ورقہ 208

3871
شاہزادہ تے صاعد دونویں اوہ مجلس چھڈ چلے
جس ماڑی وچ ڈیرا آہا بیٹھے آن اکلےّ
3872
ہک دوجے سنگ گلاں کر دے پھولن بھیت دلاندے
سخن پیار محبت والے دَسے مول نہ جاندے
3873
دم دم نال اَلْحَمد گزارن کر دے شکر ہزاراں
کرم کیتا رب پھیر ملایا سِک سِکیندیاں یاراں
3874
جو جو رنج مصیبت گزری یاد کریندے آہے
بیٹھ پیارے لیکھا گندے عشق ونج دے لاہے
3875
سیف ملوک دتی سُکھ دولت دُکھ متاع خریدی
کھاون پیون سون بھلایا گرم اڈیک پری دی
3876
کدے سرہاندی کدے پواندی بستر پاس نہ لاوے
شام فجر بن شام محمدؒ نیند آرام نہ آوے
3877
شام ملے تاں کام سنوارے ہون درست شکستے
رین پلک بھر نین نہ سوندے پکن تکدے رستے
3878
ظالم درد وچھوڑے والا نام لیاں دل کنبے
بُری اُڈیک جدائی نالوں لوں لوں بلن النبے
3879
موتوں سخت اڈیک سجن دی تلخی جان کندن تھیں
نیندر بھکھ قرار صبر نوں کڈھے مار وطن تھیں
3880
تلو پسیلے سی شاہزادہ آمد بُجھ پری دی
اگے چل فقیرا ناہیں لمیّ گل کری دی
3881
صاعد تے شاہزادہ اندر بیٹھے روپ سُہائے
سورج چن محمدبخشا ہک برج وچ آئے
3882
ملکہ خاتوں بدرہ خاتوں نالے ماں اوہناں دی
باہر اوہلے کھلیاں تکن صورت خوب دوہاں دی
3883
تک تک بہت تعجب ہوون جوبن لہراں چڑھیاں
دُوروں رہ نہ سکیاں اوڑک تریئے اندر وڑیاں
3884
شاہزادے سن ڈٹھیاں ہویاں اوہ جوبن دیاں لاٹاں
پر اس دل سی عشق پری دا مل بیٹھا سبھ واٹاں
3885
ہور کسے دی صورت اس نوں کیکر سی دل پُڑدی
مصری نال ہووے منہ بھریا ریجھ رہے کد گڑدی
3886
صاعد دا دل شہر بے راجا ناہا عمل شکل دا
ذوالقرنین حسن دا چڑھیا مارن کوٹ عقل دا
3887
شاہ زوراور فوجاں والے لُگے ملک نہ چھڈدے
کرن سنبھالا پرجا والا اوڑک ہالہ کڈھدے
3888
ایسے شہر پیدائش والے وانگ نگر کشمیرے
کیکر خالی رہن محمد باجھوں حکم امیرے
3889
صاعد پرت ڈٹھا جس ویلے ملکہ بدرہ تائیں
ڈٹھوس بدر اگاس حسن دا کے گل آکھ سنائیں

لفظالی:
ماڑی = شاہی محل دا چوبارہ، الحمد گزارن = شکرانہ پیش کرن، سِک سکیندیاں = ملن دی اڈیک وچ تڑفدیاں، ونج= بیو پار، لاہے= منافعے، گرم اڈیک= جوش بھریا انتظار ، پاس = پاسا۔ طرف Side، بن شام= محبوب دے بغیر ، شکستے = ٹٹے دل والے، پھٹڑ روگی ، جان کندن تھیں= نزع دے وقت توں ، تلو پسیلے= بے چینی نال پاسے پرتن والا، ترئیے= بدرہ۔ ملکہ ۔ اوہناں دی ماں ، واٹاں = رستے ، دل پُڑنا= دل وچ کھُبھنا،بے راجا= جتھے کسے دی حکومت نہ ہووے، کوٹ مارنا= قلعہ فتح کرنا، ناہا عمل شکل دا= حکومت عملداری دی کسے شکل توں بغیرسی، ذوالقرنین = ٹ ک سورۃ کہف98، لُگے = خالی ۔ کسے راکھیوں بغیر ، سنبھالا = حفاظت راکھی، ہالہ کڈھنا= کساناں دے ذمے معاملے دا بقایا گھلنا، پیدائش= پیداوار ۔ آمدنی،اگاس=آکاش۔اسمان،