معشوق میری میں عاشق اس تھیں کون چنگیرا
شہر ولایت اُتے کرساں راج حکم سبھ تیرا
2670
دشمن تیرے گھائل ہوسن خوشیاں عیشاں تینوں
ہور کسے دی چاہ نہ رکھیں جان پیارا مینوں
2671
جوڑی جُڑی کُڑی تے لوہڑا یاری کیتی بھاگاں
میں راجا توں رانی ہوسیں وسسیں سنگ سُہاگاں
2672
چاء نہ رکھیں دیس وطن دا ایہو وطن بنائیں
ووہٹی جدوں ویاہی جاندی روندی پا کہائیں
2673
بنّے نال بنے جد الفت پیکے یاد نہ رہندے
دوئے جی اکٹھے ہوون خوشیاں کر کر بہندے
2674
ماپے بھائی بھیناں سیاں نہ ہن مُکھ وکھاون
اوہ نہیں آسکدے ایتھے نہ ہے تیرا جاون
2675
ایہ ولایت پریاں والی دیوتیاں دے خانے
آدمیاں دا آون ایتھے ناہیں کسے بہانے
2676
اصلوں آدم ذات اس جائی نہ آیا نہ آسی
ہک آدم دا خطرہ مینوں مت اوہ پھیرا پاسی
2677
خوب جوان بہادر سوہنا ہوگ شہزادہ کوئی
لمی بہت کہانی اس دی ترت بیان نہ ہوئی
2678
مینوں بھی ہے خوف گھنیرا اوس دلیر جوانوں
علم کلاماں وچوں ایہو آہی خبر اسانوں
2679
جاں ایہ گلاں دیوے دسیاں تاں میں بہتی رُنی
ہائے ہائے ربا بھیناں نالوں رہساں کویں وچُھنی
2680
ماپے پئے سیاپے کرسن کے جاپے کے ہوسی
بھیناں ویناں کرکر مرسن ویر پیا نت روسی
2681
سیاں جس دن بھوہرے پیاں جدوں پِڑی وچ گیاں
کرسن یاد صواد نہ رہسی ہنجوں روسن پیاں
2682
ایہو درد میرے دل آئے رو رو کُوکاں ماراں
ماپے بھیناں بھائی باجھوں نہ میں جھٹ گزاراں

لفظالی:

واہ= وس، طفیلوں = ذریعے نال ، چالیایوس= میں چُک لیایاہاں ، حرص= محبت ، بھورا= ذرہ وی، حکم = عدالتی نظام ، جان = سمجھ۔ ، لوہڑا= لاڑا۔ دولہا، سنگ سُہاگاں = چنگے بھاگاں نال ، کہائیں گھتنا= کہرام مچانا، بناّ = لاڑا، ہوگ= ہووے گا، تُرت= چھیتی ، علم کلاماں = روحانی علم، وچُھنیّ=وچھڑی، ویناں = وین ، پِڑی= پنڈوں باہر کوئی رڑا میدان جتھے چاننی رات وچ کھیڈن دا رواج سی،بھوہرے= تہ خانے وچ پردے والے مکان وچ،جُثہ جامہ=مریر تے کپڑے،صواد=صاد۔ صحیح۔جائز،