ورقہ 156

2892
ہر صورت وچ معنے توہیں تیرا عشق نہ چایا
صورت پچھے جھلا ہوکے اپنا جرم گوایا
2893
ماؤ پیودی خدمت کرنی فرض میرے پر آہی
اوہ بھی روندے چھڈ کے ٹریا بہت کیتی گمراہی
2894
تیرا نام غفور سُنیندا بخشیں میں نکارا
ملکہ خاتوں نوں لے جاواں دیو مرے ہتیارا
2895
ملکہ خاتوں نے پھر کہیا سن توں ویر پیارا
ہک تدبیر میرے دل آئی اس تھیں ہے چھٹکارا
2896
جے سلیمانی دوشاہ مہرے ہتھ اساڈے آون
اللہ بھاوے تاں اس قیدوں اوہ سانوں چھڑکاون
2897
میں دیوے تھیں ہک دہاڑے پُچھی سی گل ساری
کے کجھ نام اس کوٹ تیرے دا کس دی ہے سرداری
2898
دیوے نے پھر دسیا اگوں ٹاپو ایہ وڈیرا
اسفند باش ہے نانواں اس داراج حکم سبھ میرا
2899
پھر میں پُچھیا ایس مکانوں آدمیاں دا واسا
کتنا پندھ دوراڈا ہوسی خبر نہیں میں ماسا
2900
دیوے کہیا آدم ایتھے مول نہیں آسکدا
آدمیاں دی جاؤں توڑے دیو وڈا بھی تھکدا
2901
آدمیاں دے واسے ایتھوں نہیں شمار کوہاں دا
اڈن والی پری اگے بھی پینڈا برس دہاں دا
2902
ہک روایت ایہ بھی ڈٹھی پینڈا ہک دہیں دا
ایڈا فرق ہووے گا کیکرناہیں عقل منیندا
2903
رستے وچ کوہ قاف اجاڑاں ندیاں انت نہ کوئی
پریاں اتوں اڈیاں جا نون مشکل پندھ نہ ہوئی
2904
پھر میں پچھیا عمر تساڈی ہوندی کتنی کتنی
آدمیاں تھیں لمی چھوٹی یا اوہناں دے جتنی
2905
کیہوس عمر اساڈی وڈی آدمیاں دی تھوڑی
پھر میں کہیا تیرے دم دی ہوسی کتھے توڑی
2906
کہیوس ست سے برساں توڑی میں پراتم ہوساں
سے برساں وچ عمر جوانی زور دیئے تن موساں
2907
پھر میں کہیا دیوتیاں دی جان ہوندی ہر جائی
تیری جان پیاری کتھے دس مینوں گل کائی
2908
ایہ گل سن کے دیوے مینوں دتی جھڑک غضب دی
جان میری سنگ کے کم تیرا نیت کس طلب دی
2909
کس کارے پر جان میری دے پُچھیں پتے نشانے
کون تیرا جو مارگ مینوں سن توں نار حیوانے
2910
کون جوان میرے تھیں چنگا وچ جناں انساناں
ناہیں دیو زوراور بھارا میرے جیڈ توانا

لفظالی:
نہ چایا= اختیار نہیں کیتا، ہتیارا = ظالم ۔ ہتیا کرن والا ، اللہ بھاوے = ان شا اللہ، چُھڑکاون = آزاد کراون، کوٹ = قلعہ ، راج = انتظامی اختیار، حکم=عدالتی اختیار، واسا= آبادی ۔ رہائش۔، آدمیاں دی جاؤں توڑے= آدمیاں دی تھاں تے بھانویں ، واسے =آبادیاں ، دہیں=دن، پراتم = بڈھا۔ دانا۔ زندگی دا پکا تجربہ کار، تن موساں = دیہی نوں زور نال مروڑے دئیے، ہر جائی = کسے نہ کسے تھاں تے ، سنگ = نال ، مارگ = مارے گا، نار حیوانے= اے حیوان عورتے۔ ڈنگرے، معنے= حقیقت، کارے= کارنے۔ کم۔ وقوعہ،