ورقہ 18

305
فیلا بند کیتا شاہ ساڈا اس بازی دے دعوے
ہو حیران سٹے رُخ اگے کجھ نہ آوے جاوے
306
کدھرے دس قصے دی ناہیں پئے بُرے وچ بندی
ہک وزیر وڈیرا آہا نام حسن میمندی
307
دانشمند وزیر اکابر افسر وچ وزیراں
اس نے عرض گزاری شاہا مُہلت دیہو امیراں
308
آپو اپنی دانش اُتے کر سن سبھ تدبیراں
مت ایہہ قصہّ پیدا ہووے شاد کرے دلگیراں
309
برس دینہاں دی مہلت لے کے ٹریا حسن اکابر
نال لیا سو ہور سیانا حکموں ہوئے نہ نابر
310
شاہنشاہ دی خدمت وچوں رخصت ہو سدھائے
خرچ خزانے برس دینہاں دے نال اسباب لدائے
311
تحفے ہدیے تے نذرانے ڈالڑیوں سوغاتوں
بادشہاں دی خاطر پائے ہر قسموں ہر ذاتوں
312
اُٹھ حسن میمندی ٹریا غزنی چھوڑ خراساں
نہ دس بُجھ مقام کسے دی فضل اتے رکھ آساں
313
چھوڑ وطن پردیسیں ٹردے ہر ہر شہر ولایت
ہر درسوں ہر مکتب پُچھدے کوئی نہ کہے حکایت
314
بہتے ملک ولایت پھر پھر برس رہیا جد تھوڑا
پُہتے روم شہر وچ آ کے چڑھے قصےّ دی لوڑا
315
تحفے ہدیے لے نذرانے چیزاں وستاں نادر
اس نگری دے والی تائیں ملیا حسن اکابر
316
مجلس بہن لگا اس شاہ دی عمدے سخن الاوے
بہت پسند اوہناں نوں آیا شاہ اس کول بہاوے
317
بہت حسن دی خاطر داری شاہ لگا فرماون
موتی ہار پروئے سخنوں ہر ہک دے دل بھاون
318
جدوں حسن میمندی ہویا محرم وچ دربارے
مطلب اپنے دی شاہ اگے عرض تمام گزارے
319
شاہے بہت مدارا کرکے کہیا سن توں بھائی
ایس قصے دی دس اسانوں اگے کسے نہ پائی
320
مجلس میری وچ نہ ہویا اس دا ذکر کداہیں
نہ پڑھیا نہ سنیا ڈٹھا قبض میری وچ ناہیں
321
پر ہک بڈھا خضر نمونہ عمراں دا سیلانی
صاحب یُمن کرامت والا چہرہ خوب نورانی
322
سبھ ملکاں وچ سیر کریندا ملک میرے ہن آیا
جھُگی پاء کنارے بیٹھا رب ول چِت لگایا
323
آمد رفت خلق دی کولوں بیٹھا ہے چھپ لُک کے
کرے عبادت دن تے راتیں نال ارادت جھُک کے

لفظالی:
فیلا بند = فیلا تے رخ شطرنج دے مہرے (بادشاہ نے سانوں کوئی چال چلن جوگا نہیں چھڈیا۔ اسیں زچ ہوگئے ہاں ۔ امیراں اپنے رخ چہرے حیرانی نال تھلے سٹے ہوئے نیں کوئی واہ نہیں چلدی ۔بندی = قید ۔اکابر = اک وڈا ۔نابر = بے امرا ۔ باغی ۔ڈالڑیوں = ڈالی تحفے وجہوں ۔لوڑا = تلاش ۔ الاوے= زبان نال چنگی طرحاں ادا کرے ۔خاطر داری = دل خوش رکھن لئی کیتا جتن ۔مدارا = مدارت۔ ٹہل سیوا۔ قبض = قبضہ۔ کنٹرول ہتھ وس وچ ۔ صاحب یمن = برکت والا جیہدے کول لوک دعا برکت Blessingواسطے آون ۔چِت = دل ۔خیال ۔کرامت = کرنی۔ ارادت = مریدی سبھانال۔ اخلاص نال ۔ ڈھڈوں صاف ہوکے۔