ورقہ 155

2873
سن گلاں شاہزادے تائیں فکر پیا دل بھارا
کیویں ملکہ خاتوں چُھٹے رب چھڈاون ہارا
2874
فکر تمیزاں کرکر تھکا راس نہ آوے کائی
مکر فریب ہنر دا حیلہ ٹردا نہ اس جائی
2875
کوٹ وڈیرا چوٹ دیوے دی خوف کلیجہ کھائے
راہ نہ لبھے داء نہ لگے ہک پناہ خدائے
2876
سیف ملوک بے چارہ ہوکے کردا وضو طہارت
ابراہیم نبی دے دینوں کردا اُٹھ عبادت
2877
امت خاص خلیل اللہ دی آہا اوہ شاہزادہ
دو رکعاتاں نفل گزارے دل دا رکھ ارادہ
2878
پھر سجدے سر دھر کے رُنّا رو رو کرے دعائیں
ربا توہیں حافظ ناصر اوکھی سوکھی جائیں
2879
بے یاراں نوں یاری کرنا آس تیری بے آساں
ہر ڈہٹھے نوں آپ اٹھالیں کر مشکل کم آساں
2880
بخشش کرکے فیض پچاویں او گنہار انساناں
رحمت تیری تھیں نومیدی ہوندا کم شیطاناں
2881
توڑے ہاں بدکار گناہی اسیں بندے منہ کالے
پھر بھی دائم فضل تیرے دی آسا رکھن والے
2882
لکھ مناں چرکین پلیتی شہراں اندر ہوندی
پل وچ پاک کرے جس ویلے رحمت تیری پوندی
2883
توں غریب نواز ہمیشہ اسیں بندے درماندے
کرم کریں تاں ہے چھٹکارا بھکھے ہاں کرماں دے
2884
تدھ باجھوں کوئی ساتھی ناہیں پھاتھی جان اولی
توں چھڑکاویں تاں میں چھُٹاں دیو دشمن سنگ ملی
2885
مان تران نہ زور نمانے نہ کجھ شیخی میری
ہکو پرنا تکیہ تیرا ہور نہیں دِھر ڈھیری
2886
سیف ملوک غریب شوہدے دی کوک تیرے درسائنیا
دیو غنیم یتیم بندے نوں کوہسی وانگ قصائیاں
2887
تیری اوٹ پناہ خدایا ہور نہیں کجھ سُجھدا
جس دیوے نوں آپوں بالیں کدکسے تھیں بجھدا
2888
چڑیاں بازاں داتوں سائیں چڑیوں باز کوہاویں
گوشت شیہاں سپاں والا کیڑے پاکھواویں
2889
توں بندے ناچیزے ہتھوں دیوتیاں مرواندا
واہ قادر دھن قدرت تیری انت نہ پایا جاندا
2890
میں غافل گمراہ تیرے تھیں بندہ پُر تقصیراں
نہیں عبادت تیری کیتی مگر پھراں تصویراں
2891
صورت دی ہک مورت تک کے بھج بھج مراں اضاعیں
آہا فرض میرے سرلوڑن وحدت تیری تائیں

لفظالی:
چھُٹے = آزاد ہووے ، تمیزاں= اک توں ودھ چیزاں دے گن اوگن پرکھ کے من مرضی کرن دے فعل، راس نہ آنا= درست فِٹ نہ بہنا ، اس جائی = اس تھاں تے ، دینوں = دین سیتی، حافظ ناصر = راکھا تے واہرو، ڈہٹھے = ڈِگے، توڑے = بھانویں ، چرکین= گند مند گوہیا کُوڑا، رحمت = بارش (توں مراد اے )، درماندے = عاجز بیمار ۔ کِتے نہ جاون جوگے ، پھاتھی = پھس گئی اے ، چھڑکاویں ، آزاد کراویں ، دیو دشمن سنگ ملی = شیطان دشمن میری سنگت تے قبضہ کری بیٹھا اے، نمانے = میں عاجز دا ، پرنا= سپورٹ ۔ سہارا، دِھر = پکھ کرن والا جی، ڈھیری= آس امید، نہیں سُجھدا= نظر نہیں آوندا ، کوہاویں = قتل کراویں ، شینہاں = شیراں، دھن = مدح تعریف دے قابل۔ بلے بلے، اضاعیں = بے فائدہ ۔ فضول ، لوڑن = لبھنا۔ تلاش کرنا،