ورقہ 166

3077
پنج مہینے ہور کپیندا پندھ گھنیرا آبی
واء مراد رہی نت جُھلدی ٹریا گیا شتابی
3078
آپ شہزادہ چپا مارے آپے ونجھ لگاندا
راتیں دیہاں خوف ندی دا پلک ہک اکھ نہ لاندا
3079
باجھ ملاحاں ترن نہ بیڑے مرداں باجھ نہ جھیڑے
ہویا ملاح اوہ شاہ مصر داکئیں رُڑھاکے بیڑے
3080
یوسف بردہ ہو وکانا خُوک ہکے صنعانے
پٹ پہاڑ سٹے شاہزادے فرہادے ہک جانے
3081
پنوں دھوبا نام دھرایا کیچم دے سلطانے
چاک کلالاں دا سدوایا عزت بیگ جوانے
3082
کام کمر چھڈ گھر در ٹریا مرمر کے جند بچی
پورن گھر گھر بھیکھ منگیندا پال محبت سچی
3083
بے نظیر درگ وگایا قید اندر تن گالے
نجم نساء بی بی بن جوگی بن بیلے کوہ بھالے
3084
قیس عرب دا راجہ آہا بنیا مجنوں جھلا
شیراں تے بگھیاڑاں اندر وچ پہاڑ اکلا
3085
مجنوں نے ہک عورت ڈٹھی ہک دن نال قضائے
مردے دے گل رسا پایاچلی نگر ول جائے
3086
مردے دا منہ کالا کیتا وال پئے وچ گل دے
رچھ قلندر وانگر دوئے اگے پچھے چلدے
3087
جاں مجنوں دے کولوں لنگھے پُچھدا مرد یگانہ
کس کارن ایہ کارن کیتو کے ایہ مکر بہانہ
3088
بڈھی کہیا سمجھ جوانا ایہ کم پیٹ کراندا
میں عورت اس مردے تائیں در در پھرے نچاندا
3089
اس نوں میں نچاندی پھرساں ہر بوہے کر پھیرا
خلقت ویکھ تعجب ہوسی پئیسی خیر ودھیرا
3090
جے کجھ حاصل ہوسی سانوں ونڈ دوئے ول کھا ساں
ادھا مرد کھڑے گا گھر نوں ادھ میں بی لے جاساں
3091
مجنوں کہندا اس کم لائق میرے جیہا نہ کوئی
پا میرے گل رسا مائی کھٹ زیادہ ہوئی
3092
گھر گھر ناچ کراں گا عمدے غزلاں بول سناساں
لیلاں دے گھر توڑی چلساں کھٹی تدھ کراساں
3093
جے کجھ حاصل ہوسی تینوں کجھ نہ دیویں مینوں
جے کجھ لبھسی توہئیں کھائیں ہوگ بھنجال نہ تینوں
3094
مجنوں نے گل رسا پایا منہ لیا کر کالا
اس عورت دے پچھے ٹریا واہ عشق دا چالا
3095
شہر شریکاں دے گھر ڈھویا مجنوں عشق قلندر
رسا چِھک نچاوے بڈھی ہر ہر ویہڑے اندر

لفظالی:
پندھ کپنا= سفر طے کرنا، وکانا=وِکیا،خُوک ہکے= سُور چرائے، صنعانے= شیخ صنعان ۔ جنہاں نے اک کافرہ لڑکی دے عشق وچ سور چارے سن تے سورنی دے بچے اپنے موڈھیاں تے چُکے سن ۔ ایس طرحاں اوہناں دے کندھے تے سُور بچیاں دے پیر آ گئے سن تے حضرت غوث الاعظم جیلانی دا واک پورا ہو گیا سی ، کلال = پیالے ویچن والے ۔ کمہار، عزت بیگ = مہینوال دا اصل ناں، ہک جانے= اکلے فرہادنے ، کام کمر = کام کنور' مشہور عاشق کام روپ جیہڑا سر اندیپ دی شہزادی کام لتا نوں ویا ہون وچ سپھل ہو گیا سی، بے نظیر = ٹ کشخصیتاں،درگ= انھا کھوہ ، قیس = مجنوں دا اصل ناں، نال قضائے= اتفاق نال۔ تقدیر نال، بھنجال= بھائیوال، کھٹ = کھٹی ، مرد یگانہ= ورلا ۔ بے مثال انسان منفرد، پئسی= پائے گی، ول = (١)پاسا۔ دِھر(٢) چنگی طرحاں،