ورقہ 203

3778
قہر تکے تے جھلے دھکے غوطے کھادے بہتے
لیکن لکھے دم عمردے اوڑک مول نہ پُہتے
3779
ندی اُچھل اجیہا لایا ٹلّا ٹاپو چڑھیا
مولیٰ صحےح سلامت مینوں خشکی اندر کھڑیا
3780
ٹاپو ویکھ ہویا دل راضی وانگ جنت دے کوچے
سرو 'چنار'انار کھجوراں ہور سفید الوچے
3781
فندق اتے عناب انجیراں داکھ انگوراںگُچھے
جو من بھاوے سویو کھائیے نہ کوئی ٹھاکے پُچھے
3782
ہندی میوے ہور ہزاراں گنتر وچ نہ آون
پک پک سبھ ہوئے رنگ رتے رس چوندے من بھاون
3783
ہور عجب ہک میوہ ڈٹھا اس ٹاپو وچ بھائی
وانگ انگورے گُچھا اس دا صورت شکل صفائی
3784
شام پوے دن ڈُبےّ جس دم جگ پر پھرے سیاہی
پتر چا لپیٹن گچھا قدرت نال الہٰی
3785
ساری رات رہے اوہ بدھا فجر ہووے پھر کُھلدا
بِیکا بِیک آواز اس رُکھوں نکلے بھارے مُل دا
3786
ہور درخت ہک میوہ اس دا وانگر شکل مُنکھاں
دِسدا آدم جیوں لٹکایا زلف بدھی سنگ رُکھاں
3787
ہر ڈالی پر ایہو جیہے میوے بہت رنگیلے
بیٹھے کھائیے من پر چائیے بن ہاڑے بِن حےلے
3788
میں بھی دل وچ نیت کیتی ایتھے رہن بھلیرا
میوے کھاساں وقت لنگھاساں سنگ نہ لبھدا میرا
3789
ہک دن اچن چیتی آیا نسناساںداٹولا
مینوں پکڑ لیا رل سبھناں پا گھیرا کر رولا
3790
چکڑی عُود لکڑ دا اوہناں پنجرا خوب بنایا
اس پنجرے وچ گھت کے مینوں نا ل رُکھے لٹکایا
3791
سارے میں ول بِربِر تکدے اوہناں شناس نہ کائی
آدم شکل پچھانن ناہیں اوہ نسناس لوکائی
3792
ایہ معلوم ہووے جے اینہاں آدم کوئی نہ ڈٹھا
اَنّ کباب نہ دیندے کھانا نہ کوئی میوہ مٹھا
3793
نیلا گھاہ گھتن میں اگے یا پھر سُکے دانے
کھوڑ بدام چھوہارے مچھی کھان آپوں ایہ کھانے
3794
دانے گھاہ نہ کھادے جاون بھُکھ کیتی لا چاری
پنجرے وچوں باہرآیوس کر کے بہت ہوشیاری
3795
خُوِرش اوہناں دی کھاون لگوس مچھی میوے پکے
ویکھ حیران ہوئے متعجب ہسےّ جیکوئی تکے
3796
مینوں عجب پکھیرو جانن کرن آپس وچ گلاّں
ایسا پنکھی کدی نہ ڈٹھا وچ اجاڑاں جھلاّں

لفظالی:
اوڑک مول نہ پہتے= اخیر انت تائیں ہر گز نہ اپڑے، عناب = کالی بھے مارن والے سُرخ رنگ دا ولائتی بیر، اُچھل = اُچھالا ، فندق= جھاڑی دے بیرورگا ولائتی میوہ، داکھ= دیسی انگور، ٹھاکے= منع کرے، گنتر = گنتی۔ شمار، بیکا بیک = طرحاں طرحاں دے ۔ رنگا رنگ دے، مُنکھاں = انساناں،بِن ہاڑے= ہنو ۔ جاڑھ ہلایاں بغیر، حیلہ= وسیلہ ، سنگ= فطری ۔ساتھی، بر بر تکدے= بِٹ بِٹ تکدے، شناس = شناخت، نسناس لوکائی = نسناس دی قوم نسناس = ٹ ک 204،نیلا= ہرا، کھوڑ= اخروٹ، آیوس= میں آیا ساں ، لگوس= میں لگا ساں ، جھل =زیر درختی والا سنگھنا بیلا،دم=ساہ،