ورقہ 171

3172
ہک ہک وچ نگاہ اوسے دی روزی نت پُچاندا
ہر ہر دی اس قسمت لکھی لِکھیا پاس نہ جاندا
3173
جون ہزار اٹھاراں تائیں دے کے رزق سنبھالے
کیا بیکار اسمتّر شوہدے کیا کمایاں والے
3174
ہکناں آس اُسے دے درتے ہکناں تک کمایاں
ہکناں بہت کمایاں کرکے آخر آن گوایاں
3175
ہِک عالم ہِک فاضل مُلاں ہک حافظ ہک قاری
ہِک قاضی ہِک مفتی بہندے سر دھر پگڑی بھاری
3176
ہک زاہد ہک صوفی مفتی بندے ہک نمازی
ہکناں روزے دار کہایا شیخی بے اندازی
3177
شیخ شیوخ مربی مرشد پِیر بنے ہک بھارے
ہکناں طلب بہشت ونجھن دی ہک دوزخ ڈر مارے
3178
ہکناں مدھ محبت والا پیتا پُور پیالا
مست بے ہوش و تن وچ گلیاں نہ کجھ ہوش سنبھالا
3179
ہکناں اوگن ہار کہایا پر تقصیر گناہی
گل پلّاتے گھاہ موہیں وچ متھے داغ سیاہی
3180
چور اچکے ٹھگ اسمتّر جُوئے باز زناہی
سبھناں آس تیرے در سائنیا کرسی کرم الٰہی
3181
چوری یاری ٹھگی موٹا بدن حرام کبابوں
کرکر توبہ مڑمڑ بھناں مستی چڑھی شرابوں
3182
سبز لباس فقیراں والا سر ٹوپی گل الفی
باہر دِسے ویس اُجالا اندر کالا کلفی
3183
ہر صورت ول مائل ہووے غالب نفس اجیہا
ہر دم تازہ چاء بُرے دا کدے نہ ہوندا بیہا
3184
جو جو عیب جگت وچ بھارے سبھے میں در آئے
کیہڑے کیہڑے گِن گِن دساں انت نہ پایا جائے
3185
اوگنہار کُچجی کوہجھی لونڈی لٹ نکاری
خاوند مُل خریدی سیوّ دے کے قیمت بھاری
3186
گنجی کانی لوہلی ڈوری تیز زبان چراکی
بے پرہیز آمیز کریندی وچ پلیدی پاکی
3187
ہے بدنیت پریت نہ پالے کُوڑ زبانوں بولی
دھن خاوند جس رد نہ کیتی بد اجیہی گولی
3188
خوبی خاوند دی کے دساں شالہ جُگ جُگ جیوے
حوراں پریاں اس پر ڈگن جیوں پتنگے دیوے
3189
بھلیاں بھلیاں درپر کھلیاں نک رگڑن وچ تلیاں
نوشہ پرت نگاہ نہ کردا کجھ پروا نہ ولیاں
3190
میں نکاری اوگنہاری کے منہ لے کے جاواں
طلب دیدار ہزار کھلوتے کِت گُن درسن پاواں

لفظالی:
پاس نہ جانا= پاسے نہ جانا۔ حرف بہ حرف لکھے تے ای عمل کرنا، اسمتر = اساں ماتر، ساڈے جیہے ہماتڑ ، تک کمایاں = اپنے عملاں تے نظر اے ، الفی=مسلمان فقیر دے گل پیا لمّا کُڑتا جہدیاں باہواں نہ ہوون الف وانگوں لمّا کُڑتا ، گل پلا= پچھلے زمانے وچ گناہی مجرم جے معافی منگنا چاہے تے اوہ اپنے گل پلا مُنہ وچ ہری گھاہ دے کجھ تیلے وی لیندا سی مطلب ایہہ پئی میں تیرا ڈنگراں ورگا غلام ہاں جو سلوک وی کرنا چاہیں میں حاضرآں، کلفی= خضاب وسمے رنگا، لٹ = لُٹّر۔ آوارہ لوفر۔ لٹی ۔، چراکی= ہر ویلے چُر چُر کرن والی ۔ چپ نہ رہن والی ، آمیز کر یندی = بھوگ کراوندی ۔ نال سوندی، کِت گُن=کس صفت پاروں ، درسن = دیدار ، جُگ جُگ= ٹ ک تفصیلاں، تلیاں = پیراں دیاں تلیاں ،