ورقہ 193

3588
میر وزیر امراء شزادے شاہ سوداگر زادے
پنچ پنچایت اہل ولایت صدقے دین زیادے
3589
شاہزادے نوں ویکھن والے انت نہ رہیا کائی
ہک دوجے تے ڈھ ڈھ مردے عورت مرد لوکائی
3590
ہک چبارے وچوں ویکھن جھاکی کھول شتابی
گلیاں چھت بزار بنیرا خلقت بے حسابی
3591
سب کسے نوں مٹھا لگدا ہر ہک دے دل پُڑدا
خلقت تک تک رجے ناہیں کوئی نہ پِچھے مُڑدا
3592
ہک شزادہ دُجا سوہنا نالے سخی بہادر
نالے دور وطن تھیں آیا سفر ڈٹھے اس نادر
3593
حسن جوانی مدھ مستانی چہرے عشق نورانی
عمر اوائل ہوندا گھائل جو دیکھے اس جانی
3594
دانشمند اکابر نالے عالم فاضل راگی
خوش آواز کرے جس ویلے پِیڑ پرم دی جاگی
3595
ہر بندے نوں لگا پیارا جس جس نے اوہ ڈٹھا
جیہڑے صفت زبانوں کردے ہووے اوہناں منہ مٹھا
3596
سننے والے سن سن صفتاں عاشق ہون بتیرے
شاہزادہ وچ شمع نورانی خلق پتنگ چوپھیرے
3597
جے اوہ قدم اکھیں تے رکھے سبھ آکھن بسم اللہ
ہر کوئی دے دعائیں دل تھیں کوئی نہ کردا گِلّہ
3598
خلقت آکھے جو کجھ خوبی دنیا اتے آئی
جو جو صفت سلاہن والی خالق پاک بنائی
3599
جو بھلیایاں ودھ شماروں وچ کتاباں سُنیاں
سبھناں صفتاں وچ محمد ایہو سچ مچ گُنیاں
3600
جو کجھ زینت زیب بدن دا صورت حسن جوانی
ایسے کارن سرجی خالق دِیتوس کر ارزانی
3601
ویکھ حیران رہی سبھ خلقت تھاں بتھاں کھلوئی
سیف ملوکے دی اسواری شہروں باہر ہوئی
3602
رکھ شکار بہانہ ٹریا ہون جنگل دا واسی
صاعد دے اس درد فراقوں ہویا جی اداسی
3603
پری ولوں کجھ ہوئی تسلی وقت ملن دا آیا
چودھاں روزاں دا کر عرصہ ملکہ ذمہ چایا
3604
صاعد دی ہن چھک سینے وچ لین ارام نہ دیندی
ترٹی سانگ کلیجے اندر ہر دم رڑک مریندی
3605
شاہزادہ دل خَفگی اندر چُپ چپاتا جاندا
باہر شکاری دسے وچوں آپ شکار غماں دا
3606
صاعد نوں ہر ساعت اندر یاد کرے تے رووے
آکھے یارب سائنیا کتھوں ایڈ نصیبا ہووے

لفظالی:
پنچ پنچائت= پنچائت دے پنچ ( پنچاں وچ پر میشر منیا جاندا اے ایتھے مراد اے نیک لوک مخیر شرفا دیاں تنظیماں) ڈھ ڈھ = ڈِگ ڈِگ زیارت لئی بے چین ہون پاروں ڈگدے پئے نیں ، جھاکی = کھڑکی ، پڑُدا= کھُبھدا، مدھ = جوانی جوبن دی شراب، عمر اوائل = پہلی عمر ، پرم = عشق ۔ پریم، سلاہن جوگی = قابل تعریف ، بھلیایاں = نیکیاں خوبیاں، گُنیاں= گُنی ۔ وصف رکھن والا، سِرجی = تخلیق کیتی، ارزانی کر دینا = چوکھاتے مفت دینا ۔ عطا کر نا ، واسی = باشندہ، عرصہ کرنا= مہلت لینا ، چِھک = کھچ ، سانگ = وگاہتا مارن والا نیزہ Javelin، خفگی =گھُٹن ۔ غم غصےّ دی حالت، ساعت= گھڑی،