ورقہ 149

2759
نعرے مار رُنّا شاہزادہ کرکے ہائے ہائے
ہوش سنبھال چلے ہو راہی نین ونجن جھٹلائے
2760
عین شراب بیہوشی والا لگا پین پیالا
پھیر طبیعت جائی رکھیوس کرکے بہت سنبھالا
2761
ملکہ خاتوں نے جد ڈٹھا شاہزادے دا رُولا
مار اوساس لگی فرماون سن بھائی مقبولا
2762
قسم کراں میں رب سچے دی جس بِن رب نہ دوجا
اوسے دی سبھ زُہد عبادت اوسے دی سبھ پوجا
2763
جے میں گھر پیو دے ہوندی سر اندیپ شہر وچ
نال بدیع جمال پری دے تدھ ملاندی گھر وچ
2764
پر ہن کجھ نہ چارہ چلدا کے وس لاواں بندی
تیری بید ہوواں جے چُھٹاں قید میرے تن مندی
2765
دکھ قضیے تیرے سُن کے برم لگا دل میرے
مرنے تیک نہ جاسن مینوں ایہ افسوس گھنیرے
2766
قید اپنی دا غم نہ رہیا برم لگا ایہہ بھارا
جے توں گھر وچ ملدوں مینوں دسدی یار پیارا
2767
میں ہن قید ہوئی وچ ٹاپو محکم کوٹ چوپھیرے
ڈاہڈی بند خلاص نہ ہوندی جے چلاں سنگ تیرے
2768
ملکہ دی گل سن شاہزادہ ہوکے مثل یتیماں
اٹھ کھلوتا تختے اتوں کرن لگا تعظیماں
2769
ملکہ اتوں ہتھ گھمائے صدقے ہو ہو جائے
چم زمین سلاماں کردا مڑ مڑ سیس نوائے
2770
جس رستے توں آئی ملکہ میں صدقے اس راہوں
جس موہوں ایہ گل الائی جندواری اس ساہوں
2771
جیہناں اکھیں دلبر ڈٹھا اوہ اکھیں تک لیاں
توں مِلیئیں تاں ساجن ملیا ہن آساں لگ پیاں
2772
ملکہ ول ہتھ بنھ کھلوندا روندا نیواں ہوندا
اکھیں پانی ڈل ڈل کردا ہنجوں ہار پروندا
2773
صبر قرار آرام نہ رہیا بہت ہویا دل تتا
ملکہ اگے منت کردا دس بھینو کوئی پتا
2774
ملکہ خاتوں کہندی ویرا بیٹھ تحمل کرکے
خوب طرح متوجہ ہوویں کن میرے ول دھرکے
2775
یار بدیع جمال پری دی دساں کھول کہانی
پکا پتہ نشانی دیواں اگوں رب ملانی
2776
سیف ملوک نچلا بیٹھا کن دلے دے دھرکے
سر دھڑ جُثہ جامہ رکھیا ملکہ ول کن کرکے
2777
ملکہ خاتوں گل پری دی آن شروع پھر کیتی
خوش آواز فصیح زبانوں نالے دُکھاں سِیتی

لفظالی:
سنبھال= شعور۔ سنبھالا۔ احتیاط ۔ قابو، نین جُھٹلائے ونجن= اکھاں اُنگھلا اُنگھلا جاون، جائی رکھیوس= اوہنے ٹکانے سر رکھی، اوساس مارنا= ٹھنڈی آہ بھرنا، بندی= میں عاجز ۔ کنیز ۔ خادمہ ،بند = قید، بید= معالج حکیم۔ طبیب ، برم= ورم ۔ سوجن ۔ جلن دا احساس،الائی= آکھی ۔ بولی، اس ساہوں= اوس دے ساہ توں ، ہتھ بنھ کھلونا= غلامانہ طریقے نال پیش ہونا، ڈل ڈل کرنا= ندی نالے دا پانی کنڈھے نال وجنا ، تتا= دُکھیا۔ بے صبرا، نچلا=پر سکون، سیتی= ونھیّ ہوئی، محکم کوٹ= اُچی چا ر دیواری والا پکا مضبوط قلعہ،