ورقہ 178

3305
تیر تیرے دا چیر کلیجے ویر پھرن جیوں پھٹے
تنگ حیاتوں آکھن واتوں ملکہ خاتوں پٹے
3306
درد فراق تیرے جو ملکہ کیتی بھاء اساڈے
گذر گئی جِس ہونا آہا مار سہائی ڈاہڈے
3307
خبر نہیں سر تیرے اُتے کیکر کیویں وہانی
کت سبب خلاصی ہوئی آ دسیں کھول کہانی
3308
ملکہ کھول سنایا قصہ دفتر پھول غماں دا
رب سبب بنایا مینوں سیف ملوکے آندا
3309
ظالم دیو وڈے دی قیدوںاس ویرے چُھڑکائی
حکم ربے دا ہمت اس دی ہور سبب نہ کائی
3310
جیہڑی نال میرے اِس کیتی جاندی نہیں مکائی
کرنی اس دی مینوں دِسدی قیمت کون چُکائی
3311
سکے بھائی ماں پیو جائے نہیں مینوں اِس جیہے
جس نے میرے کارن کیتے کارن سخت اویہے
3312
وال اُہدے توں گھول گھُمائے سے بھائی لکھ بھیناں
سر بھی کٹ تلی تے رکھاں جے اس ہووے لینا
3313
جس قیدوں چھڑکایا اس نے میں نمانی تائیں
جنگ نسنگ ہویا سنگ دیوے کیتوس مار اضاعیں
3314
سکیاں بھائیاں والی نظرے رہیا میرے ول تکدا
ساہویں اکھ نہ کرے حیاؤں اُچا بول نہ سکدا
3315
جے کجھ خوبی اس نے کیتی ہور نہیں کوئی کردا
جے کوئی سکا میرا ہوسی رہسی اس دا بردہ
3316
اس دا حق مکاون جوگی نہیں میری کُل ساری
میں پر ہے وڈیائی اس دی حدوں بے شماری
3317
سیف ملوک ایہدا ہے ناواں مصر شہر دا والی
وِیر اصیل دھرم دا بھائی ہر ہر عیبوں خالی
3318
مینوں پھڑ پھڑ تخت بہالو اس بن کیکر بہساں
جاں جاں اوہ دلشاد نہ ہووے میں دُکھیاری رہساں
3319
تاج ملوک سنی گل ساری جو ملکہ فرمائی
سیف ملوک سدایا محلیں بُہت کیتی وڈیائی
3320
نونہاں دھیاں حرماں تائیں سبھناں نوں فرمایا
سیف ملوکوں مُنہ نہ کجو جانو ماں پیو جایا
3321
نہ کوئی بی بی چھپے اس تھیں نہ کوئی پردہ تانے
ایہ فرزنداں نالوں چنگا ہے اساڈے بھانے
3322
ملکہ خاتوں بیٹی ساڈی اس تھیں کیہڑی چنگی
اس نے اس نوں ویر بنایا دور کیتی دورنگی
3323
تاج ملوک تخت تے بیٹھا ویہڑا فرش سُہایا
سیف ملوک برابر اپنے سجے پاس بہایا

لفظالی:
پھٹے = پھٹڑ۔ زخمی، واتوں= مُنہوں ، بھاء = بھاگ ، سہائی = برداشت کروائی، ڈاہڈے =جبار ۔ غالب رب نے،دفتر = وڈا رجسٹر ۔ ریکارڈ ، چھُڑکائی=آزاد کرائی، مکانا= بدلہ دے کے حساب چکا دینا، کرنی = عمل ۔ معجزہ ، ساہویں = سامنے ، وڈیائی= احسان، خوبی =نیکی، بردہ= زر خرید غلام ، کل = پیڑھی نسل خاندان،اصیل = خاندانی۔ چنگے اصلے والا، وڈیائی = تعظیم ، ماں پیو جایا= سکا بھرا، بھانے = خیال وچ ۔ رضا وچ، دورنگی = دوئی، پاس = پاسے،چِیر= تِیر دے وِنھن نال بنیا پھٹ، جوکیتی= بُہت بُری کیتی اے،کارن= (١) لئی ۔ واسطے(٢) کم کارنامہ ، اویہے= بے مثل غیر معمولی،