ورقہ 152

2816
جیوں انار پکے دا دانہ ہوئے جلال آبادی
موتیں وانگ صفائی جثے لعلوں تاب زیادی
2817
صورت ویکھ ہوون دل بِریاں پریاں ہور تمامی
نیناں اگے مرگ شکاری ہوندے ویکھ سلامی
2818
ایسا حسن اُس لڑکی اتے جے اوہ ہوندی ظاہر
ہر ذرہ ہو سورج چمکے روپ حسابوں باہر
2819
ہر ہر وال اوہدے وچ آہا سوسو پیچ گمانی
صورت دا کجھ انت نہ آوے کاریگری ربانی
2820
جھنڈ اوہدی دیاں والاں وچوں مغز چڑھے خوشبوئی
ویکھن سات اساڈی مائی بے خود بے سُدھ ہوئی
2821
ذرہ سرت سنبہال نہ رہیوس غش اجیہی آئی
کردتی بیتاب شتابی تاب شکل دی مائی
2822
اس لڑکی دی مائی ڈٹھا ماں میری دا رُولا
کول اوہدے کوئی باغ ارم دا پھل آہا خوش پھولا
2823
اوہ پھُل ماں میری دے سرتے اوس پری نے لایا
ساعت پچھوں ہوش سنبھالی جگرا جائی آیا
2824
ماں میری پھر آکھن لگی حمد خداوند تائیں
واہ واہ قادر پاک کریگر اس حکمت دا سائیں
2825
قطرے آب منی دے وچوں ایسی شکل بناندا
پتھر تھیں کر نظر کرم دی چن سورج چمکاندا
2826
خسخس جیڈا بیج نچیزا خاکو اندر رُلدا
اس تھیں رُکھ بلند بنائے رنگ برنگی پھل دا
2827
پانی بوند اسمانی آوے سِپاں دے منہ پیندی
اُس تھیں دریتیم سُہائے قیمت پوے نہ جیں دی
2828
کالے پتھر دھپے سڑدے اندر کان بدخشاں
ایہناں وچوں لعل بنائے بے بہاء درخشاں
2829
خلقت اس دی رنگ برنگی دھن اوہ سِرجن والا
آپو اپنی صورت دِتیوس ہک تھیں ہک اجالا
2830
لکھ کروڑاں ہوہو گزرے اس دھرتی وچ مٹی
سندر صورت ظاہر کر کے پھیر رلاوے مِٹی
2831
ماں میری نے اس لڑکی نوں کُچھڑ اپنے چایا
مانواں وانگر ممے پائی مٹھا ددھ پلایا
2832
اس لڑکی دی ماں پری نے کیتا قول زبانی
جب لگ دھی میری دی ہوسی دنیا تے زندگانی
2833
تیرا حق بھلاسی ناہیں چھوڑ وفاء نہ بہسی
ہر مہینے وچ ہک ہفتہ پاس تیرے آ رہسی
2834
دھی میری تے تیری بھیناں اسیں دوئے بھی بھیناں
فرض اس تے ہر چنے اندر درسن تیرا لینا

لفظالی:
جلال آبادی=کابل دے شہر جلا ل آباد دا، تاب= چمک ۔ روشنی ، مرگ شکاری= شکار دے قابل ہرن، جھنڈ = سر دے وال ، بے سُدھ = بے ہوش ، پیچ گمانی= والاں دے اوہ کنڈل جیہڑے روپ دا مان گمان پیدا کرن، رُولا= طور طریقہ، خوش پھولا= چنگی طرحان کھڑیا ہویا، ساعت = گھڑی ، جگرا جائی آیا= دِل ٹکانے آیا ۔ خفقانی کیفیت گھٹی، آب منی دے =نطفے دے، نچیزا= معمولی قدر قیمت دا، اس تھیں = ایہدے توں ۔ ایہدے طفیل ، دریتیم= ورلا بے مثال موتی، سُہائے = (١) سجائے۔ (٢) سوہنا لگدا اے ، بے بہادرخشاں = انمول تے چمکیلے ،سِرجن والا= خالق ، اجالا= چانن ۔ ظہور، ہک تھیں ہک اجالا= اک توں دوجی اوہدا ودھ ظہور پیش کر دی اے ، چنے = چن دے مہینے اندر ، درسن= دیدار،