ورقہ 184

3419
استقبال اوہدے نوں چلے ملکہ دا پیو مائی
نالے میر وزیر اکابر سارے ساک اشنائی
3420
واسط ول روانہ ہوئے قاصد گیا اگیرے
تاج ملوک تائیں جاکہندا سن شہنشاہ میرے
3421
ایہ تک آیا بھائی تیرا لشکر نال ہزاراں
حرم قبیلے نال تمامی انت نہ ناتے داراں
3422
سیف ملوک شزادے تائیں استقبال کریندے
سر اندیپ شہر دے سارے آون صدقے دیندے
3423
تاج ملوک شہزادہ تُریا اگوں ملن اوہناں نوں
سیف ملوک سخی تے ملکہ کھڑیا نال دوہاں نوں
3424
ہور وڈے امراء اکابر عزت والے سارے
میلے کارن چلے اگیرے جاگے بھاگ نیارے
3425
دوہاں ولاں تھیں تُردے آئے آن ملے ہک جائی
خوشیں ملنے دی گل ساری جاندی نہیں سنائی
3426
ہک دوجے گل لالا ملدے شاہ امیر تمامی
سراندیپ شہر دا والی لئے مبارک کامی
3427
ملکہ نوں گل لاکے رُنے مائی باپ ہُسیرے
مائی کہندی گھول گھمائی سرچمے ہتھ پھیرے
3428
خویش قبیلہ بھیناں بھائی قوم رلی سی ساری
ملکہ اتے صدقے جاون مِل مِل وارو واری
3429
شکر بجا لیاون رب دا کہندے حمد ثنائیں
گئی گواتی جس ملائی واہ اساڈا سائیں
3430
سیف ملوک شزادے اگے ہوئے پھیر سلامی
شاہ امیر کبیر تمامی کرکے رسم غلامی
3431
وارو وار ملن سر کردے سرکردے قربانی
لاکھ ہزاراں کرن نثاراں دیناراں زرکانی
3432
ملکہ خاتوں دا پیو ملیا سیف ملوکے تائیں
گل لاوے تے منہ سرچمے لکھ لکھ دئے دعائیں
3433
ملکہ خاتوں دا پؤ مائی چرکے ملے وراگے
خوشیوں دونے ہو ہو جاون ستے طالع جاگے
3434
ایسے وکے شزادے اُتے انت نہ کیتا جاوے
سر اندیپ شہر دے سارے پھڑ پھڑ لین کلاوے
3435
کر عزت تعظیم ہزاراں جاہ جلال گھنیرا
تاج ملوکے دے گھر آیا سبھ اکٹھا ڈیرا
3436
عشرت عیش فراغت اندر ہو بیٹھے مشغولی
بھین بھرا امراء اکابر کٹھی قوم سمولی
3437
تاج ملوک کہانی ساری سیف ملوکے والی
الفوں لے لگ ییئے توڑیں زبروں زیر دسالی

لفظالی:
مبارک کامی= مقصد حاصل ہوون تے مبارک بادی،ہُسیرے = ہُسڑے ہوئے ۔ افسردہ، سائیں = مالک، سرکردے= معتبرمختار امیر درباری، نثار=نچھاور سکیاں دی سوٹ ، زرکانی = کان توں نکلیا خالص سونا، چر کے = بڑے چڑ پچھوں ، وراگے =وچھوڑے دے مارے ہوئے، وِکے = قربان ہوئے، کلاوے لینا= دوہاں بانہاں وچ گُھٹ کے گلوکڑی پانا،سمولی = ساری دی ساری، لے لگ = لے کےحرم قبیلے = بادشاہ دے دھولر وچ داخل سب بیویاں ، ناتے دار= رشتے دار، میلا= میل ہوون دا فنکشن ، ولاں = طرفاں ، ہک جائی= اک تھاں تے ، ،