ورقہ 165

3058
جاں خرچنگ دوارے وچوں دِن گل رنگ رنگیلا
جھاتی پاوے تے سر کڈھے سرخ کرے رنگ پیلا
3059
لاجوردی تنبو پاٹے انبر دا جس ویلے
صادق صبح ستر تھیں اٹھ کے آوے باہر سویلے
3060
صومعہ ازرق وچوں کڈھے جاں سر باہر شتابی
ہتھ تقدیر دِسے یدِ بیضا حکمے نال وہابی
3061
چمکن ہار کٹوری والا جھنڈا جاں سرچاوے
ظل اللہ فلک دا راجہ جس دم تخت سُہاوے
3062
دینھ چڑھے جگ روشن ہووے خوب سُہاوے بندر
رُکھ سنہری پیدا ہوون ہور اس بندر اندر
3063
جاں اسمانی شاہ تخت توں ستراں اندر جاندا
میروزیر ہوون پھر تازے ہر ہک خان کہاندا
3064
نکی موٹی فوج اسمانی ہسن کھیڈن لگے
کوئی لہندے کوئی چڑھدے دکھن کوئی پربت نوں وگے
3065
قطب شمالی پکا ہوکے چوکیدار کھلووے
سورج ڈُبے تارے چڑھدے روز و نجے شب ہووے
3066
رات پئے تاں رُکھ سنہری چھپ جاون وچ دھرتے
دن دوجے پھر ظاہر ہوون سدا ایہو کم ورتے
3067
بندر اندر میوے آہے باہر انت شماراں
پستہ مغز بادام منّقیٰ انب الوچ اناراں
3068
لٹکن میوے تے رس چووے ہک ہک لال نباتوں
ٹلے توں شاہزادہ لتھا نالے ملکہ خاتوں
3069
محکم کرکے بدھا ٹلا آپ ہوئے سیلانی
کھاون میوے شکر گزارن فضل ہویا سبحانی
3070
ٹھنڈے مٹھے پانی وگن جومن بھاوے پیندے
ہک مہینہ رہے مقامی پھر اُداسی تھیندے
3071
سیف ملوک کہیا سن ملکہ کس کم ایتھے بہنا
جب لگ جان سجن دی لوڑے رھڑ دے تردے رہنا
3072
ملکہ کہندی سن وے ویرا میں پھڑیا سنگ تیرا
اگا تیرا پچھا میرا کوچ کرو اج ڈیرا
3073
کوئی دن دا کر خرچ ٹلے تے رکھ لئے کجھ میوے
ویکھ محمد رازق کتھے رزق بندے نوں دیوے
3074
ہوئے سوار ٹلے تے دوئے ملکہ تے شاہزادہ
لمے وہن پئے پھر عاشق سچا رکھ ارادہ
3075
راتیں دیہاں ٹردے جاندے گھڑی آرام نہ پاندے
نہ سُدھ بدھ سنسار جگت دی نہ کوئی دندا واندے
3076
پانی اوپر جاندا ٹلا بیڑی وانگن ترکے
سیف ملوک چلائیں جاندا آس ربے دی کرکے

لفظالی:
خرچنگ = سرطان آسمان دا چوتھا برج جدوں سورج ایس برج وچ وڑدا اے تے دنیا نوں رنگو رنگ کر دیندا اے، دن۔ دینھ= سورج، لاجوردی= نیلا ، انبر = اسمان، ستر= پردے، صومعہ ازرق= نیلے اسمان دی لُگی کُلّی، یدِ بیضا= حضرت موسیٰدا روشن تے چمکدار ہتھ معجزے دکھاون والا ہتھ،حکمے نال وہابی=اللہ تعالیٰ دے حکم نال ، ظل اللہ= اللہ دا سایہ ، روز ونجے= دن جاوے، الوچ = آلوچے، بندر= در بند ۔ سمندر کنڈھے بیڑے کھلون دی تھاں، لال نباتوں=(١) گھنڈ مصری دا بنیا ہویا(٢) مصری دے لال توں ، لال = پھَل پتر ، واندا = ظاہر ، اگا تیرا پچھا میرا= تینوں آگو من لیااے، لمے وہن= (١) لمیاں سوچاں(٢) لمے سمندری سفر ، نہ کوئی دندا واندے= کوئی کنڈھا ظاہر نہیں سی دسدا،