ورقہ 179

3324
کھبے پاسے ملکہ خاتوں بیٹھی ہو خوشحالی
شکر ہزار گزارن سارے کرم کیتا رب والی
3325
سرخ شراب یا قوت پیالے آن ہوئے پھر حاضر
تُرت ببرچی جا ٹکائے کھانے نادر نادر
3326
شربت مِٹھے پین پیالے ہور شراب پرانے
کھان پلاکباب فلودے رنگ رنگاں دے کھانے
3327
عشرت عیش ہوئی سبھ حاصل کجھ نہ رہیا باقی
خوش آواز سرود الاپن سوہنے مطرب ساقی
3328
بارھیں برسیں ڈُبا بیڑا مولیٰ بنے لایا
جیوجیو خوشی مراداں اندر ہویا چین سوایا
3329
سیف ملوکے وانگ کلی دے باہر روپ سُہاوے
پر اندر وچ داغ پری دا دھوتا مُول نہ جاوے
3330
موہوں کوک پکار نہ کردا آس ربے ول لائی آ
اَیسے درد پچاون ہسدے واہ مرداں دا دائیا
3331
پیون کھاون سُندے گاون خوشی کماون سارے
فضلاں دے دروازے کھلے طاق قہر دے مارے
3332
کاغذ لکھ دوڑایا قاصد سر اندیپ شہر ول
خیر خوشی دی خبر پُچائی ملکہ جیودے گھر ول
3333
سیف ملوک شہزادے اُتے تاج ملوک ترٹُھا
کرے تواضع باہر حدوں کرد احسانے کُٹھا
3334
راتیں دِینہاں خوشیاں کردے ہر دم دل پرچاون
سیف ملوک شہزادے اتوں صدقے ہوہو جاون
3335
شمع جلان پلان پیالے مجلس لان پیارے
عطر عبیر گلاب صندل دے بہت کرن چھنکارے
3336
عود وجود جلائے آتش بود نابود بنائے
دُود اپنادے سُود دوئے دا دل خوشنودکرائے
3337
تار ستار ست تار بجائے واہ ستّار چتارے
کھول دتے رب باب کرم دے چنگ رباب پکارے
3338
سارنگیاں سارنگ الاپن ایسا رنگ بنایا
طبلے پُر خوشبوئی خوشی تھیں خالی پیٹ پھلایا
3339
تاڑی رات خوشی دی تاڑی مارے خوب پٹاکے
چٹکی چِٹکے چائی کہندی چھڈو ہور لٹاکے
3340
ہر ہک دے دل خوشیاں موجاں غم نہ آہا ماسہ
سیف ملوکے دا دل گھائل باہروں کُوڑا ہاسہ
3341
پین شراب شتاب پیالے کردے نُقل کبابوں
دس راتیں دس روز گزارے خوشیاں باہر حسابوں
3342
محلاں اندر دوئے شہزادے مانن عیشاں موجاں
آدربار تخت پر بہندے کرن سلامی فوجاں

لفظالی:

خوشحالی= چنگے موڈ وچ، گزارن= ادا کرن، نادر= انوکھے ۔ نویکلے ، کجھ نہ۔۔۔۔۔۔= عشرت والی کوئی آئٹم باقی نہ رہ گئی ، بارھیں برسیں ۔۔۔۔۔۔ = حضرت غوث الاعظم دے معجزے ول اشارہ اے ، پچاون = انج جھلن کہ دوجے نوں پتہ ای نہ لگے، ملکہ جیو= ملکہ صاحبہ، ستّار چتارے= اللہ نوں دل وچ یاد کرے، دائیا = عزم ۔ ٹیچا goal, Target، طاق = جھروکے دی باری ۔ چھوٹے دروازے، ترُٹھا= ڈھڈوں راضی ہویا ، کرد= کارد ۔ چھُری ، چھنکارے= چھڑکاؤ ، عبیر= عنبر۔ زعفران کستوری گلاب نوں رلا کے بنایاگیا دھوڑا۔ عود= کالی لکڑ جیہڑی اپنی ہستی نوں ساڑ کے ماحول وچ خوشبو کھلار دی اے ۔ دُود= دھواں ۔،سُود= فائدہ، ست تار= (١) ساز کے تار(٢) سات سُر(٣) ست تالاں ، تاڑی = چنگی طرحاں ڈِٹھی ، لٹاکے= دنیاوی تعلقات ، سارنگ = دوپہر دا راگ،بُود= ہستی ۔ وجود ، نابود بنایا=ہستی مٹا دِتی، چُٹکی = انگوٹھے تے وچلی انگل نال کڈھی آواز ، چِٹکے چائی= عشق نے چُکی ہوئی،