ورقہ 168

3115
جھولے وچ شاہزادہ سُتا اس نوں سُرت نہ کوئی
ملکہ کہندی نہیں جگاواں نیند کچی مت ہوئی
3116
میں واری جے مینوں کھاوے جان کراں قربانی
اس دا وال نہ ہووے ڈنگا نہ ہو بے ارمانی
3117
جہناں پیار محبت ہوندی ایسے صرفے کردے
سجن ستا نہیں جگاون آپ ہوون جے مردے
3118
خسرو نوں جد بیٹے اپنے زخم چلایا چوری
کاری پھٹ لگا وچ وکھّی ہوئی کلیجے موری
3119
جان کندن دی تلخی اندر بہت ہویا ترہایا
کوئی نہ پانی دیون جوگا کول اس ویلے آیا
3120
شیریں کول اوہدے سی سُتی اکدوجے انگ لائے
کرے دلیل منگاواں پانی ایسے نوں فرمائے
3121
پھیر کہے ایہ ہُن ہی ستی ناہیں بھلا جگانا
آپ مراں ترہایا توڑے اس نوں کے ہلانا
3122
وگیا لہو شیریں دے ہیٹھوں گرم لگا جاگ آئی
مُٹھی مُٹھیکہندی اٹھی شاہ نہ آپ جگائی
3123
اج زمانے یار کہاون دعوا کرن پیاراں
اپنی خےر منگن تے مارن نال دغے دے یاراں
3124
یاری لاون جان بچاون کرن کمال بے ترسی
ہک مرے ہک ہسدا وتے اوہ جانے جے مرسی
3125
بھیناں دھڑیاں سیس گندا ون ہوون ویر کھڑاکے
ویر ویرے گل پچھداناہیں مرن لگے نوں جاکے
3126
ناری اتوں کرن خواری بھنگ گھتن وچ یاری
یار یاراں دی رتو نہاون موج زمانے ماری
3127
جے ہک ہووے انباراں والا صاحب دولت زردا
دوجا کول مرے جے بھکھا نہیں مروت کردا
3128
سکیاں ویراں بھیناں تائیں پَیریں کاٹھ پوائے
عیب گناہ ڈٹھے بن اکھیں ہتھیں سوٹے لائے
3129
ماں پیو جائے ویر پیارے بھیناں آپ کوہائے
ناریں کنت اضائعیں کیتے بھابیاں دیر کھپائے
3130
جتھے سپ اٹھؤاں ہووے یا کوئی آفت بھاری
سجناں ٹورن آپ نہ جاون واہ اجوکی یاری
3131
جے ہکی گھر روٹی ہووے دکھ دوئے نوں لگے
ہر تہمت بدنامی دے کے چغلی مارن وگے
3132
ویراں بھیناں تے بھرجائیاں سبھناں دی گل بھائی
ہُو بہو دسالاں ساری ورتی جس جس جائی
3133
پرایہ پردہ ظاہر کرنا ناہیں کم فقیراں
کھڑی محبت رب محمدوِیر نہ بھاون ویراں

لفظالی:
جھولے = جھول ے وادھو پوٹھو ہاری لہجے وچ، جھول = جھولی ، سُرت= ہوش ، مت = متاں، میں واری= میں صدقے جاواں ، بے ارمانی = بے آرامی، صرفہ = ہمدردی۔ دریغ، خسرو= ٹ ک تفصیلاں، کاری= کم کر جاون والا، مہلک، جان کندن= نزع ، توڑے = بھانویں ، مُٹھی مٹھی= ہائے ہائے میں لُٹی گئی، وتے = پھرے، اوہ جانے= کوئی پرواہ نہیں ، دھڑی=(١) والاں دے سواندھے وچ سندھور دی سہاگ نشانی، (٢) پُڑپُڑیاں تے گُندھے وال، سیس گُنداون= نائین کولوں میڈھیاں تے گُت کراون پھل پتیاں نال سریر نوں سجاون ، کھڑا کے ہوونا= آخری دماں تے ہوونا ۔ گھور ڑو وجنا، بھنگ گھتنا= دشمناں والیاں کرتوتاں کر کے دوستی توڑادینا، موج زمانے ماری= زمانے نوں کوئی پرواہ نہیں سگوں موجاں پیا کر دااے، انبار=گودام۔ ڈھیر، کاٹھ = لکڑے دے شکنجے جنہاں وچ پِنّیاں پھسا کے کس دتیاں جاندیاں سن ۔ چابی نوں گھمائیے تے شکنجہ کسیا جاندا سی تاں ملزم دیاںچیکاںنکلدیاں سن، اضائعیں= ضائع، دیر= دیور، کھڑی = لے گیا اے، وِیر= بھرا،