ورقہ 188

3495
ادھو ادھ دلوں ہو راضی باجھوں عذر بہانے
سیف ملوکے نوں ونڈ دتے ملک سپاہ خزانے
3496
سر اندیپ شہر دا والی دے کے دان زیادے
بدھیں ہتھیں عُذر منیندا کہندا سن شہزادے
3497
جو تدھ ملکہ پچھے جھلی رنج مصیبت دونی
حق تیرا اوہ مکداناہیں گوہڑے وچوں پونی
3498
کرکے کرم سخاوت بیٹا بخشیں وادھا سارا
اگوں بھی میں نوکر تیرا نہ کجھ عذر نہ چارہ
3499
جس جائی توں پانی ڈولھیں اوتھے رت ڈولھیساں
جس پاسے توں قدم اٹھاویں اودھر سیس جُھلیساں
3500
جتنا وس لگے گا میرا لاساں دلوں ایمانوں
جے مطلب ہتھ آوے تیرا فرق نہ کرساں جانوں
3501
سیف ملوک تخت توں اٹھ کے کرن لگا تسلیماں
دے جواب اس گل اوہدی دا وانگ اصیل حلیماں
3502
جیونکر رسم رسوم شہانی کرکے ادب آداباں
سیف ملوکے راضی کیتا شاہ نوں نال جواباں
3503
تاں پھر ملکہ دا پیو ہتھوں شاہزادے تے وِکیا
بخشی جاء علیحدی جتھے رہے سُکھلا ٹِکیا
3504
ماڑی خاص شہانی جو سی اپنے بیٹھن والی
اوتھے فرش سنہری کیتے مانجے وانگر تھالی
3505
وچ سونے دا تخت وچھایا لعل جواہر جڑیا
مجلس کارن نرم غلیچے انت نہ آوے اڑیا
3506
ماڑی دی تعریف نہ ہووے کے گل کراں زبانوں
دھرتی اتے آہی یارو مثل بنی اسمانوں
3507
چھت پرت کیتی استاداں ہر ہر تھاں ہزاراں
بوٹے تے پھل کھیل رنگاں دے باغ بہشت بہاراں
3508
شیشے لاون جھلک چوطرفے موتیں لٹکن چھجے
نقش نگار صفائی صُفیاں وہڑے رونق رجے
3509
سیف ملوکے دا اس جائی خوب سُہایا ڈیرا
لدھا شاہی راج حکومت اگلیوں کجھ ودھیرا
3510
سر اندیپ نگر دا والی کول اوہدے نت آوے
بہت خوشامد خاطر کردا کھیڈیں چِت بھُلاوے
3511
چوپٹ گنجفے تے شطرنجوں ہس ہس کردے بازے
بد رنگوں رب رنگ بنایا برسا بولے تازے
3512
پہلے ہتھ اٹھاراں اٹھے چھپ گئے ترے کانے
پنجے چھکے دوئے پوئے سبھ آون من بھانے
3513
ست ست واراں پین ستاراں دا رکھے جد اُ س دا
شاہزادے نوں شہ نہ آوے نہ جُگ پھٹکے کُسدا

لفظالی:
عذر مننا= معذرت کرنا، اپنے قصور دی معافی منگنا، وادھا= ادھ راج بھاگ سیفل نوں دتا گیا اے نال معذرت کیتی جا رہی اے پئی تیرا پورا حق ادا نہیں ہو سکدا تیرا ساڈے ول چوکھا وادھا اے اوہ بخش دئیں+ تفصیلاں، چھت پرت= اگوں پچھوں پھول کے ہر طرح دی مکمل پڑتال کرنا ، برسا= برشا برکھا ، برسات ، یک لخت اُتوں نازل ہوون والی شے ،من بھانے = جی دی خواہش سیتی ، گنجفہ= ٩٦ گول پتیاں دا کھیل،گوہڑا = رُوں دی اوہ مقدار جیہڑی پونیاں بناون لئی وکھ کیتی جاندی اے گوہڑے وچوں کئی پونیاں بندیاں نیں ، سیس جھلانا= رضا مندی وچ سر ہلانا، صُفہ = پرانے مکاناں دا نقشہ انج سی پِچھے دو یا تن کوٹھریاں ایہناں اگے سانجھا وڈا ہال کمرہ صفہ سی صُفے اگے کھلے تھاں دی چار دیواری نوں ویہڑا آکھدے سن،چوپٹ = چوسر ۔ جہدے وچ چار مستطیلاں اک مربعے تے آکے مِلدیاں نیں ،