ورقہ 161

شہزادے دا ملکہ خاتون نال قلعے توں سمندر ول روانہ ہوناتے بڑی سخت محنت
نال ڈراونے مگر مچھ نوں جانوں مارنا تے مراد دے نیڑے اپڑنا

2987
مالی ایس باغیچے والا داناں مرد سچاواں
جس دے باغوں لے پنیری میں بھی بوٹے لاواں
2986
ہر ہر جاء کیارے تک کے بوٹے راس لواندا
جس جائے اوہ لائق ہووے اوسے جا سُہاندا
2987
ایہ فرماندی آئی اگوں رُت بسنت پُھلاں دی
کوئی دن سرد خزاں دے رہندے لگی امیدگُلاں دی
2988
باغ اندر ہریائی ہوسی کڈھسی شاخ انگوری
لالہ اتے گلاب ملن گے نرگس تے گل سوری
2989
جاں شاہزادے دیوے تائیں کیتا مار اضائعیں
ملکہ خاتوں نوں لے ٹریا چھڈ دیوے دیاں جائیں
2990
لکڑیاں دا ٹلا بدھا بہت پکیرا کرکے
رُڑھ رُڑھ رجیا ناہیں تریا پھیر ندی وچ ترک اے
2991
لعل جواہر قیمت والے نعمت بے شماری
کھانے دانے ٹلّے اتے پالئے ہک واری
2992
سبھ اسباب ٹلے تے دھریا پکا محکم کرکے
ملکہ سنے ٹلے پر چڑھیا ٹلا ٹُریا ترکے
2993
اٹھے پہر ندی وچ جاندا ٹلا نال شتابی
سیف ملوک عبادت اندر ذکر ثنا وہابی
2994
لہراں اندر آیا ٹلّا ول ول دھکے کھاندا
کدے پتال اندر لہہ جائے کدے گگن چڑھ جاندا
2995
کدے پئے وچ گھمن گھیراں پھردا اندر پھیراں
پھیراں وچ گجے ایوں پانی چوٹ لگے جیوں بھیراں
2996
چست گھراٹ پھرے جیوں تیویں پانی تر کھا بھوندا
لہراں قہراں دے منہ ٹلّا ڈُبن اُتے ہوندا
2997
شاہزادے نے جھاگے آہے سفر اجیہے اگے
ملکہ سی معصوم شاہزادی ڈر ڈبن دا لگے
2998
رات ہنیری ندی چوپھیرے نظر نہ پون کنارے
جانیں توں ہتھ دھوتی بیٹھے ایہ مارے کہ مارے
2999
اوڑک سفر دوہاں تے آئی مشکل ودھ حسابوں
قدرت نال بچاندا جاندا مالک ہر گردابوں
3000
سر گردان ندی وچ رُڑھدے نہ کجھ پتہ نشانی
کدھروں آئے کدھر جانا کدھر خلق جہانی

لفظالی:
سچانواں = سچ تے کھلوتا ہویا، سچیار=سچ اختیار کرن والا، راس = اچائی ول سدھے، سُہاندا= سجاندا، ہریائی = ہر یا ؤل ، انگوری = نویں پھُٹے شگوفے، سُوری= خوبصورت سُرخ گلاب ، اضائعیں = ضائع فنا، جائیں = تھانواں ، ترک= ملاح ، پاتنی۔ بیڑی دے ذریعے سامان ڈھون والا، اٹھے پہر= چوّی گھنٹے ، وہاب = اللہ تعالیٰ دا صفاتی ناں بغیر کسے بدلے لالچ دے چوکھا کجھ عطا کرن والا، پاتال = تحت الثریٰ ، تھلے توں تھلے دا حصہّ، گگن=آسمان، بھیراں = نقارے ، گھراٹ = پن چکی ، جھاگے= جھّلے ، اوڑک سفر = سفر دے خاتمے تے۔ گردابوں = گھمن گھیری توں ،