ورقہ 157

2911
کس اگے فریاد کریں گی کون لڑے سنگ میرے
کس کارن پھر جان میری دے پُچھیں پتے پکیرے
2912
جاں دیوے ایہ جھڑک غضب دی دتی بہت نروئی
میں بھی اگوں غصے بولی نالے ہنجوں روئی
2913
دیوے اگے سڑکے بولی کیوں توں جھڑکیں میں نوں
قید رنجانی ہک ایانی ترس نہ آوے تیں نوں
2914
ماء پیو بھیناں بھایاں نالوں پائیوئی برا وچھوڑا
دیسوں کڈھ بدیس بدھوئی قہر نہ کیتوئی تھوڑا
2915
نہ کوئی سنگ سہیلی ایتھے نہ کوئی ماں پیو جائی
ہک ہکلی قید تیری وچ میں نمانی آئی
2916
کس اگے میں دسن چلی کیہڑا ایتھے بندہ
کون میرا فریاداں جوگا جس تھیں لگوئی مندا
2917
اگے انت شمار نہ غم دا سار چنے نت چباں
میں سِر گھٹ مصیبت دِسے ہور چڑھاویں دباں
2918
درداں دی گل سن کے دیوے رحم پیا اِت پاسے
سر میرے نوں جھولے رکھ کے لگا کرن دلاسے
2919
کہن لگا دس دیواں تینوں تیرے تھیں کے چوری
جتھے جان میری اُس جائے پہنچ نہ کسے ہوری
2920
آدم ذات کسے دا اوتھے پیش نہ جاندا حیلہ
نہ تیرا نہ ہور بندے دا تُردا وس وسیلہ
2921
جان میری صندوقے اندر شیشے دا اوہ بنیا
پھر صندوق صندوقے اندر جندریاں سنگ گھنیاں
2922
اوہ صندوق ندی دے تھلے ایہ ندی جو وگدی
شاہ مہرے سلیمانی ہوون واہ اوتھے تد لگدی
2923
دو شاہ مہرے صورت والے پاس ہوون جس بندے
ہمت کرکے آن کھلوئے ایس ندی دے دندے
2924
اوہ شاہ مہرے باندے کرکے دسے ایس ندی نوں
ندی صندوق لیاوے باہر ساعت گھڑی ادھی نوں
2925
کھُل ونجن صندوق شتابی جاں شاہ مہرے دَسے
اونہاں وچ کبوتر چٹا اُڈ کِتے ول نَسے
2926
ادس کبوتر اندر رہندی میری جان پیاری
مرجاواں میں اوسے ویلے جاں اس نوں کوئی ماری
2927
ملکہ خاتون خبر سنائی شاہزادے نوں ساری
سیف ملوک ہویاں دل خوشیاں بہت آئی ہشیاری
2928
لگی آس ربے دے درتے ہویا فضل اساں تے
حکم خدا دے دیو مرے گا آیا کم وساں تے
2929
اوہ شاہ مہرے صورت والے پاس شہزادے آہے
کر تعویذ گلے وچ پائے آہے گلوں نہ لاہے

لفظالی:
کارن = لئی ، پکیرے = زیادہ پکے ، نروئی = سخت ڈاہڈی صحت مند، قید رنجانی= قید دی ستائی ہوئی،بدیس= پردیس ، ماں پیو جائی= سکی بھین ، لگوئی مندا= تینوں بُرا لگا اے ،سار چنے = لوہے دے چھولے ذہنی کوفت، دباں = رعب دے دابے، اِت = اِس ، جھولے = جھولی وچ ، اس جائے = اوس تھاں تے ، حیلہ پیش نہ جانا= کوئی تدبیر کار گر نہ ہونا، وس وسیلہ تُرنا= وس اختیار تے حیلہ وسیلہ کم آونا ، واہ = وس اختیار، دندے = کنارے ، باندے=ظاہر ۔ ننگے۔کھُلے، دسے= وکھاوے، وساں تے = اختیار وچ ، صورت والے = جنہاں شاہ مہریاں تے شاہی چہرے بنے ہوون،