ورقہ 201

3740
کھانا کھا ارامی ہوئے پیندے لال پیالے
کھِیوے ہوندے مڑ مڑ دھوندے داغ وچھوڑے والے
3741
صاعد نوں لے نال شزادہ ٹریا طرف محلاّں
کے کجھ آکھ سناواں یارو اوس خوشی دیاں گلاں
3742
ہوئے سوار نراں تے دونویں اگے دوڑے اردل
چالیھ شاطر بھجدے جاندے نال لباس مکلّل
3743
ہر شاطر ہتھ ہندی تیغاں قبضے جڑت سنہری
مُکےّ ڈھالیں کھلے گردے پھل سورج دوپہری
3744
پوشو پوش کریندے جاندے خلقت ڈھہ ڈھہ پوندی
واہ شزادہ تے واہ صاعد چاروں طرفوں ہوندی
3745
شوکت شان گھنیرا کر کے کروّ فرّ ہزاراں
صاعد دا رنگ روپ سُہایا جیوںگُل وقت بہاراں
3746
محلاں دے دروازے آندا کرکے ایہ وڈیائی
شاہ نگر دا اگوں ملیا نالے ہور لوکائی
3747
استقبال اوہدے نوں آئے شہزادے سرکردے
لکھ خاطر لکھ عزت کیتی والی اوس نگر دے
3748
سیف ملوکے دی پھڑ انگل سجے پاسے ٹورے
صاعد دا ہتھ کھبے پکڑے ٹُردے ایسے ٹورے
3749
جا سلطان تخت تے بیٹھا اوہ بھی کول بہالے
سجے پاس شزادہ بیٹھا کھبے صاعد نالے
3750
دتا حکم کلالاں تائیں سرخ شراب لیاؤ
کنجر اتے کلو نت میراثی خوب سُراں کر گاؤ
3751
تان ترانے کرن شہانے نغمے ناچ یگانے
سات سُراں تے تین گراماں گاون گُنین دانے
3752
پردے رود سرود خوشی دے گان بجاون سازی
پین شراب رباب سُنیندے مجلس ہوئی تازی
3753
حوراں ہار بہار بنائی خدمت گار بِریشاں
گُل رخسار سمن برلالے سُنبل وال پریشاں
3754
چیرے کلغی توڑے چمکن طلےّ دار دوپٹے
گھیرے دار نرم پِشوازاں گوہڑے رنگ اُلٹےّ
3755
مارن پھیرے گرد چو پھیرے روشن کرن ہنیرے
سُن آوازے تازے تازے ہوندے رقص گھنیرے
3756
زاہد صوفی ویکھ نہ سکدے اس مجلس ول دوروں
جو تکے سو جا نہ سکے تاب حسن دے نوروں
3757
جاں عیشاں وچ ہوئے سُکھلے دور ہوئی دلگیری
شاہ نگر دا پچھن لگا کر کے جِبھ مٹھیری
3758
صاعد بیٹا دس اسانوں حال حقیقت ساری
کس سبب بچایوں مولیٰ کیکر عمر گزاری

لفظالی:
ارامی= پُر سکون ، لال پیالے= شراب ارغوانی دے،کِھیوے= مخمور، نر= دیو مالائی گھوڑے، اردل= اردلی ،شاطر= کمانڈو راکھے۔ چاک چوبند پیادے، مُکلّل= ہیریاں جڑیا، ہندی تیغاں= سروہہ دیاں بنیاں تلواراں، مُکے= مُٹھ وچ، پھل = تلواردا کاٹ والا حصہ ، گردا = نیام، پوشو پوش= شاہی اسواری اگوں عوام نوں ہٹاون لئی نقیباں ولوّں لائی گئی آواز ہٹو بچو! فارسی مصدر پوشیدن توں کتے لُک چھُپ جانا،سرکردہ= زیادہ با اختیار امیر۔ بریش=الوئیں مُنڈے،کلال= شراب مہیا کرن والے، پردہ = سُردا مقام، سازی = سازندے، سات سُراں = سرگم ۔ سارے' گاما' پادھا'نی، رود سرود= تندی دی تارے دے ساز دا سنگیت، تین گرام = گویے دی آواز دے تن سپتک مندر۔ مدھ ۔تار، گُل رُخسار= گلابی گلہاں والے ، سمن بر= چنبیلی ورگی چھاتی والے خوشبو دار بدن والے ، پشواز= نچن والیاں دی گھیرے دار پوشاک، کلغی توڑے= ٹ ک 48، مِٹھیری= ذرا ہور مِٹھی،