ورقہ 163

3020
دنی سنسار نہ دسے کدھرے بُلہن سنسار دسِیندے
کجھ بے ہوش ہوئے کھا دھکے کجھ موئے کجھ جیندے
3021
ٹلّے نوں تھر تھلی آئی گگن پتال مریندا
الٹا سدھا ہو پھر بچدا جاں رب راکھا تھیندا
3022
عاشق دا رب عشق پکاندا دم دم دُکھ سہاندا
رحمت لطف کماندا آپے مڑ مڑ پیا بچاندا
3023
سیف ملوکے دا پیونالے عاصم شاہ نمانا
وانگ نبی یعقوبے روندا درد فراق رنجانا
3024
اٹھے پہر دعائیں کردا سجدے اندر پے کے
ربا خیری آوے بیٹا نال پری نوں لے کے
3025
تیرا نام کریم خدایا کرم کریں ہر جائی
مارلیا میں چوٹ پتر دی تدھ بن اوٹ نہ کائی
3026
پیری وقت میرے تے کیتی بخشش تدھ جنابوں
اوتر تھیں پھر سوتر ہویم وافر کرم حسابوں
3027
سیف ملوک میرے گھر دتا بیٹا صورت والا
دانشمند اکابر چنگا یوسف مثل اُجالا
3028
اس نوں شیر عشق دے کھڑیا جیوں اُس نوں بگھیاڑاں
عاصم تے یعقوبے آپوں اگ لگائی واڑاں
3029
کاہنوں میں شاہ مہرے دسے کاہنوں اس تعبیراں
اس دا کُھوہ پیاتے میرا وچ سمندر نیراں
3030
ہک گیا اس بارھاں وچوں رو رو ہویا نبینا
میرا ایہو ہکو آہا سٹ گیا مسکیناں
3031
اس نوں بھی تدھ خیری کھڑیا لونڈا ہو وکایا
پھیر مصر دی شاہی دے کے بابل نال ملایا
3032
سیف ملوک میرے فرزندے صحیح سلامت رکھیں
نال مراد دلی دے اس نوں میں بھی ویکھاں اکھیں
3033
نامرادی اندر اگے تدھ مراد پُچائی
پھر بھی آس تیرے دراتے ہور پناہ نہ کائی
3034
میرا پت حوالے تیرے ہے خالق سبحانا!
میں بھی عاجز اوہ بھی عاجز تینوں سبھ خصمانہ
3035
حضرت ختم نبیاں کہیا سچی خبر کتابوں
صلی اللہ علیہ وسلم ہوون پاک جنابوں
3036
خاص حدیث شریفے اندر آون جدوں قضائیں
کوئی دعا نہ چلدی اوتھے نہ اوہ ٹلن دوائیں
3037
ماپے کرن دعائیں جس دی ہوندا اثر دعاؤں
یا پھر رد بلائیں کردا صدقہ پاک ریاؤں
3038
عاصم شاہ آہا نت کردا بیٹے کان دعائیں
اوہ دعائیں جان بچائیں سیف ملوکے تائیں

لفظالی:
سنسار= (١) جگت(٢) مگر مچھ،بُلھن= وڈی مچھی جیہڑی اپنے نرنال ملا پ لئی کنڈھے تے آکے لیٹدی رہندی اے ایس لئی بلھن نوں حرام سمجھیا جاندا اے ، گگن= آسمان ، پاتال= دھرتی دے دُھر تھلے والاحصہ، لطف کمانا= مہربانی کرنا، چوٹ= سٹ ، صدمہ، اوٹ= پناہ، اوتر = بے اولاد، سوتر= صاحب اولاد، اُجالا= نور دا ظہور، نیر= پانی ، بارھاں= حضرت یعقوب دے پتراں ، لونڈا= غلام، نامرادی= خواہش مراد دا پورا نہ ہونا، نراشا= آس کچلی مدھولی جاون دا احساس، خصمانہ= سائیاں خصماں والا کم مالکانہ ذمہ داری ، اپرالا ،پاک جنابوں = اللہ تعالیٰ اوہناں تے درود بھیجدا اے،