ورقہ 154

2854
عاشق دے دل اندر پائیوس عجز نیاز ہزاراں
خوف امید سمند غماں دے موجاں بے کناراں
2855
ترک سکھاں دی جال دکھاں دی سختی جند بدن دی
دوہاں جہاناں وچ محمد حرص ہوا سجن دی
2856
جویاراں نوں یار ملاوے سیوے پھٹ جدائی
رب غریب نواز ہمیشہ جس دی دھن خدائی
2857
سچو سچ سنائی ویرا جو گل اکھیں ڈٹھی
کُوڑوں سچ نکھیڑ دسالاں جے تدھ ہووے چٹھی
2858
ہائے افسوس جے پُہچاں اوتھے تاں ایہ سچ دسالاں
نال بدیع جمال پری دے تینوں چل بہالاں
2859
ملکہ دی گل سن شہزادہ وانگ گلاباں پُھلا
کردا شکر ہزار ہزاراں رحمت دا در کھلا
2860
سکا باغ دلے دا ہویا تازہ ابر بہاروں
جان حیران لگی پھر آسا دلبردے اخباروں
2861
ناامیدی والی آتش دوزخ وانگن بلدی
آس لقائیوں دس ارم تھیں سرد ہوئی کجھ جلدی
2862
اوہ کہانی ملکہ والی شاہزادے دل بھانی
کربلا دے تسے تائیں جیوں کر ٹھنڈا پانی
2863
جیوں پردیسی راہوں بھلے رات ہنیری اندر
اچن چیتی چانن لایا چڑھ چودھیں دے چندر
2864
جیوں کر کئیں مدت دے روگی ملیا بید سناسی
آس لگی مت ساس بدن وچ مولیٰ پاک دساسی
2865
جیوں روڑے وچ بدل وُٹھا لگی آس فصل دی
بھُکھے مال لدھی ہریائی کرپا ہوئی فضل دی
2866
ملکہ اتوں صدقے جاوے سیف ملوک شہزادہ
کہندا توں احسان میرے تے حدوں کِیّا زیادہ
2867
مینوں دس سجن دی پایو خوب طرح دی پکی
تُدھ پچھے سر دیون لائق توں ہن میری سکی
2868
کوئی تدبیر ہووے تدھ معلم سمجھی سنی سنائی
کسے طرح اس قیدوں چھٹیں کریئے زور ازمائی
2869
ملکہ کہندی کیکر چھُٹاں کجھ نہ چلدا چارہ
ایہ خیبر ایہ کوٹ چوپھیرے ملک بدیس ہتیارا
2870
جس دی قیدے اندر میں ہاں دیو بہادر بھارا
سٹھ گز اچا قد مریلا زور اس بے شمارا
2871
راکس غول وڈیرے اس تھیں خوف ہمیشہ کھاون
چہل دناں دے پینڈے اتوں نہیں اُریرے آون
2872
باجھ اس تھیں اس جائی ناہیں پنکھی پر مریندا
جانی والی چیز اس ٹاپو کوئی پھرن نہ دیندا

لفظالی:
عجز = عاجزی ، نیاز = ناز دے اُلٹ ۔ مینوں کسے دی کیہ لوڑا اے ، اجیہی سوچ ناز اے ۔ میں آپ تے کجھ وی نہیں ۔ سب کچھ کسے ہور تے منحصر اے ' اجیہی سوچ نیاز اے ، دھن = مدح تعریف دے قابل ، دسالاں = دکھاواں ، چٹھی = تقدیر دا لکھیا ہویا، جال = گزران ، آسا= امید ، اخباروں = لاتقنطوا ول اشارہ اے ٹ ک ق م الزمر :٥٣ ، آس لقائیوں = جلوے دیدار دی آس ، دس = اطلاع ، بھانی = بھائی ۔ چنگی لگی، چندر= چن ، بید سناسی= سنیاس دا علم رکھن والا حکیم طبیب ، روڑ= کلراٹھی دھرتی، مال = ڈنگر وچھا، ہریائی = ہر یاول ۔ گھاہ بوٹ، کرپا= مہربانی ۔ کرم ، سکی = عزیز رشتہ دار، ہتیارا= ظالم ، خےبر = قلعہ ، کوٹ = اُچّی فصیل والا قلعہ ، بدیس = پردیس ، راکس = راکش۔ جنگلی ظالم قوم جیہڑی دیوتیاں نال لڑدی سی،غول = جن بھوت چھلیڈے ، چہل = چالیھ ، جائی = جگہ تے ، جانی = جان ،