ورقہ 3

لبھ اوہا جیں کجھ نہ صُورت نقصوں نام نہ عَیبوں
میٹ اکھیں دِل کھول دو ساعت راز کھُلے کجھ غیبوں
ہر محسوس تیرا تک ویکھیں سب عکُوس افعالوں
تے افعال ظلال صفاتوں صفتاں ذات کمالوں
عاکس عکسوں ہر جا اَقرب اُسدی ذت احوالوں
اوہ اَقرب تھیں اَقرب جِس تھیں شورش حُسن جمالوں
اثر حلُول اِتحاد نہ سمجھیں تے نہ کَیف بیانوں
جے پاویں حق پاویں جیوں کر ہَے منصُوص قُرانوں
تے نہ لازم کریں خُدا تے حُکم منافی شانوں
شرک کُفر دا نام نہ اوتھے جتھے نُور اِیمانوں
تیں وِچ اَنور گوہر عالی نہ کر گرد آلُودہ
چاہ ترقّی چھوڑ رذالت مَریں نہیں بیہُودہ
داغ نہ گھت سفیدی اَندر رَنگ چڑھا کافُوری
رَنگ پذیر ایہی دِل تیرا اصل جیہدا گُل نُوری
ہر دَم وَقت ویہاندا ایہہ مُڑ ہتھ نہ آوے
قول پکّا کجھ کر لے عشقوں جو تَیں نال سدھاوے
باجھوں حال نہ قال منافع قالی دا ہتھ خالی
ہو خالی سَدواوے عالی ایہہ ہَے طبع رِزالی
فرج شکم دا بندہ ہو کے لافاں مار نہ مُولے
نام دھریں کافُور زنگی دا پر کہہ کون قبُولے
عشق ڈِٹھو جے نہ کدائیں وصل فراقوں حالے
حال ملالے دَرداں والے جَل بَل رہن وچالے
بِریاں لاٹ بِرہوں دے جِگرے دَرد فراقیں جالے
حال ملالے دَرداں والے جَل بَل رہن وچالے
تُہ احسان کرے کہ کوئی ذرّہ دِلوں جُھکیں سَو وَاری
کُل احسان تیرے سر جس دا چھوڑ نہیں تِس یاری
لایا یاری پر پُوری ساری جیئوں ہویَوں اِقراری
جے اِقراروں ہَیں اِنکاری ایہہ ہے اَنت خواری
یار جُدا کہ تیتھیں غافل لبھ دُراڈا ناہیں
دعویٰ جھُوٹھ قسم کر چھڈیں جھُور مَریں مت آہیں
اوّل آخر ویکھ میانی نال جیہدے وَرتارا
چھوڑ عزیز ذلیلاں تائیں نہ گل لاویں یارا
پَوے قَدم جو طلبوں خاریں گلزاراں وِچ جاپے
خار چھٹن گلزار نہ دِسّن شوق کھڑے وَل آپے
داغ لگا مت جائیں ایتھے مَردا مَرد سدائیں
عشق دید رَہے پچھتاوا مت حسرت لَے جائیں
کریں مدد اے والی میرے دَخل مِلے دَربارے
بخشیں تھانوں نتھاویاں تائیں فضل تیرے نے بھارے
دعویٰ حق اِیمانوں پکّا سچّا بخش خُدایا
حکم اَشَدُّ حُبّاً لِلّٰہِ شان جیہدی وِچ آیا
دائم نُور طلب دِی مشعل رَہے فروزاں راہے
میں قربان لطیف پیارا تارے نال نِگاہے
تیں ہُندے میں کِت ول جاواں ناہیں ہور ٹکاناں
جے تقصیروں میں پُر دامن غالب فضل رباناں
فضل بڑا اس ہادی سندا خود وَل شوق لگائے
جیں اس شوقوں نہ نصیباں غافل اوگت جائے
تے تقدیم اوسے دَرباروں ہر ہر خود نہ تانے
ویکھ یُحِبُّہُمْ دی رمزوں وَل وَل کھڑے دھگانے
ایہہ گرداب اندھیر غماں دا دُنیا نام سداوے
پُور بھَرے وِچ بیڑے غرقن جے نہ بنے لاوے
باہوں پکڑ کڈھے خود جس نوں نُور کرم وَل دھکّے
جِس نُوں روڑھ غضب وِچ گھتے کوئی کڈھ نہ سکے
یا رَبّ میری سرگردانی میریوں گئی شُماروں
اِک رَحمت دا دارُو تیرا روگ کٹے بیماروں