ورقہ 191

3552
یا مرساں یا ترساں کدھرے کرساں سر قربانی
یامیلو یا لوڑو ملکہ جاندی مفت جوانی
3553
ملکہ خاتوں آکھ سناندی منت کرے پھڑ پَیراں
کہندی کرو تحمل بھائی جیوں دھیراں تیوں خیراں
3554
کیتوئی صبر تحمل اگے چوداں برس لمیرے
ہو رہن چودہ دن کرجگرا آئے بھلے دن تیرے
3555
صبر پیالہ زہر نوالہ اول مشکل بھارا
اوڑک نفع اجیہا کردا جیوں تریاق پیارا
3556
کوڑا منہ ُمصّبر کردا دین ہُبّک ہریڑاں
پرجاں سنگھوں ہیٹھ لنگھائیے دفع ہوون کئی پیڑاں
3557
کوڑا کھاون سوگُن پاون مِٹھا کھاون والے
خون غلیظ ہووے تن روگی تھوڑے رہن سُکھالے
3558
چوداں روز صبر کر بھائی جھلیں درد جدائی
بیٹھا پی شراب صبر دا کف غماں دی جائی
3559
اَلتَّانِیْ مِنَ الرَّحْمٰنِ تاؤل نہیں کریدی
دم دم خبر اسانوں آوے عجب جمال پری دی
3560
نور ظہور پری دے کولوں ہوسی دور ہنیرا
سر اندیپ ملک وچ سارے چانن ہوگ ودھیرا
3561
ہوسی باغ اساڈے اندر آپریاں دا ڈیرا
مشتاقاں دے بھاگ سوائے جدوں کرے گی پھیرا
3562
گھر در ساڈے ہوگ بہشتوں رونق روپ سوایا
اوہ بھی نوروں نور ہوئے گا جس کس درسن پایا
3563
جس دیدار نہ ویکھن ہویا نال افسوس جلے گا
عشقے باجھ نہ ڈٹھا جاسی عاشق جھال جھلے گا
3564
توہیں عاشق خاصہ اس دا آیوں چھوڑ ولایت
اس پچھے تدھ سرتے جھلی سختی بے نہایت
3565
میں بھی قسم خدا دی کرکے کیتی شرط پکیری
عجب جمال پری دے اگے عرض کراں گی تیری
3566
ماں میری تے بدرہ خاتوں اوہ بھی کھاون ہباّں
جے خیری ہن کیتا مولیٰ میلاں نال سبباں
3567
نال بدیع جمال پری دے سیف ملوکے تائیں
کٹھی اسیں ضیافت کرساں آکھن چائیں چائیں
3568
باپ میرا بھی قسماں کردا جاں وس لگا میرا
سیف ملوک دھرم دا بیٹا کرساں فکر بتیرا
3569
اسیں سبھو اس گلے اتے آپو اپنی جائی
شامل ہو کھلوتے آپے چنتا نہ کر بھائی
3570
دیسی رب مراداں تینوں شک نہیں اک ذرہ
نال بدیع جمال پری دے ہوگ وصال مُقرّہ

لفظالی:
ترساں = ترکے پار لنگھ جاساں ۔کھرا سمجھ کے قبولیا جاواں ، لوڑو = تلاش کرو ، جیوں دھیراں تیوں خیراں = جنی دھیرج حوصلہ کیتا جاوے گا اونا ای کم خیر خےریت بھلائی نال مکے گا، ہبک = ہمک ہمکار۔ بھیڑی جیہی مشک ، غماں دی کف جائی= غماں دی جھگ ختم ہو جاوے گی، التانی من الرحمن =دیر ڈِھل اللہ ولّوں ای اے، تاؤل = چھیتی ۔ (جلدی) شیطانی کم اے، درسن = درشن ۔ دیدار ، جھال جھلے گا= جلوہ برداشت کرے گا، عرض کرنا= درخواست پیش کرنا، بے نہایت = بے اوڑکی ، ہباں کھاونا= ( ہبھ ۔ سبھ) سبھاں نوں کھاون دی قسم کھانا ( چوکھاں یقین دوان لئی آکھیا جاندا اے میں بھرا نوں کھاواں جے جھوٹھ بولاں)،جائی = تھاں تے ،چنتا = فکر ۔ اندیشہمقررہ = لازمی طور تے Definitely،