ورقہ 194

3607
صاعد یار ملے اج مینوں اچن چیت اس راہوں
جاوے داغ جدائی والا ہووے فضل اِلٰہوں
3608
اوسے سیر شکارے اندر پھردا سی شاہزادہ
کے تکدا ہک جائی بیٹھا مرد بڈھا ہک سادہ
3609
بیٹھا کول اوہدے ہور دوجا شخص جوان عمر دا
تن رنجوری اوپر بُھوری نہ تہبند کمردا
3610
لمے وال مداری وانگر لِٹاں بن بن آئے
نہ سرپگ نہ ٹوپی چولی منہ سرخاک رمائے
3611
پیریں پاڑ بیائیاں کیتے میل کیتا رنگ کالا
نقش سندر محبوباں والے مجذوباں دا چالا
3612
لاغر انگ ہویا سُک تیلا رنگ کیسر جیوں پیلا
اکھیں پانی ڈل ڈل ڈلکے برا غریبی حیلہ
3613
ہتھاں پیراں دے نونہہ ودھ کے نشتر وانگر ہوئے
بغلاں ہور حجامت والے لمے وال کھلوئے
3614
ہکو بھوری تِکلا اوپر اوہو لک دوالے
چُپ چپاتا بیٹھا ڈٹھا مجذوباں دے چالے
3615
نموں جھان حیران فکر وچ سر زانو تے دھریا
آیا نظر شزادے تائیں دھوڑ غماں دی بھریا
3616
جاں کر نظر ڈٹھا شاہزادے پیا بھلاوا عقلوں
صاعد وانگ نمونہ دِسے ہتھوں پیروں شکلوں
3617
کر تاکید ہزار ہزاراں کہندا شاہ نقیبے
لے چل ڈیرے میرے اندر اس مجذوب غریبے
3618
چیتا چیتا قابو رکھیں مت کدھرے اُٹھ جائے
جاں میں مڑکے ڈیرے آواں آن دسیں اس جائے
3619
لے کے حکم غلام شتابی پھریا جا چوپھیرے
دھر اگے مجذوبے تائیں آن بہائیوس ڈیرے
3620
شاہزادے نے تاؤل کیتی کیویں مڑکے چلاں
اوس غریب جنے تھیںپُچھاں حال اوہدے دیاں گلاں
3621
چامل چایا چاء چلایا گھوڑے چابک لایا
ہک اندر سی سِک سجن دی چھِک وراگ لیایا
3622
ڈیرے آن لتھا پھر جلدی فارغ ہو اشکاروں
آون سات غلاماںتائیں حکم ہویا سرکاروں
3623
حاضر کرو شتابی ایتھے اس مجذوب جنے نوں
خفگی دی گل پچھیے ساری خفتی رنگ بنے نوں
3624
خذمت گار گئے اٹھ جلدی پکڑ غریب لیاندا
شاہزادے دے تختے اگے جاں اوہ ہویا واندا
3625
کرے سلاماں وانگ غلاماں چم زمین ادب دی
کہے دعائیں صفت ثنائیں وانگ کلام عجب دی

لفظالی:

اچن چیت=اچنِھ۔اچیت،اچانک،جائی=تھاںتے،مداری=حضرت شاہ مدار دے ملنگ جہناں دے سردے وال بہت لمےّ ہوندے نیں،بیائی=ننگے پیردی اڈی وچ ات خشکی نال پیا پاڑ جومٹی گھٹا کلرپین نال زخم بن جاندا اے ۔مجذوب=چپ شاہ ننگے دھڑنگے ملنگ جہناں دا دھیان صرف رب ول ہوندا اے۔ڈل ڈل کرنا=ڈلہکنا،کسے مائع دا لشکنا، کنڈھیاں نال وج کے باہرآونا۔،غریبی حیلہ=پردیسیاں والا حال،تکلا=ترکل۔کنڈ۔کمر،غریبے=پردیسی نوں،نموجھان=نیم جان،حیران پریشان،زانو=گوڈے،خفگی =گُھٹن۔غم غصے دی حالت،چیتا چیتا=خیال کریں،آون سات=آوندیاں سارای،تاؤل=چھیتی۔کاہلی،چامل چایا=امنگ شوق نے چُکیا،وراگ=وچھوڑے دا درد،