ورقہ 200

3721
اپنا آپ شزادہ دسے صاعد مول نہ منےّ
خبر نہیں اوہ کتھے رُڑھیا کس نے لایا بنےّ
3722
جیکر کِدھرے رُڑھ کُھڑ لگا ہوسی حال شکستے
ایہ کوئی شاہ ولایت والا فوجاں ملّن رستے
3723
دولت مند اقبالاں والا راج حکم اس بہتا
کیکر اوہ پردیسی شوہدا ایس مراتب پہتا
3724
صورت جیسی صورت ہوندی وانگ آواز آوازے
عاقل دانے سوہنے سندر بھلے بھلیرے تازے
3725
سیف ملوک نہیں توں بھائی صاعد کرے نہ باور
ہر ہر جا نشانی دسدا سیف ملوک اکابر
3726
صاعد نے فرمایا اوڑک ہک نشانی پکی
تد یقین لیاواں شاہا جے اوہ جاوے تکی
3727
سیف ملوکے دے وچ متھے آہا خال نورانی
اوہو خال ہووے اس سیدھے معلم ہووے نشانی
3728
شاہزادے دستار اُٹھائی متھا کیتا واندا
صاعد خال ڈٹھا جس ویلے ڈھہٹھا ہو درماندہ
3729
ہوش عقل سُدھ بُدھ نہ رہیوس مردے وانگ پیا سی
سیف ملوک ملیندا تلیاں تن تھیں تران گیاسی
3730
لے گلاب مریندا چھٹے سرمنہ سینے تائیں
عرض کریندا بار خدایا اس نوں پھیر بچائیں
3731
صاعد نے وت ہوش سنبھالی آیا جیو ٹکانے
شاہزادے دی پیریں ڈھٹھا چُمے قدم دھگانے
3732
کہندا شکر ہزار ہزاراں ڈٹھیوں پھر سکھّلا
کے کجھ شکر زبانوں آکھاں کرم کمایا اللہ
3733
صاعد تے شاہزادہ دونویں اُٹھ ملے گل لگ کے
سِج گئی پوشاک اکھیں تھیں ہنجوں نالے وگ کے
3734
سر اندیپ نگر دے شاہے نالے فوج رعیت
اہلاں حرماں تابعداراں ہوئی خوشی جمعیت
3735
گیا گواتا یار شہزادے مولیٰ پاک ملایا
سد حجام حجامت کیتی جا حمام نہایا
3736
قیمت دار پُشاک منگائی عطر اُپر چھنکایا
صاعد دے پھر بدن لوائی چڑھیا رُوپ سوایا
3737
نغمے ناچ ہوئے ہر کوئی سوہلے گاون آیا
چڑھیا روپ سوایا لالا کیسریاں رنگ لایا
3738
ہر ہر وال کڈھے چمکارے جیوں سونے دیاں تاراں
حسن بے انت بسنت پھلاں دی ویکھن لوک ہزاراں
3739
شاہزادے پھر کھانے منگے خدمتگاراں آندے
مدّت پچھے مِلے پیارے رل مل دونویں کھاندے

لفظالی:
راج = انتظامی اختیار، حکم = عدالتی اختیار، شُوہدا= بے چارہ۔ عاجز۔ مسکین ، بھلے بھلیرے = بہتر توں بہتر۔ چنگے توں چنگیرے' بھلیو بھلی اے، تازے=نویں توں نویں ، باور= یقین ، اوڑک = آخر کار، خال = تِل ، سیدھے= سیدھ رُخ وچ ، واندا= ننگا۔ ظاہر، درماندہ= کسے تھاں نہ جاون جوگا۔ مصیبت زدہ مجبور، تران = کجھ کر سکن دی طاقت ۔ سکت، گلاب = عرق گلاب ، سُکھلا= خیریں مہریں ۔ سُکھ نال، سِج گئی = بھج گئی ۔گِلی ۔ نمناک ہوئی، اہلاں = اہلیہ۔ گھر والیاں ، جمعیت= دلی سکون، پوشاک لوائی = کپڑے پہنائے، کیسری= سر دے لمے والاں والا ناچا۔زعفرانی رنگ دے دوپٹے، رنگ = رونق میلہ ۔ سنگیت ڈرامے دا انتلا سواد ،بے انت = بے اوڑکا،