ورقہ 177

3286
استقبال اوہدے نوں ڈولے شہروں باہر آئے
زیور زیب شہانہ یارو انت نہ کیتا جائے
3287
باہیاں سونے چاندی آہیاں خوب اچھاڑ بناتی
کلس کنارے جھل مل کردے سچے موتیں ذاتی
3288
ڈولی ویکھ اِس ڈولے یارو ڈولے چِت دلیراں
تک بابت دل رہے نہ ثابت بھجدی شیری شیراں
3289
ماسی پھپھی چاچی تائی بھیناں سنگت سیاں
رو رو ملکہ دے گل مل کے لے گھراں نوں گیاں
3290
شادی دے شدیانے وجے ملی مبارکبادی
گئی گواتی رب لیاندی پھر ملکہ شہزادی
3291
ہر سوانی بی بی رانی دھانی لے نذرانے
زیور بیور نقد تریور گلئیں رُلے شہانے
3292
کر عزت اکرام ہزاراں نال تمام آئینے
ملکہ خاتوں اندر آندی ٹھنڈ پئی وچ سینے
3293
تخت اتے شاہزادی تائیں گھر دے لوک بہالن
مڑ مڑ پھیر ہٹھاں سی ڈھہندی جے سو پگڑاُ ٹھالن
3294
پچھن لگے گل سفر دی بی بی دس کہانی
باراں برس ہوئے تدھ چھپیاں کس کس طرح دہانی
3295
کے کجھ قید مصیبت جھاگی کیڈک رنج سفر دے
کیکر رب خلاصی بخشی آیئیں طرف اِس گھردے
3296
اسیں فراق تیرے وچ روندے نیناں نیند نہ پائی
رب معلم کے جانے عالم ظالم روگ جدائی
3297
بابل مائی بھیناں بھائی رات دِینہاں تدھ روندے
جے کجھ پتہ اوہناں نوں لبھدا سبھ تصدق ہوندے
3298
کُکھ مائی دی تیری جائی دکھ بھرے سُکھ بھاگے
چِٹا پُونی رنگ ہویا سو سُک ہوئی جیوں دھاگے
3299
کھاون لاون بھاون ناہیں جاون جگر جنہاں دے
ماپے کرن سیاپے دل وچ رہندے تاپے ماندے
3300
سیاں تدھ بن نگھرگیاں ملّیاں منجیاں جِھکیاں
ہک مویاں ہک ہویاں خفتی ہک جوبن دے وِکیاں
3301
اندر داغ وچھوڑے والے کالے وانگن لالے
رنگ پہناوا انگ پشاکاں جگر وچوں پرکالے
3302
ہسن کھیڈن سوہلے گاون سیس گنداون بُھلے
جھلیاں ہویاں گلیاں اندر چلیاں نیں سرکھلے
3303
سرمہ پاون مہندی لاون وٹنا تیل ملاون
ٹِکا دھڑی دنداسہ شیشہ ماسہ کسے نہ بھاون
3304
وین کرن دن رین غماں دے چین گیا سبھ سنگوں
جس گھر شمع نہیں کد ملکہ مجلس ہوئی پتنگوں

لفظالی:
ڈولے =پالکیاں، باہیاں = ڈولے دے لمے رُخ دے بازو، اُچھاڑ = ڈولے تے پائے غلاف، بناتی= بانات دے کپڑے دے، کلس= ڈولی دی چوٹی تے بنیا مخروط، ذاتی= جنس دے لحاظ نال ، ڈولے = ڈول نال، ڈول = طریقہ ترکیب ، ڈولے = قائم نہ رہے ، بابت = ڈولی وچ آئی شے یعنی ملکہ خاتوں، بیور = کپڑیاں دا زنانہ جوڑا ' کڑتی دوپٹہ، تریور= کُڑتی دوپٹہ تے سُتھن ، آئینے = پروٹو کول ، وہانی = گذری بیتی، کیڈک = کِڈے کو ، تصدق=صدقے واری ، تیری جائی = تیرے تھاں تے، تاپے ماندے رہنا= تاپ نال منجی تے پیا رہنا، نگھر جان= ہولی ہولی تھلے ڈب جانا،جھِکیاں منجیاں ملّیاں= ڈِھلّی تے تھلے لمکے دان والی منجی ملنا سوگ دی علامت اے ، جوبن دے وکیاں = حسن قربان کر کے نڈھال ہو گئیاں ، پرکالے=ٹکڑے ٹوٹے بیرے، دھڑی= بُلاں اتے مِسی دی لکیر، ٹکا= متھے تی لمکیا گہنا،