ورقہ 185

3438
جزم اوہدی کر نقطہ نقطہ پیش قضےے شداں
پائی فتح غنیماں اوپر ضم عاصم دیاں مدّاں
3439
عشق بدیع جمال پری دا شاہ مہرے دی خوبی
اوّل آخر تیک سنایا غلبہ تے مغلوبی
3440
ملکہ نال مروت اس دی پاکی غیر دلیلوں
نالے دے گواہی ملکہ مرد شریف اصیلوں
3441
علم حیا پرہیز صفائی قوت صدق دلیری
سے مرواں تھیں وڈا دایا سے شیراں تھیں شیری
3442
سے دیواں پر غالب ہوسی ایس جنے تے باور
سے ماراں سنساراں اتے ہے تحقیق زوراور
3443
اس دیواں نوں مار گوایا دیواں میں گواہی
سے دیواں پر بھارا راکس کُٹھا ایس سپاہی
3444
ایسا دیو مریلا اس نے مار گوایا جلدی
سے دیواں پر جس دی آہی زور دُہائی چلدی
3445
آفت ہور سنسار وڈیرا مار ندی وچ پایا
لوہو جس دے نال تمامی دریا ٹھاٹھیں آیا
3446
میں دو برس ہوئے سنگ اِسدے وچ اجاڑاں نیراں
رتی میل نہ ڈٹھی اس وچ وانگر سکیاں ویراں
3447
ماں پیو خویش قبیلے تائیں ملکہ نے گل دسی
سب شابا اَحسنت پکارن واہ شزادہ جسی
3448
ایسا صدق محبت والا صاحب درد الم دا
عالی ہمت مرد وفائی گھٹ زمیں پر جمدا
3449
عجب طریقہ محکم اس دا دنیا وچ نیارا
ایسی سیرت ایسی صورت واہ واہ سِرجنہارا
3450
آفرین پکارن سارے عشقے عشقے شابا
دونویں شاہ دلاسا کر دے حدوں بے حسابا
3451
دھن بابل توں بیٹا جس دا دنیا اندر نادر
عاشق صادق عالم متقی سگھڑ دلیر بہادر
3452
ملکہ خاتوں دا پیو اس نوں دم دم نال ودھائے
کہندا بیٹا سیف ملوکا جو تدھ کرم کمائے
3453
ساڈے تھیں مک آوے کیکر ایہ تیری بھلیائی
بندہ زادی اپنی ملکہ توں قیدوں چُھڑکائی
3454
نیکی مہر مروت تیری جیکر چاہیا مولیٰ
میں بھی کُجھ مکاساں بیٹا نال طریقہ اولیٰ
3455
کیتی تیری کتے نہ جاسی اجر دئے گا سائیں
جے کجھ وس اساڈا ہوسی لاساں اوتھے تائیں
3456
ایہ گلاں کر ہوئے باندے کیتی پھیر تیاری
سراندیپ شہر نوں چلی بنی تنی اسواری

لفظالی:
جزم (١) ارادے دی پختگی (٢) حرف نوں ساکن دسن والی علامت ، نقطہ نقطہ= تفصیلاً اِچی بِچی (٢) مرکز (٣) حرفاں اُتے تھلے پئی بندی ، قضیہئ = جھگڑا ۔ بکھیڑا Problem(٢) جملہ فقرہ ، شدّ = (١) سختی شِدّت(٢) اک حرف نوں دو وار پڑھن دی علامت، فتح = (١) جِت ۔ غلبہ(٢) فتحہ ۔ حرف اُتے زبردی علامت، ضم = شامل کرنا۔ مِلانا(٢) پیش دی علامت ۔ادھی واؤ، مد= پھیلاؤ۔ کھچ کے لما کرن دا عمل(٢) الف نوں کھچ کے لما کرن دی علامت ، مروت=خالص انسانی ہمدردی پاروں کیتا گیا سلوک، غیردلیلوں = بُرے خیالوں، دایا= عزم ٹیچا Target goal، باور = اعتماد ۔ یقین ، مار = سپ ، سنسار = مگر مچھ ، راکس = راکشش، جنگلی شیطان جیہڑا دیوتیاں نال لڑے، جسیّ = نیک نام ۔جسونت ، اُولیٰ = سب توں اوّل بہترین، باندے=وکھرے۔ اکلے ، بنی تنی = سجی سجائی،