ورقہ 145

2683
اوہناں باجھوں صبر نہ مینوں نہ توں دل نوں بھاویں
بھانویں رِنج میرے پر ہوکے جانوں مارگواویں
2684
جاں ایہ گل سنی اس دیوے چڑھیوس غضب ہنیری
اس تختی تے جادو کرکے قید کیتی جند میری
2685
مُردے وانگ اس تختے اُتے پئی رہاں ہر ویلے
بوہے اُتّے رہن کھلوتے پاہرو شیر مریلے
2686
اوہو دیو مہینے پچھوں پھیر میرے ول آوے
تختی کڈھ لئے سر ہیٹھوں ہوش میرے تن پاوے
2687
کھانے دانے چنگ چنگیرے رنگ برنگی چیزاں
حاضر آن کریندا اگے پُچھدا وانگ عزیزاں
2688
کتنی مدت ہے تدھ سُتیاں کتنے روز لنگھائے
میں کہندی ہک ساعت گزری اوہ پھر ہاسا پائے
2689
کہندا مینوں ستیاں تینوں ہویا ہک مہینہ
تیرے بھانے ساعت گزری سن توں یار نگینہ
2690
میں اگے پھر کھانے دھر دا خوب طرح دے پکے
جتنی طلب ہووے میں کھاواں خوش ہوندا اوہ تکے
2691
جاں پھر مینوں تازی تکے کرکر منت زاری
کہندا مینوں ہے معشوقا! نال میرے کر یاری
2692
اوہ گل اُس دی یاری والی موہرا لگدی مینوں
سدھے منہ نہ بولاں کہندی بھس سر پاواں تینوں
2693
پھیر میرے تے غصے ہوکے جادو پاء سُنوالے
تختی وچ ہنر کجھ کرکے ہوش سنبھالا ٹالے
2694
آپوں جاندا پا مہینہ پھیرا اِت ول مارے
ایسے ڈولے قیدے اندر میں دس برس گزارے
2695
ملکہ خاتوں دی گل ساری سیف ملوک شہزادہ
سُن حیران تعجب ہویا کردا فکر زیادہ
2696
ہک تھیں ہک چڑھندی ڈاہڈی مشکل میں سر آوے
ایہ قلعہ اوہ دیو مریلے کیویں رب بچاوے
2697
جاء نہ اپنے چھپن جوگی کت ول چھپاں نساں
دیوے نے ہن جان نہ دینا مارگ دے دے کسّاں
2698
اپنی گل رہی اک پاسے خیر جیویں کجھ ہوسی
پر ایہہ لڑکی قیدے اندر پئی ہمیشہ روسی
2699
ملکہ خاتون نوں چھڈنسن ہے نمردی خاصی
یامیں بی مرجاساں ایتھے یا اس ہوگ خلاصی
2700
ایہ بھی آدم میں بھی آدم نالے ویر بلائیوس
رب سبب بنایا کائی تاں اس جائی آئیوس
2701
دیوے نال لڑائی کریئے جس دیوے تِس اللہ
ہمت اندر فرق نہ رکھیے آپ کرے مت بھلا

لفظالی:
رِنج = ناراض ، چڑھیوس = اوہنوں چڑھی، پاہرو= چوکیدار، ساعت= گھڑی، بھانے = خیال وچ ، تازی = خوش ۔ بے غم ، مؤہرا= زہر ، بھس=کھیہ۔بُھبل ، ہنر= جادو ۔ دھوکھا، سنبھالا= شعور ۔ پا مہینہ = مہینے مگروں ، ڈولے = طور طریقہ ۔ منصوبہ، چڑھندی= ودھی ہوئی ۔ اُچیری ، مارگ= مارے گا، کسّاں= (١) کھچا۔ تنین(٢) بخار۔ تاپ، ہوگ= ہووے گی، ویر بلائیوس= اوہنے مینوں بھرا آکھیا اے، جائی آئیوس= اوہ ایتھے آیا اے، مت =شائد، بھلاّ= کوئی چنگی صورت ۔ بھلا، جس دیوے تس اللہ = پھر اللہ جنہوں فتح دیوے،ہوش سنبھالا ٹالے=بے ہوش کر دیوے،