ورقہ 213

3964
صاعد کہندا قسم کراں میں سچے عشق تیرے دی
عاصم شاہ دے تاج تخت دی نالے باپ میرے دی
3965
ایسے تیر نیناں دے لگے چیر گئے دل میرا
بدرہ دے غم کیتا اینویں جیوں سیخے پر بیرا
3966
گھڑیو گھڑی مینوں جو ورتی قہر کلور غماںدی
چودھاں برساں وچ نہ ہوئی ایسی باب تساندی
3967
بدرہ نوں ہک واری ڈِٹھیاں ہک میری بل اٹھی
اوہ بھی عشق محبت میری بِن تلواروں کُٹھی
3968
شاہزادہ فرماون لگا سُن توں مےرے بھائی
عشق کماون نہیں سُکھالے اوہ جانے جو لائی
3969
عاشق کُل کوہ قاف زمیں دے ریتو وانگن گاہندے
دھولے وانگر ہُول نہ کردے بھاراں رکھن کاندھے
3970
راہ عشق دے چلن والے سچے مرد سپاہی
جانن نہ کوہ قاف سمندر جت ول ہوون راہی
3971
اوہ بھی عشق ہوائے چائے اُڈ ٹُرن ول یاراں
اُڈن والے نوں کیا جنگل کیا پانی کیا دھاراں
3972
فرہادے آزادے لگا عشق شیریں دا شیریں
بن ترکھان اجاڑاں اندر جائے پہاڑاں چیریں
3973
جدوں زلیخا عشق ستائی بیٹھی رستہ مل کے
سسی ہوئی شہید محمد راہ تھلاں دے چل کے
3974
صاعد نال کیتی شاہزادے جاں ایہ بات پرم دی
لگی بھڑک بنبولاں تائیں آتش جرم کرم دی
3975
آہیں ڈھائیں گھت کہائیں رُناّ درد رنجانا
کون کوئی بِس ٹالے لڑیا ظالم ناگ ایانا
3976
بیدل دی کوئی بیدن جانے ہووے بید سیانا
درداں قہراں لہراں چڑھیاں لوں لوں زہر سمانا
3977
ہویا گھاء کلیجے اندر بِیلا آندریاں نوں
نیراکھیں تھیں لوہو وگیا سدّو ماندریاں نوں
3978
آئی جان لباں پر بھائی موتوں بُری جدائی
برہوں ڈنگے کارن سَدّو بدرہ بید قصائی
3979
صاعد روندا بے سُدھ ہوندا وانگ کبوتر پھڑکے
کندھاں نال وَجّے سر متھا زخمی ہویا جھڑکے
3980
شاہزادے نے معلم کیتا پیا فساد وڈیرا
صبربنھاوے چپ کراوے سُن توں بھائی میرا
3981
تیرے کارن اوس کُڑی دا ناتا طلب کراں گا
کم تیرے وچ دم نہ لیساں جاں جاں تیک سراں گا
3982
پر بدرہ دے ماں پیو تائیں اج نہ آکھن ہوندا
بعضے کم شتابی کیتیاں فتنہ اُٹھ کھلوندا

لفظالی:
بیرا= کباب دی چھوٹی بُوٹی، گھڑیو گھڑی= ہر لمحے، کلُور= موت لیاون والے ظلم ستم غضب،باب= بابت ۔ بھیڑی حالت، ہک= سینہ چھاتی، عشق کماون= عشق دے سارے تقاضے پورے کرنا، دھولے = دھول ۔ سنگاں تے دھرتی چکن والا بلد، ہُول= دکھ دی پکار۔ سی، دھاراں =(١) ندیاں (٢) پہاڑی سلسلے ، شیریں= مٹھا، پرم = پریم عشق، بنبول = ککر دا رُکھ ، جرم = جنم۔ فطری پیدائشی، کرم= پچھلے کماں داپھل، کہائیں گھتنا= کہرام مچانا۔ ماتم وچ چیخ پکار کرنا،بِس ٹالے= زہر دا اثر دور کرے، ناگ ایانا= عشق دا معصوم سپ ، بیدن= روگ مرض، بید= وید، گھاء = گھاؤ۔ ڈوہنگھا پھٹ، بیلا=(بھیڑا) وقت ۔کسے اعصابی کھچا وچ آندران کٹھیاں ہو جاندیاں نیں ،بِیلا=بچیاں دا آندراں دا سُول،