ورقہ 204

3797
ساری خُوِرش اساڈی کھاندا دانہ گھاہ نہ کھاوے
خبر نہیں کے ذات ایہناں دی کیہڑے دیسوں آوے
3798
پھر مچھی تے میوے مینوں دین خوراک نروئی
کھاون پیون سب کجھ آہا سُکھ نہ آہا کوئی
3799
تنگ پیا دل میرا اوتھے چارہ کوئی نہ چلدا
ویکھ کلو ہنی شکل اوہناں دی جگر سینے وچ گلدا
3800
سیف ملوک پچھیندا بھائی شکل اوہناں دی کیسی
کجھ نمونہ دس اسانوں کیہڑی چیزے جیسی
3801
صاعد کہندا سن شزادہ دساں کجھ نشانی
سر اوہناں دا خوکاں وانگر باندر وانگ پیشانی
3802
اکھیں سبز ڈراون دوروں دند مثال پلنگاں
گور خراں دی دیہی ساری دَسدا بی میں سنگاں
3803
صورت آدمیاں دی آہے دونویں ہتھ اوہناں دے
اُٹھاں وانگر پیر بدن تے بہتے وال دُکھاندے
3804
سیف ملوک پچھیندا اگوں نال محبت خاصی
دس بھائی اس قیدے وچوں کیکر ہوئی خلاصی
3805
صاعد کہندا سُن شاہزادہ جو گل اگوں آئی
ہک دن مینوں مارن لگی اوہ نسناس لوکائی
3806
پر کوئی روز حیاتی باقی دنیا اُتےّ آہی
مارن تھیں اوہ ہوئے پشیماں کیتا کرم الٰہی
3807
تحفہ کر کے بھیجن لگے دُجے ملک کسے نوں
ہک جنا پھر چا کندھاڑے لے ٹریا سی مینوں
3808
جاندے جاندے نوں ہک جائی پانی اگوں آیا
وہنیدی ندی ڈونگھیری اندر پیر جدوں اس پایا
3809
پانی کولوں ڈر کے ہٹیا ٹِھلھ نہ سکیا مُولے
میں جاتا ہن ویلا ایہو نس پواں ات رُولے
3810
پنجرے تھیں میں باہر آیا چھال ندی وچ ماری
دو تن باہاں مار شتابی دور گؤس کر تاری
3811
اگے رُھڑدا جاندا آہا پانی تے ہک تختہ
ہو اسوار پیا اس اُتّے پھڑیا ہچھا سختا
3812
پنج دہاڑے تے پنج راتیں گئیوس ندی وچ رڑھدا
پھیر کنارے لگؤس اگوں ویکھ سبب کے جُڑدا
3813
زنگی آدم کھاون والے اگے سان بتیرے
مینوں پکڑ لیا پھر اُوہناں کھان لگے کر بیرے
3814
پھر کوئی پئی دلیل اوہناں نوں کرن آپس وچ گلاں
مینوں سمجھ نہ آوے کوئی نہ بولاں نہ ہلاّں
3815
خوب شکار سمجھ کے اوہناں اپنے ملک پُچایا
تیلے والے مٹکے اندر گردن تیک ڈبایا
3816
جاں گوشت وچ تیل سنجرسی تر ہوسی سبھ دیہی
تدوں خوراک کراں گے اس دی غرض اوہناں سی ایہی

لفظالی:

خورش = خوراک ، نروئی= صحت مند، کسے روگ خرابی دے بغیر، چارہ = تدبیر،کلوہنی= کالی کلوٹی تے بد شکل، خوکاں= سوراں ، سنگنا= جھجک شرم کرنا، دُکھاندے= سُکھاندے دا اُلٹ، کندھاڑے= موڈھیاں تے ، اِت رولے= ایس طریقے نال، جاتا= سمجھیا ۔ جان لیا ، تاری کرکے=ترکے ،سختا=سخت کر کے گھُٹ کے، جُڑدا= اکٹھا ہوندا۔ مِلدا، بیرے= ماس دے قیمے والے ٹکڑے ، دلیل = دل وچ سوچیا خیال،سنجرنا= کسے شے مائع وچ بھجن نال مائع دا اوس شے وچ رچ مچ جانا،