ورقہ 162

3001
ہک تھیں ہک چڑھندی آوے عاشق نوں دلگیری
دن دن پیر اگیرے رکھے واہ عشق دی شیری
3002
چُلھے وچوں لکڑ سڑدی سٹے وچ چرھاں دے
کولا ہویاں پھیر جلاوے آرن زرگراں دے
3003
عشقے دی ایہ رسم قدیمی جلیاں نوں نت جالے
اگلا زخم نہ مولن دیندا ہور اتوں چا ڈالے
3004
ٹلے اُتے رُڑھدے آہے ملکہ تے شاہزادہ
ہک دن کرنا رب دا ہویا مشکل بنی زیادہ
3005
ظالم واؤ مخالف جُھلی جھکھڑ جُھلے دیندا
بدل پاغباری آیا مارو مار کریندا
3006
لتھا رتھ اجیہا یارو کے گل کتھ سناواں
کتے جہازاں لانگھ نہ لگدی کانگ چڑھی دریاواں
3007
بدل آکھے اجےّ برھنا توڑے پھیر نہ وساں
کیتے شہر اجاڑ بتیرے واہیاں کوہلاں کساں
3008
جھکھڑ آکھے زور تمامی لاء خلق نوں دساں
ہک ہک ندی سمندر ہوئی ندیاں وانگر لساں
3009
تارے چھوہے ٹھاٹھ ندی دی انبرتیک اُچھلےّ
نیناںہنجوں مینہ وسائے مارے موت اولے
3010
نہ کوئی کنڈھی نظری آوے نہ کوئی ٹاپو بیلا
کانگ طوفان غضب دا چڑھیا قہر قیامت ویلا
3011
جِیا جُون رُلے وچ آخر سپ سنسار بلائیں
کجھ رڑھدے کجھ کھاون آون شاہزادے دے تائیں
3012
شور ککارا انبر توڑی تیکر لہندے چڑھدے
زور پیا کوہ قاف ندی وچ سِر پرنے ہو جھڑدے
3013
مُڑ مُڑ ٹلے تائیں دیون گھمن گھیر کلاوے
ٹھاٹھاں مار اولار وگاون تاں پھر باہر آوے
3014
ہک اندر وچ کانگ غماندی ندیوں موج ودھیری
بدل وانگن ہنجوں وسن آہیں سرد ہنیری
3015
خونی لہر عشق دی وگی بے کنار ڈونگھیری
پھیر کڑاہ فکر دے پیندی ہمت صدق دلیری
3016
شوکو شانک ندی دی سن کے سِیمرغاں تن کنبے
جت ول نسن پانی دِسے اڈ اڈکے پر انبے
3017
راجے دھول پیا دل بھارا ہول اس کانگ طوفانوں
بھار زمیں دا چان نہ ہوندا عذر نہ سی فرمانوں
3018
مچھی جان تلی پر رکھی تلیئے نار فکر دی
ایسی کانگ چڑھائیوئی ربا میں اج بھاروں مردی
3019
اُبل اُبل نکلے پانی جیونکر تیل کڑاہی
تڑفن مچھ کڑاہیاں اندر جان تلیندی آہی

لفظالی:
چڑھندی= ودھیری،شِیری= شیرینی۔ مٹھاس، چرھ = دیگاں تھلے بنے چُلہے جو کجھ زمین اندر تے کجھ اُچاویں ہوندے نیں ، آرن= بھٹھی ، جالے=ساڑے ، مولنا= پھٹ بھریا جاون، ۔ زخم ول تھیون ۔ غم بھُل جاون، رتھ= ٹ ک ٧٤، لانگھ = لنگھن دا رستہ' لانگھا، کانگ= وڈا ہڑھ، برھنا=برسنا۔ وسنا، واہیاں= وگادتیاں، کُوہل= پہاڑوں نکلی چھوٹی ندی، کس = برساتی نالا، جھکھڑ= مینہ تے ہنیری دا کٹھا حملہ ، سر پرنے= سردے سہارے، جھڑنا= ڈِگنا، کلاوے = دوہاں بانہاں تے چُک کے جھوُلے والے ہونٹے، شوکو شانک= شور شُکارا۔ پانی دا آوازہ، مچھی+دھول= ٹ ک تفصیلاں ،