ورقہ 187

3476
تیر انداز سوار بہادر نیزہ باز سپاہی
کرن قواعد آپو اپنی جمع ہوئی سبھ شاہی
3477
سیف ملوک شہزادے کارن ہویا تیار الیما
کے حساب سناواں یارو سے اسباب عظیما
3478
سیف ملوک اگے ونج ہوئے حاضر سبھ تماشے
ملے سلامی میر شزادے افسر بے تحاشے
3479
ملکہ تے شہزادے اتے صدقے کرن نثاراں
چھم چھم برسن سُچے موتیں جیونکر مینہ بہاراں
3480
ایسے طرح نثاراں کردے ٹُردے نال بہاراں
ملکہ تے شاہزادے اگے مجرے ہون ہزاراں
3481
تخت اتے شاہزادہ بیٹھا خلقت چائیں جاندی
نغمے ناچ اگے سَے مجرے چمکے سونا چاندی
3482
سر اندیپ شہر دے سوہنے ہک تھیں ہک سوایا
صفاں بنا کھلوتے آہے جدوں شزادہ آیا
3483
آب گئی بے تاب دسیندے ہوئے شتاب سلامی
جیونکر مصر شہر وچ یوسف کجے حسن تمامی
3484
جیوں کنعانی مصر شہردے سوہنے خاک کیتے سن
اس مصری نے سر اندیپی قند پچھاک کیتے سن
3485
ملکہ خاتوں جس وچ آہی اوس کجاوے اگے
ناچ تماشے تے سر صدقے وہل نہیں ہتھ لگے
3486
شوکت شان اجیہی کردے آن شہر وچ پُہتے
انت حساب شماروں باہر دے سر صدقے بہتے
3487
سر اندیپ شہر دا والی نال لئیں شاہزادے
عالی تخت اپنے تے آیا دل وچ خوشی زیادے
3488
اپنے تخت اُتّے اس پھڑکے سیف ملوک بہایا
بدھے ہتھ کھلوتا آپوں خدمت گار کہایا
3489
ہک ہزار چنام منگائے کوتل گھوڑے تازی
سُم جالی دنب توڑی سبھناں زینت زردی تازی
3490
یوز ہزار شکار ازمودے چِیتے چیتے والے
ہور ہزار شکاری کُتّے مارن مِرگ سُکھالے
3491
تنبو خیمے سرخ قناتاں مُل جنہاندے بھارے
ستر ستر اشتر شتر لدے زر دے سارے
3492
ست صندوق زمرد موتی لعل جواہر ہیرے
چالیھ ہور صندوق پوشاکاں رخت قماش ذخیرے
3493
ایہ سبھ چیزاں شاہزادے نوں دتیاں کر نذرانہ
جو جو چیز پسندی آئی سارا ڈھونڈ خزانہ
3494
سنج اسباب ہتھیار فولادی جو لائق سلطاناں
ادھو ادھ دتا ونڈ سارا بادشاہی سمیانا

لفظالی:
الیما = ٹ ک صفحہ٣٨٥، بے تحاشے = (١) اندھا دُھند۔ (٢) چوکھے بے شمار، نثار = نچھاور۔ صدقے وجہوں اتوں سٹ کے غریباں نوں چُگن لئی سٹی گئی رقم ، مجرا= سلامی دی چوکی ( ناچ رنگ موسیقی دی) سے = سینکڑے ، آب = (١) عزت قدر(٢) چہرے دی رونق، اویہل نہیں ہتھ لگے = صدقے دے سکیاں دی اینی بارش سی کہ وصولن والے دے ہتھ نوں فرصت نہیں سی مل رہی ، چنام= چونویں مشہور نامی گرامی ، کوتل = نمائشی گھوڑے جیہڑے صرف جلوس یا سرکاری تقریب لئی پالے جاندے نیں ایہناں توں محنت دا کوئی کم نہیں لیا جاندا سگوں خوراک چنگی دتی جاندی اے ، جالی= جلا دین والے چمکدار، یوز= ہرن دے شکار لئی ورتیا جاندا چھوٹا چیتا، سُکھالے= سوکھے ای ، سِکھالے = سکھائے گئے سن، اُشتر= اُوٹھ، سنج اسباب = زرہ بکتر لڑائی وچ سریر نوں بچاون لئی ورتیندا سامان ٹ ک 396،قماش = ریشمی کپڑے ، سمیانا= سامان،قواعد= پی ٹی۔ ڈرل، شاہی= بادشاہ دی رعایا،