ورقہ 5

تیز قدم دھر قُربت چلے بے بالایوں زیروں
پَون ندائیں وَدھ محبوُبا بے طرفوں چوپھیروں
صَوت حرُوفوں پاک ندائیں کاموں پاک زُبانوں
لکھ کروڑاں کوہاں دُراڈے بہُتے وَہم بیانوں
جو ڈِٹّھا سو ڈِٹّھا آخر جو پایا سَو پایا
ہوراں نُوں اِتھ دَخل نہ مُولے مُڑ پیغمبر آیا
رحمت نُور جہان کھلارے مَرضاں دِلاں گوائیاں
ڈُبدیاں جاندیاں کڈھ کرم تھیں بیڑیاں بنّے لائیاں
گُم گیاں نُوں راہ دِکھائے روگ کٹے بیماراں
تاریکی وچ چلدیاں تائیں ملیاں شمع ہزاراں
منزل مقصد چھوڑ وگیندیاں وچ شبہے نادانی
روشن راہ صفا دا پایا پائے دِل نُورانی
بے خبراں دیاں بے وَس جاناں پھسیاں وِچ حیرانی
ہو غافل وچ نفس امّارے رَس مِس ہوئیاں فانی
اصل بھُلا گُم گیاں سبھ تھیں اَندر سرگردانی
نَفسوں ذات گواہی بھَردیاں گوہر توڑ اِنسانی
اَچا چیت طبیب رُوحانی کھولے راز نہانی
وَل وَل موڑ ولوں گُمراہی نُور دِتے عِرفانی
واگاں وَل مقصود چلائیاں موڑ کُراہوں اوویں
واہ سیّد ثقلین محمد تَر گئے عالم دوویں
سبھ جہان اِکو دِی بَرکت نُور و نُور دَمکیا
فیض منداں دا دل آئینہ فرشوں عرش چمکیا
پیش قدم وچ عالم ہویا جس نے اوہ رُخ تکیا
ہے نیں لیکھ دُھروں جِس آہے اوہ خود ویکھ نہ سکیا
پاؤن ہاریاں سبھ کُجھ پایا منکر گئے ازائیں
احمد باجھ نہ ہندی پَید جنّت نار کدائیں
بہت صلوٰۃ سلام نبی تے آل سَنے اصحاباں
خاص خواص عزیزاں چاراں یار کبار احباباں
سبھ تھیں اوّل بعد نبّیاں صِدّیقاں وِچ اکبر
ابُوبکر بِن اَبی قحافہ نائب جائے پیمبر
عُمر خطاب خلیفہ ثانی اور فاروق پیارا
جِس دی تیغ عدالت والی کیتا ظُلم نیارا
ذوالنورین کرم دا پُورا ہے عثمان حقانی
حلم حیا غنا سخاؤں ہور نہ اُسدا ثانی
چوتھا زوج بتول بہادُر بو طالب گھر جایا
اسد اللہ الغالب غازی علی جو عالی پایا
حسن حسین دو صاحبزادے شاہ بہشت جواناں
زہرا بنت نبی دے جائے ایہناں وَڈیریاں شاناں
رِضوان اللہ حق تماماں آکھاں لکھ لکھ وَاری
رفض خوارج دوہیں جہانیں لَین فضیحت بھاری
حُب نبی دِی آل اصحاباں ہَے تاثیر اِیمانوں
مُنکر مُل گیا لَے دوزخ جاندی وار جہانوں
جیہناں دِلاں وِچ غیظ صحابہ حیف تنہاں اِیمانے
اوہ مصداق یُغیظُ بِھِم دے بھاویں کسے زمانے
یارَبّ نال طفیل ایہناں دی بخش اَساں بُریایاں
عفو کرم دیاں وچ دَرّیاواں ساڈیاں روڑھ کمایاں
نُور ہدایت کریں عنایت خوف رجا وچ رکھیں
عشقوں کریں منوّر سینہ روشن دِل دِیاں اکھیں