ورقہ 176

3267
سراندیپ شہر دا والی ہے ہک بھائی میرا
اس گھر دھی پیاری آہی حوروں حسن گھنیرا
3268
باراں برس ہوئے اس چھپیاں چائی کسے بلائے
اس دا پتہ نشانی کوئی اج دن تیک نہ آئے
3269
نہ دس بُجھ نہ ظن کسے تے عاری ہاں تدبیروں
توں بی بہتیں جائیں پھریا میں بی سگھڑ وزیروں
3270
نہ کوئی کھوج نشانی لدھی ایسی آفت چُکی
اُکی خبر نہیں اج توڑی زندی یا مرمکی
3271
تھاں کتھاں ڈٹھے تدھ چندیں دیو دیواں دیاں جائیں
مت کوئی معلم ہوئے تینوں پتہ اسانوں پائیں
3272
سیف ملوک پُچھے کے آہا نام اوہدا میں پاواں
تاج ملوک کہیا ہے اس دا ملکہ خاتوں نانواں
3273
شاہزادے فرمایا شاہا ہووے مبارک تینوں
ملکہ خاتوں چنگی بھلی خبر پکی ایہہ مینوں
3274
تاج ملوک کہیا دس جلدی ہے اوہ کیہڑی جائے
تیرے اسیں غلام ہوواں گے جے سانوں ہتھ آئے
3275
سیف ملوک کہیا سن شاہا ہے نیڑے اوہ رانی
باہر شہروں ندی کنارے ویکھو جا فلانی
3276
تاج ملوک ہویاں دل خوشیاں سن کے خبر جگردی
تتے تا طبیعت اٹھی ساعت صبر نہ کردی
3277
سنے وزیراں خدمت گاراں تُریا اُٹھ شتابی
اوس پتے تے ڈھونڈن لگا جاکنارے آبی
3278
لشکر فوج رہیا سبھ پچھے شاہ نوں چامل چایا
ہک ہکلا بھجدا بھجدا اس جائی پر آیا
3279
اگوں ملکہ نظری آئی تاج ملوکے تائیں
اٹھ سلام کریندی چاچے رُنی پاکہائیں
3280
چاچے نے گل لائی بیٹی دوئے ہنجوں روندے
شکر الحمد گزارن رب دا صدقے صدقے ہوندے
3281
تاج ملوک نہ میوے جامے بدن پھُنڈا یا شادی
میر وزیر رلے آپچھوں ہوئی مبارک بادی
3282
ملکہ نوں پوشاک لوائی زیور بادشہانہ
ڈولی پا گھراں نوں چلے پھر یا نیک زمانہ
3283
خوشیاں دے دروازے کھُلّے مارے طاق غماں دے
ڈولی اتوں مُہراں موتی صدقے سُٹدے جاندے
3284
حرماں اندر خبراں گیاں کرماں موج اٹھائی
استقبال کرو اُٹھ سبھے ملکہ خاتوں آئی
3285
ہر بیگم ہر گولی بی بی نونہاں دھیاں بھیناں
میر وزیر سبھس دیاں حرماں لازم ہویا وینا

لفظالی:
والی= مالک ۔ بادشاہ، گھنیرا= چوکھا، چھپیاں= گواچیاں، دس = کسے دی دِتی اطلاع ،بُجھ= اپنی عقل توں معلوم ہوئی اطلاع ، عاری= قاصر ۔ عاجز ، اُکی= بالکل ، کتھاں = غیرمناسب تھاں، مت =شاید، پاواں = معلوم کراں ، جائی= تھاں تے، جا= جگہ، تتے تا= اوسے ویلے۔بغیرکسے ڈِھل مٹھ دے، چامل چایا= جوش جذبے نے ٹُنبیا، رُنی= روئی ، کہائیں پانا= کہائیں گھتنا، ماتم ورگا کہرام مچانا، جامے نہ میوے= جامے میں پھولا نہ سماوے،شادی = خوشی نے، پھُنڈایا= پھُلایا، طاق= آلے ۔ محرابی جھروکے، حرماں = بادشاہ دیاں بیویاں ۔ ستر والے گھراں دیاں عورتاں ، گولی = کنیز، بی بی = معزز عورت جہدے اگے گولیاں کم کرن ، وینا= جانا،